ஊக்கமருந்துக்கு எதிராக புதிய சட்டம்

புதுடில்லி: விளையாட்டு போட்டிகளில் ஊக்கமருந்து பயன்படுத்துவதை தடுக்கும் வகையில், வரும் பார்லிமென்ட் கூட்டத் தொடரில், கடுமையான புதிய சட்டம் கொண்டு வரப்பட உள்ளது.
சமீபத்தில் தடகள வீரர், வீராங்கனைகளிடம் நடத்தப்பட்ட ஊக்கமருந்து சோதனையில், மன்தீப் கவுர், சினி ஜோஸ், அஷ்வினி உள்ளிட்ட 8 பேர் பிடிபட்டனர். இதுகுறித்து மத்திய விளையாட்டு அமைச்சர் அஜய் மேகன் கூறியது:
எங்களைப் பொறுத்தவரை தேசிய ஊக்கமருந்து தடுப்பு மையத்தின் (டபிள்யு.ஏ.டி.ஏ.,) விதிகளை, கிரிக்கெட் உட்பட மற்ற அனைத்து விளையாட்டு அமைப்புகளும் பின்பற்ற வேண்டும். இது பெரும்பாலும் சர்வதேச விளையாட்டு விதிகள் போன்று தான் இருக்கும். ஒருவேளை அதிலிருந்து மாறுபட்டு இருக்கும் பட்சத்தில், சர்வதேச விதிகளையே இங்கும் ஏற்றுக்கொள்வோம். தவிர, ஊக்கமருந்து பயன்படுத்துவதை தடுக்கும் வகையில், வரும் பார்லிமென்ட் கூட்டத்தில் புதிய சட்டம் கொண்டு வர முடிவு செய்துள்ளோம்.
இவ்வாறு அஜய் மேகன் தெரிவித்தார்.
அதிரடி "ரெய்டு':
இதனிடையே தேசிய விளையாட்டு மையம் (எஸ்.ஏ.ஐ.,) அமைந்துள்ள பெங்களூருவில், டபிள்யு.ஏ.டி.ஏ., சார்பில் நேற்று அதிரடி "ரெய்டு' நடத்தப்பட்டது. டாக்டர் ஜெயராமன் தலைமையிலான குழுவினர், அறைகள், வீரர்களுக்கு வழங்கப்படும் மருந்துகளை சோதித்தனர். தவிர, அங்கு தங்கியுள்ள வீரர்களிடம் சிறுநீரக மாதிரிகளை சோதனைக்காக எடுத்துச் சென்றனர்.
ஒலிம்பிக் "அம்போ':
சினி ஜோஸ், ஜுவானா மர்மு, டியானா மேரி தாமஸ் ஆகியோரை தொடர்ந்து, அஷ்வினி, பிரியங்கா பன்வாரின், "பி' சாம்பிள் சோதனை முடிவு வந்துள்ளது. இதில் ஊக்கமருந்து பயன்படுத்தியது நிரூபணம் ஆகியுள்ளது. இதனால் சர்வதேச போட்டிகளில் பங்கேற்க இவர்களுக்கு, இரண்டு ஆண்டு தடை விதிக்கப்பட உள்ளது. இதையடுத்து லண்டன் ஒலிம்பிக்கில்(2012) பங்கேற்கும் இவர்களது கனவும் தகர்ந்து போனது.

பாரத ரத்னா விருது
பாரத் ரத்னா விருது குறித்து மத்திய விளையாட்டு அமைச்சர் அஜய் மேகன் கூறுகையில்,"" நாட்டின் உயர்ந்த "பாரத ரத்னா' விருது பட்டியலில், விளையாட்டையும் சேர்க்க வேண்டும். இதுவரை விளையாட்டுத் துறையை சேர்ந்தவர்கள், இவ்விருதுக்கு தேர்வு செய்யப்படாதது துரதிருஷ்டவசமானது. இதை மாற்றுமாறு உள்துறை அமைச்சரிடம் தெரிவித்துள்ளேன்,'' என்றார்.