உலக அளவில் சிறந்த பாதுகாப்பு அளிக்க முடிவு: பத்மனாபசுவாமி கோவில் பாதுகாப்புக்கு ரூ.30 கோடி

திருவனந்தபுரம் பத்மனாபசுவாமி கோவிலில் உள்ள 6 ரகசிய பாதாள நிலவறைகளை திறந்து அங்குள்ள நகைகளை மதிப்பிட்டு அறிக்கை தாக்கல் செய்யும்படி சுப்ரீம் கோர்ட்டு உத்தரவிட்டது.

இதையடுத்து ஓய்வு பெற்ற ஐகோர்ட்டு நீதிபதிகள் 7 பேர் கொண்ட கமிட்டி அமைக்கப்பட்டது. அவர்கள் முன்னிலையில் இதுவரை 5 ரகசிய பாதாள நிலவறைகள் திறக்கப்பட்டது. அங்கிருக்கும் நகைகளை கணக்கீடு செய்ததில் அவை ரூ.1 லட்சம் கோடியை தாண்டியுள்ளது.

பாதாள அறைகளில் இருந்து அள்ள அள்ள குறையாமல் கிடைத்த பொற்குவியலால் பத்மனாபசுவாமி கோவில் உலக அளவில் பெரும் புகழ் பெற்றுள்ளது. இதன் காரணமாக பாதுகாப்பு பலப்படுத்தப்பட்டுள்ளது.

ஏற்கனவே கேரள போலீசார் 200 பேர் கோவிலை சுற்றி பாதுகாப்பு பணிக்கு நிறுத்தப்பட்டுள்ளனர். மற்றும் 48 கமாண்டோ படை வீரர்களும் ரோந்து பணியில் ஈடுபட்டுள்ளனர். இவர்களுக்கு தினசரி ரூ. 10 லட்சம் செலவிடப்படுகிறது.

இதைத் தொடர்ந்து கோவிலுக்கு வரும் பக்தர்களை கண்காணிக்கும் வகையில் சுழல் காமிராக்கள், ஸ்கேனிங் கருவிகள் மற்றும் மெட்டல் டிடெக்டர்களும் பொருத்தப்பட்டுள்ளன. 24 மணி நேரம் துப்பாக்கி ஏந்திய போலீசார், கமாண்டோ படை வீரர்கள் பாதுகாப்பு வளையத்திற்குள் கொண்டு வரப்பட்டுள்ள பத்மனாபசுவாமி கோவிலில் மேலும் பாதுகாப்பை அதிகரிக்க கேரள போலீசார் முடிவு செய்து உள்ளனர்.

இதன்படி உலக அளவில் மிகச்சிறந்த பாதுகாப்பை அளிப்பது என்று தீர்மானித்து உள்ளனர். இது தொடர்பாக டி.ஜி.பி.ஜேக்கப் புன்னூஸ் கூறியதாவது:-

அதிக அளவில் பொற்குவியல் கண்டுபிடிக்கப்பட்ட பத்மனாபசுவாமி கோவிலின் அரைகிலோ மீட்டர் சுற்றளவில் வரும் பகுதிகளை சிறப்பு பாதுகாப்பு மண்டலமாக அறிவிக்க முடிவு செய்து உள்ளோம். மேலும் 1 கிலோ மீட்டர் சுற்றளளவில் கூடுதல் போலீசாரை இரவு பகலாக கண்காணிப்பு பணியில் ஈடுபடுத்தவும் தீர்மானித்து உள்ளோம்.

உலக அளவில் மிகச் சிறந்த பாதுகாப்பை ஏற்படுத்த உள்ளதால் நவீன வசதிகளையும் செய்ய வேண்டியது உள்ளது. இதனால் இனி வரும் காலங்களில் ஆண்டுக்கு பாதுகாப்பு செலவாக ரூ.30 கோடிவரை தேவைப்படும். இது சம்பந்தமாக அறிக்கை தயார் செய்து கேரள அரசுக்கு சமர்பித்து உள்ளோம்.

இவ்வாறு அவர் கூறினார்.


மாலை மலர்

ஆண்டுக்கு பாதுகாப்பு செலவாக ரூ.30 கோடிவரை தேவைப்படும்.

35 ஆண்டுக்கு 1050 கோடி அனைத்தும் செலவாகி விட்டது என்று அறிக்கை வெளியிட சரியாக இருக்கும்