ஜனநாயகத்திற்கு வெற்றி, விடுவிக்கப்பட்ட அம்பிகாவும் ஹாடியும் கூறினர்

இன்று மாலை மணி 6.30 வாக்கில் பெர்சே 2.0 தலைவர் அம்பிகா ஸ்ரீனிவாசனும் பாஸ் தலைவர் அப்துல் ஹாடி அவாங்கும் விடுவிக்கப்பட்டனர். அதற்கு முன்னதாக கோலாலம்பூர் போலீஸ் தலைமையகத்தில் அவர்களுடைய வாக்குமூலங்கள் பதிவு செய்யப்பட்டன.

கோலாலம்பூர் போலீஸ் தலைமையகத்திற்கு வெளியில் நிருபர்களிடம் பேசிய அம்பிகா, முழு அளவில் பேரணியில் கலந்து கொண்ட மலேசியர்களைப் பாராட்டினார்.

“நான் மீண்டும் கூறுகிறேன், மலேசிய மக்களுக்கு சபாஷ். நாங்கள் அச்சுறுத்தப்படவில்லை.”

“இனிமேல் இதில் தேர்தல் விவகாரம் மட்டும் சம்பந்தப்பட்டிருக்கவில்லை. சிறந்த தேர்தல் நடைமுறையை பெற்றிருக்க மக்கள் கொண்டுள்ள விருப்பத்தை நாம் இன்று சாதித்துள்ளோம். இது மக்களுடைய கண்களைத் திறந்துள்ளது. நாம் அதனைச் சாதித்துள்ளோம்,” என அவர் சொன்னார்.

கோலாலம்பூர் போலீஸ் தலைமையகத்தில் தடுத்து வைக்கப்பட்டவர்களில் முதலில் விடுவிக்கப்பட்ட எழுவரில் அம்பிகாவும் ஒருவர் ஆவார்.

அம்பிகாவுடன், ஹாடி, பெர்சே ஏற்பாட்டுக் குழு உறுப்பினர்களான மரியா சின் அப்துல்லா, ஜுட் ருபிஸ், பிகேஆர் மூத்த தலைவர் அன்வார் இப்ராஹிமின் இளைய புதல்வி நுருல் இமான் ஆகியோரும் விடுவிக்கப்பட்டனர்.

தடுத்து வைக்கப்பட்ட அனைவரும் இன்றிரவுக்குள் விடுவிக்கப்பட்டு விடுவர் என கோலாலம்பூர் சிஐடி தலைவர் கூ சின் வா கூறினார்.

“இன்று மாலை மணி 6.30 தொடக்கம் கட்டம் கட்டமாக போலீஸ் பயிற்சி நிலையத்தில் வைக்கப்பட்டுள்ளவர்களையும் ஜிஞ்சாங், கோலாலம்பூர் போலீஸ் தலைமையகம் ஆகியவற்றில் உள்ளவர்களை இரவு 9 மணிக்குள்ளும் விடுவிக்க நாங்கள் எண்ணியுள்ளோம்,” என அவர் சொன்னார்.போலீஸ் பயிற்சி நிலையத்தில் வைக்கப்பட்டுள்ளவர்கள் அவர்கள் கைதான இடத்துக்குக் கொண்டு செல்லப்பட்டு அங்கு விடுவிக்கப்படுவர் என்றும் கூ தெரிவித்தார்.

மலேசியாஇன்று