ஐகோர்ட் நல்ல தீர்ப்பு வழங்கும்: கருணாநிதி நம்பிக்கை

சென்னை: ""சமச்சீர் கல்வித்திட்டம் தொடர்பாக சென்னை ஐகோர்ட், நல்ல தீர்ப்பு வழங்கி, மாணவர்களின் எதிர்கால நலனை காப்பாற்றும் என்று நம்புகிறேன்,'' தி.மு.க., தலைவர் கருணாநிதி தெரிவித்துள்ளார்.

அவரது அறிக்கை:கடந்தாண்டு, தமிழ்நாடு சமச்சீர் பள்ளிக் கல்விமுறை சட்டம் இயற்றப்பட்டது. அதே ஆண்டு அனைத்து பள்ளிகளிலும், முதல் மற்றும் 6ம் வகுப்பில், சமச்சீர் கல்வி அமல்படுத்தப்பட்டது. நடப்பாண்டு 10ம் வகுப்பு வரை அமல்படுத்த, 200 கோடி ரூபாய் மதிப்பில் பாடப்புத்தகங்கள் அச்சிடப்பட்டன. அ.தி.மு.க., ஆட்சிக்கு வந்ததும், சமச்சீர் கல்வித் திட்டத்தை, நிறுத்தி வைக்க முடிவு செய்தது. அதை எதிர்த்து, சென்னை ஐகோர்ட்டில், பொது நல வழக்கு தொடரப்பட்டது. வழக்கை விசாரித்த நீதிபதிகள், அ.தி.மு.க., அரசின் சமச்சீர் கல்வி திருத்த சட்டத்தை நிறுத்தி வைத்து உத்தரவிட்டனர்.

அதை எதிர்த்து, தமிழக அரசு மேல் முறையீடு செய்தது. அதை விசாரித்த நீதிபதிகள், "முதல் மற்றும் 6ம் வகுப்புகளுக்கு, கடந்தாண்டு கொண்டு வரப்பட்ட, சமச்சீர் கல்வியை தொடர்ந்து அமல்படுத்த வேண்டும். மற்ற வகுப்புகளுக்கு, சமச்சீர் கல்வியை அமல்படுத்துவது குறித்து ஆராய, நிபுணர் குழு நியமிக்க வேண்டும். அக்குழு, தனது அறிக்கையை, இரண்டு வாரத்தில் ஐகோர்ட்டில் தாக்கல் செய்ய வேண்டும். வழக்கின் முக்கியத்துவம் கருதி, ஐகோர்ட் தினமும் விசாரித்து, ஒரு வாரத்திற்குள் தீர்ப்பளிக்க வேண்டும்' என தீர்ப்பளித்தனர்.

அதை ஏற்று அ.தி.மு.க., அரசு கல்வியாளர்கள் குழு அமைத்தது. அதில் சமச்சீர் கல்விக்கு, எதிரானவர்களே இடம் பெற்றுள்ளனர் என்ற கருத்து பலராலும் கூறப்பட்டது. அதைப்பற்றி ஆட்சியாளர்கள் கவலைப்படாமல், அக்குழுவைக் கொண்டே, ஐகோர்ட்டில் அறிக்கை தாக்கல் செய்துள்ளனர். அந்த அறிக்கை, அவர்கள் எதிர்பார்த்தபடியே அமைந்துள்ளது. அதை ஐகோர்ட் விசாரித்து, முடிவை தெரிவிக்க உள்ளது. சென்னை ஐகோர்ட், இறுதி தீர்ப்பு வழங்கி, மாணவர்களின் எதிர்கால நலனை காப்பாற்றும், எனப் பெரிதும் நம்புகிறேன்.இவ்வாறு கருணாநிதி தெரிவித்துள்ளார்.
நன்றி:தினமலர்

அம்மையார் தமிழ்நாட்டு குழந்தைகள் படிக்கவே கூடாது என்று ஒன்றரை மாதத்தை வீணடித்து விட்டார்....