தி.மு.க. என்பது பனங்காட்டு நரி. எந்த சலசலப்புக்கும் அஞ்சாது - மு.க.ஸ்டாலின் பேச்சு

மயிலாப்பூர் பகுதி தி.மு.க. பொதுக்கூட்டம் மாங்கொல்லையில் நேற்று நடந்தது. தேர்தலுக்கு பிறகு மு.க. ஸ்டாலின் பங்கேற்கும் முதல் கூட்டம் என்பதால் தொண்டர்கள் கூட்டம் நிறைந்திருந்தது. கூட்டத்தில் தி.மு.க. பொருளாளரும் முன்னாள் துணை முதல்-அமைச்சருமான மு.க. ஸ்டாலின் பேசியதாவது:-

தோல்வியை கண்டு துவளாத இயக்கம் தி.மு.க. வெற்றி தோல்வியை சமமாக கருதி உழைப்பவன்தான் தி.மு.க. தொண்டன். அதனால்தான் இங்கே இவ்வளவு பெரிய கூட்டம் திரண்டு இருக்கிறது.

சூரியன் அஸ்தமித்து விட்டது என்கிறார் ஜெயலலிதா. சூரியன் என்றுமே அஸ்தமிப்பது இல்லை. பூமி அதை சுற்றி வருவதால் அப்படி தெரிகிறது. மாற்றம் தேவை என்கிறார்கள். என்ன மாற்றம் என்பதை மக்கள் இப்போது பார்த்து விட்டார்கள். ஓட்டு போட்ட அவர்களுக்கு ஏமாற்றம்தான்.

சமச்சீர் கல்வி இந்த சமுதாயத்தை மேம்படுத்தும் திட்டம். அதை கொண்டு வந்தவர் கலைஞர் என்பதால் இந்த அரசு தடுக்கிறது. மருத்துவக்காப்பீட்டு திட்டம், அண்ணா மறுமலர்ச்சி திட்டம் போன்றவை அதே காரணத்தால் முடக்கப்படுகிறது.

தலைமை செயலகத்தை மாற்ற முதலில் முடிவெடுத்தது ஜெயலலிதாதான். கடற்கரைசாலை, ராணிமேரி கல்லூரி, அண்ணா பல்கலைக்கழகம் போன்றவற்றில் தலைமை செயலகத்தை கட்ட முயன்றார். தி.மு.க. அரசு வந்ததும் அரசுக்கு சொந்தமான இடத்தில் தலைமை செயலகம் கட்டியது. அதற்கு விசாரணை கமிஷனாம். நாங்கள் பார்க்காத விசாரணை கமிஷனா? பழி வாங்கும் செயலை தொடங்கி இருக்கிறார்கள். ஆதாரம் இருந்தால் நடவடிக்கை எடுக்கட்டும். தடுக்க மாட்டோம்.

தமிழகம் முழுவதும் நில அபகரிப்பு என்ற பெயரில் எந்தவித ஆதாரம் இல்லாமல் தி.மு.க.வினர் கைது செய்யப்பட்டு வருகிறார்கள். ஆதாரம் இருந்தால் நடவடிக்கை எடுக்கட்டும். நாங்கள் சந்திக்க தயார்.

தி.மு.க. என்பது பனங்காட்டு நரி. எந்த சலசலப்புக்கும் அஞ்சாது. அ.தி.மு.க. ஆட்சியை 6 மாதம் பொறுத்திருந்து பார்ப்போம் என்றுதான் நினைத்து இருந்தோம். ஆனால் ஒரு மாதத்திலே மக்களின் எதிர்ப்பை அரசு சம்பாதித்து உள்ளது.

தி.மு.க.வை அழிக்க நினைத்த எத்தனையோ பேர் தோற்றுவிட்டார்கள். தோல்விகளை சந்தித்தாலும் மீண்டு எழுந்து ஆட்சிக்கு வரும் இயக்கம் இது. பீனிக்ஸ் பறவையாக எழுந்து வருவோம்.

இவ்வாறு மு.க. ஸ்டாலின் பேசினார்.

கூட்டத்தில் மாவட்ட செயலாளர்கள் ஜெ. அன்பழகன் எம்.எல்.ஏ., வி.எஸ். பாபு, டி.கே.எஸ். இளங்கோவன் எம்.பி., மேயர் மா.சுப்பிரமணியன், அசன் முகமது ஜின்னா, முரளி உள்பட பலர் கலந்து கொண்டனர். கூட்டத்திற்கான ஏற்பாடுகளை மயிலை பகுதி செயலாளர் த. வேலு செய்திருந்தார்.

மாலை மலர்

என்ன ஆச்சு இவருக்கு ஏன் இப்படிக் கோபப் படுகிறார்..கொஞ்ச நாள் பொறுத்தால் எல்லாமே சரியாகி விடுமென்று தெரிந்தும் வீணான பேச்சு
நல்ல மனிதர் நா சறுக்குகிறார்.

தி.மு.க. என்பது பனங்காட்டு நரி. எந்த சலசலப்புக்கும் அஞ்சாது - மு.க.ஸ்டாலின் பேச்சு

இதில் ஏதோ உள்குத்து இருக்கிறது