பத்மநாபசாமி கோவிலில் இருப்பது போல உடுப்பி கோவிலிலும் தங்க புதையலா?

திருவனந்தபுரம் பத்ம நாபசாமி கோவிலில் இருந்தது போன்று உடுப்பி ஸ்ரீகிருஷ்ணா கோவிலிலும் பல கோடி ரூபாய் மதிப்புள்ள பொக்கிஷங்கள் இருக்கலாம் என்றும் சந்தேகம் எழுந்துள்ளது. புட்டபர்த்தி சாய்பாபா ஆசிரமத்தில் இருந்தும், திருவனந்தபுரம் ஸ்ரீபத்மநாப சாமி கோவிலில் இருந்தும் கோடிக்கணக்கான ரூபாய் மதிப்புள்ள பொக்கிஷங்கள் இருந்தது கண்டுபிடிக்கப்பட்டன.

பத்மநாபசாமி கோவில் அறையில் இருந்து கண்டு பிடிக்கப்பட்ட நகைகளின் மதிப்பு ரூ.1 லட்சம் கோடிக்கு மேல் இருக்கும் என்று மதிப்பிடப்பட்டுள்ளது. இதனை அடுத்து பிற கோவில்களிலும், ஆசிரமங்களிலும், மடங்களிலும் ஏராளமான நகைகள் சேமித்து வைக்கப்பட்டு இருக்கலாம் அல்லது மறைத்து வைக்கப்பட்டு இருக்கலாம் என்ற பேச்சு பரவலாக எழுந்துள்ளது. எனவே நாட்டில் உள்ள பழமையான கோவில்களிலும் ஆய்வு நடத்தப்பட வேண்டும் என்றும் கோரிகையும் எழுந்துள்ளது.

கர்நாடகா மாநிலம் உடுப்பியில் உள்ள ஸ்ரீகிருஷ்ணா கோவிலில் பத்மநாபசாமி கோவிலுக்கு சமமாக அல்லது அதற்கு அதிகமாக பொக்கிஷங்கள் இருக்கலாம் என்ற பேச்சும் அடிபட்டு வருகிறது.

இந்த கோவிலும் 800 ஆண்டுகள் பழமை வாய்ந்தது ஆகும். கோவில் வளாகத்துக்குள் சர்ப்பம் கடவுளுக்கு (பாம்பு கடவுள்) சன்னதி உள்ளது. கோவில் வளாகத்துக்குள் பூமிக்கு அடியில் ஏராளமான பொக்கிஷங்கள் இருக்கலாம். அதன் மீதுதுன் சர்ப்பம் சன்னதி அமைக்கப்பட்டு இருக்கிறது என்று கர்நாடகா மாநிலத்தில் பரவலாக நம்பப்படுகிறது.

சொத்துக்களை பாதுகாக்க கூடிய கடவுளாக சர்ப்பர் நம்பப்படுகிறார். எனவேதான் பொக்கிஷத்தின் மீது சர்ப்பர் சன்னதி அமைக்கப்பட்டுள்ளது என்றும் கூறப்படுகிறது. கிருஷ்ணர் கோவிலுக்கு வடநாட்டை சேர்ந்த மன்னர்கள் பலர் ஏராளமான நகைகளும், நிலங்களையும் நன்கொடையாக அளித்துள்ளதாக கோவில் ஆவணங்கள் தெரிவிக்கின்றன.

இங்கு ஆய்வு மேற்கொண்டால் பல லட்சம் கோடி மதிப்புள்ள பொக்கிஷங்கள் கிடைக்கலாம் என்று கருத்து நிலவுகிறது. ஆனால் திருவனந்தபுரம் பத்மநாபசாமி கோவிலில் நடத்தப்பட்டது போன்று இங்கு ஆய்வு நடத்த அனுமதி அளிக்கப்பட மாட்டாது என்று ஸ்ரீகிருஷ்ணர் மடம் கூறியுள்ளது.

மாலை மலர்