பெர்சே 2.0 -ல் கலந்து கொள்ள சனிக்கிழமைக்குள் கோலாலம்பூருக்குள் வருவீர்!

பெர்சே 2.0 எச்சரிக்கை: டெல்கோ, இணையத்தளச் சேவைகள் நிறுத்தப்படலாம்:

வார இறுதியில் கைபேசிச் சேவைகளும் இணையதளச் சேவைகளும் தற்காலிகமாக நிறுத்தி வைக்கப்படலாம் என்று தகவல் கிடைத்திருப்பதாக பெர்சே 2.0 கூறுகிறது.

பேரணியைக் குலைக்க அப்படியொரு நடவடிக்கையை அதிகாரிகள் மேற்கொள்வார்களானால் பின்னர் அவர்களுக்கும் மத்திய-கிழக்கு சர்வாதிகாரிகளுக்கும் வேறுபாடு இருக்காது என்று பெர்சே 2.0 இயக்கக் குழு இன்று ஓர் அறிக்கையில் குறிப்பிட்டிருந்தது.

“வார இறுதியில் இணையத்தளச் சேவை பகுதி அல்லது முழு அடக்குமுறைக்கு இலக்காகலாம் என்ற செய்தி அறிந்து பெர்சே 2.0 அதிர்ச்சி அடைகிறது.

“கைபேசிச் சேவைகளையும் இணையத்தளச் சேவைகளையும் முடக்கிப் போட்டால் பின்னர் அதிகாரிகளுக்கும் இதேபோன்ற நடவடிக்கைகளை மேற்கொண்டு அதனால் எந்தப் பலனும் காணாத மத்தியகிழக்கு சர்வாதிகாரிகளுக்குமிடையில் எவ்வித வேறுபாடு இருக்காது என்று பெர்சே 2.0 அரசாங்கத்தை எச்சரிக்கிறது”.

சனிக்கிழமை பிற்பகல் மணி 2-க்கு மெர்டேகா அரங்கில் ஒன்றுகூடுவதென்பது உறுதியாகி விட்டது. அதை அடக்குமுறையோ அச்சுறுத்தலோ வேறு எவ்வித தடங்கலோ தடுக்கவியலாது என்று அக்குழு கூறியது.

“ஒன்றுகூடல் முடிந்ததும் அமைதியாகக் கலைந்து செல்வோம்”, என்றந்த அறிக்கை கூறியது.

‘சனிக்கிழமைக்குள் கோலாலம்பூருக்குள் வருவீர்’

நாளை கோலாலம்பூரில் கெடுபிடிகள் அதிகமாக இருக்கும் என்பதால் பேரணியில் கலந்துகொள்வோர் இன்று அல்லது நாளை மாநகருக்குள் வந்து விடுவது நல்லது என்றும் அது அறிவுறுத்தியுள்ளது.

“கோலாலம்பூருக்குள் வர பேருந்துகளுக்கு அனுமதிகள் முடக்கப்பட்டுள்ளதைப் பார்க்கும்போது (சனிக்கிழமை) நகருக்குள் நுழைவதைச் சிரமமாக்கும் திட்டங்கள் தயார்நிலையில் உள்ளதைப் புரிந்துகொள்ள முடிகிறது”, என்றும் அது குறிப்பிட்டது.

போலீசார் நேற்றிலிருந்து நெரிசல்மிக்க நேரத்தில் ஆயுதக் கடத்தலைத் தடுப்பதற்கு என்றுகூறி சாலைத்தடுப்புகளை அமைத்துச் சோதனை செய்கிறார்கள்.

நிலப் பொதுப்போக்குவரத்து ஆணையத் (ஸ்பேட்) தலைவர் சைட் ஹமிட் அல்பார், இவ்வாரக் கடைசியில் கோலாலம்பூருக்கு நுழைய பேருந்துகளுக்குத் தற்காலிக அனுமதி வழங்கப்படாது என்பதை உறுதிப்படுத்தியுள்ளார்.

அப்படிச் சொன்னவர், பேரணியைக் கருத்தில் கொண்டு அவ்வாறு செய்யப்படவில்லை என்றும் விழாக்காலங்கள் அல்லாத வேளையில் அப்படிப்பட்ட அனுமதிகளை வெளியிடுவதில்லை என்பது ஒரு பொதுவான கொள்கை என்றும் விளக்கினார்.