மத்திய மந்திரிசபை நாளை மாற்றம்? சோனியாவுடன் மன்மோகன்சிங் ஆலோசனை

**சிவா** · **சிவா** Sun Jul 10, 2011 8:43 am

மத்திய மந்திரிசபை நாளை மாற்றி அமைக்கப்படும் என்று தெரிகிறது. இதுபற்றி சோனியா காந்தியுடன் பிரதமர் மன்மோகன்சிங் ஆலோசனை நடத்தினார்.

ஆலோசனை

மத்திய மந்திரிசபை மாற்றம் பற்றி நீண்ட நாட்களாக பேச்சு அடிபட்டு வருகிறது. மந்திரிசபையில் நிறைய காலியிடங்கள் ஏற்பட்டு இருப்பதால், மந்திரிசபையை விரிவுபடுத்துவது அவசியம் ஆகியுள்ளது. சமீபத்தில், பிரதமர் மன்மோகன்சிங், பத்திரிகை ஆசிரியர்களுக்கு பேட்டி அளித்தபோது, மந்திரிசபை மாற்ற பணிகள் நடைபெற்று வருவதாக தெரிவித்தார்.

இந்த சூழ்நிலையில், பிரதமர் மன்மோகன்சிங்கும், காங்கிரஸ் தலைவர் சோனியா காந்தியும் நேற்று சந்தித்து பேசினர். மந்திரிசபையை மாற்றி அமைப்பது பற்றி இருவரும் ஆலோசனை நடத்தினர். புதிய மந்திரிகள் பட்டியல் ஏறக்குறைய இறுதி செய்யப்பட்டு விட்டதாக தெரிகிறது.

நாளை (திங்கட்கிழமை) மந்திரிசபை மாற்றம் மேற்கொள்ளப்படும் என்று தகவல்கள் தெரிவிக்கின்றன.

காலியிடங்கள்

மத்திய மந்திரிசபையில் ஏற்பட்டுள்ள காலியிடங்களால், சில மந்திரிகள் இரட்டை பொறுப்புகளை வகித்து வருகிறார்கள். பிரதமர் அலுவலக மந்திரியாக இருந்த பிருதிவிராஜ் சவுகான், மராட்டிய மாநில முதல்-மந்திரியாக நியமிக்கப்பட்டதால், அந்த இடம் காலியாக உள்ளது.

ரெயில்வே மந்திரியாக இருந்த மம்தா பானர்ஜி, மேற்கு வங்காள முதல்-மந்திரியாக பதவி ஏற்றதால், ரெயில்வே இலாகாவை பிரதமரே கூடுதலாக கவனித்து வருகிறார். பவன்குமார் பன்சால், பாராளுமன்ற விவகாரத் துறையுடன், விஞ்ஞானம் மற்றும் தொழில்நுட்பத்துறையை கூடுதலாக கவனித்து வருகிறார்.

ஆ.ராசா ராஜினாமா செய்ததால், அவர் வகித்து வந்த தொலைத்தொடர்புத்துறை இலாகாவை மத்திய மனிதவளத்துறை மந்திரி கபில் சிபல் கூடுதல் பொறுப்பாக கவனித்து வருகிறார். கடந்த 7-ந் தேதி, மத்திய ஜவுளித்துறை மந்திரியாக இருந்த தயாநிதி மாறன் ராஜினாமா செய்ததால், அந்த இலாகாவும் காலியாக உள்ளது.

மத்திய கம்பெனிகள் விவகாரத்துறை மந்திரி முரளி தியோரா, சொந்த காரணங்களுக்காக, பதவி விலக விருப்பம் தெரிவித்துள்ளார். அவர் ராஜினாமா செய்தால், அந்த இலாகாவுக்கு அவருடைய மகன் மிலிந்த் தியோரா மந்திரி ஆக்கப்படுவார் என்று கூறப்படுகிறது.

மந்திரிகள் நீக்கம்

இத்தனை காலி இடங்களை பூர்த்தி செய்வது மட்டுமின்றி, திறமையாக செயல்படாத சில மந்திரிகளை நீக்கி விட்டு, புதிய மந்திரிகளை நியமிக்கவும் பிரதமர் மன்மோகன்சிங் திட்டமிட்டுள்ளார். சில மூத்த மந்திரிகளின் இலாகாக்கள் மாற்றி அமைக்கப்படும் என்று எதிர்பார்க்கப்படுகிறது. இருப்பினும், பிரணாப் முகர்ஜி, ப.சிதம்பரம், ஏ.கே.அந்தோணி, எஸ்.எம்.கிருஷ்ணா ஆகிய 4 முக்கிய மந்திரிகள் அதே இலாகாக்களில் நீடிப்பார்கள் என்று தெரிகிறது.

அடுத்த ஆண்டு உத்தரபிரதேசத்தில் தேர்தல் நடைபெறுவதால், அம்மாநிலத்தை சேர்ந்த சில ராஜாங்க மந்திரிகள், கேபினட் மந்திரிகளாக ஆக்கப்படுவார்கள் என்ற தெரிகிறது. சில மந்திரிகள், கட்சிப் பணிக்கும், கவர்னராக உள்ள சிவராஜ் பட்டீல், மத்திய மந்திரி பதவிக்கும் மாற்றப்படுவார்கள் என்று எதிர்பார்க்கப்படுகிறது.

மத்திய மந்திரி கபில் சிபல், நேற்று பிரதமரை சந்தித்து பேசினார். எனவே, அவரது இரட்டை பொறுப்பு குறைக்கப்படும் என்று தெரிகிறது. மத்திய சட்ட மந்திரி வீரப்ப மொய்லி, தான் மந்திரி பதவியில் நீடிப்பேன் என்று நம்பிக்கை தெரிவித்துள்ளார்.

கருணாநிதியுடன் ஆலோசனை

தி.மு.க.வைச் சேர்ந்த ஆ.ராசா, தயாநிதி மாறன் ஆகியோரின் ராஜினாமாவால் ஏற்பட்ட காலியிடங்களுக்கு தி.மு.க.வில் இருந்தே வேறு புதிய மந்திரிகள் நியமிக்கப்படுவார்கள் என்று தெரிகிறது. இதுதொடர்பாக, தி.மு.க. தலைவர் கருணாநிதியை மத்திய நிதி மந்திரி பிரணாப் முகர்ஜி நேற்று சந்தித்து ஆலோசனை நடத்தினார்.

தினதந்தி

மத்திய மந்திரிசபை நாளை மாற்றம்? சோனியாவுடன் மன்மோகன்சிங் ஆலோசனை

மத்திய மந்திரிசபை நாளை மாற்றம்? சோனியாவுடன் மன்மோகன்சிங் ஆலோசனை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக