3-வது டெஸ்ட் நாளை தொடக்கம்: இந்தியா தொடரை வெல்லுமா?

டொமினிகா, ஜூலை. 5-

இந்திய கிரிக்கெட் அணி வெஸ்ட் இண்டீசில் சுற்றுப்பயணம் செய்து விளையாடி வருகிறது. 20 ஓவர் போட்டியில் இந்தியா 16 ரன்னில் வெற்றி பெற்றது.5 ஒருநாள் போட்டிக்கொண்ட தொடரை இந்தியா 3-2 என்ற கணக்கில் கைப்பற்றியது.

இரு அணிகள் இடையேயான 3 டெஸ்ட் போட்டிக் கொண்ட தொடரில் கிங்ஸ்டனில் நடந்த முதல் டெஸ்டில் இந்தியா 63 ரன்னில் வெற்றி பெற்றது. பிரிட்ஜ்டவுனில் நடந்த 2-வது டெஸ்ட் “டிரா” ஆனது.

இந்தியா- வெஸ்ட் இண்டீஸ் அணிகள் மோதும் 3-வது மற்றும் கடைசி டெஸ்ட் போட்டி டொமினிக்காவில் நாளை (புதன்கிழமை) தொடங்குகிறது. இந்த டெஸ்டை “டிரா” செய்தாலே இந்தியா தொடரை கைப்பற்றும்.கடந்த டெஸ்டில் இந்தியாவுக்கு வெற்றி வாய்ப்பு இருந்தது. மழை மற்றும் போதிய வெளிச்சமின்மையால் இந்தியாவின் வெற்றி வாய்ப்பு பறிபோனது.

கடந்த டெஸ்டை போலவே இந்த டெஸ்டிலும் ஆடுகளம் வேகப்பந்து வீச்சுக்கு சாதகமாக இருக்கும். இதனால் பேட்ஸ்மேன்களுக்கு நெருக்கடியாக இருக்கும்.இந்திய அணியின் பேட்டிங்கை பொறுத்தவரை டிராவிட், லட்சுமணனை அதிகமாக நம்ப வேண்டி உள்ளது. அனுபவம் வாய்ந்த இருவரும் வெஸ்ட் இண்டீஸ் ஆடுகளத்துக்கு ஏற்றவாறு பொறுப்புடன் விளையாடி அணியை காப்பாற்றி உள்ளனர்.

இதனால் நாளைய டெஸ்டிலும் அவர்களது பங்களிப்பு முக்கியத்துவம் பெற்றதாக இருக்க வேண்டும். அதற்கு அடுத்த நிலையில் ரெய்னா உள்ளார். அவர் வெஸ்ட் இண்டீஸ் பந்துவீச்சை தாக்கு பிடித்து விளையாடுகிறார். தொடக்க வீரர்களில் தமிழகத்தை சேர்ந்த விஜய் மிகவும் மோசமாக விளையாடி வருகிறார்.

அவர் எந்த ஒரு இன்னிங்சிலும் நன்றாக விளையாடவில்லை. மற்றொரு தமிழக வீரரான அபினவ் முகுந்த் கடந்த டெஸ்டின் 2-வது இன்னிங்சில் பொறுப்புடன் விளையாடினார். கேப்டன் டோனி இரண்டு டெஸ்டிலும் சொதப்பினார். நாளைய போட்டிக்கான இந்திய அணியில் ஒரே ஒரு மாற்றம் இருக்கலாம் என்று எதிர்பார்க்கப்படுகிறது.

அபிமன்யூ மிதுனுக்கு பதிலாக முனாப்பட்டேல் இடம் பெறலாம் என்று தெரிகிறது. “டிரா” செய்தாலே தொடரை வெல்லலாம் என்பதால் அதற்கு ஏற்ற வகையில் இந்திய வீரர்கள் விளையாடுவார்கள்.வெஸ்ட் இண்டீஸ் அணியை பொறுத்த வரை தொடரை சமன் செய்ய நாளைய டெஸ்டில் வெற்றி பெற வேண்டிய நெருக்கடி உள்ளது.

ஒருநாள் தொடரை இழந்த அந்த அணி டெஸ்ட் தொடரை சமன் செய்ய கடுமையாக போராடும். மோசமான நிலையில் இருந்து வந்து அணியின் முன்னணி வீரர் சர்வான் இந்த டெஸ்டில் இருந்து நீக்கப்பட்டார்.

கடந்த சில தினங்களாக டொமினிக்காவில் மழை பெய்து வருகிறது. இதனால் இந்த டெஸ்ட் மழையால் பாதிக்கப்படலாம் என்று கருதப்படுகிறது. நாளைய டெஸ்ட் இந்திய நேரப்படி இரவு 7.30 மணிக்கு தொடங்குகிறது. டென் கிரிக்கெட் சேனலில் இந்தப்போட்டி நேரடியாக ஒளிபரப்பு செய்யப்படுகிறது.

இந்தியா: டோனி (கேப்டன்), முரளி விஜய், அபினவ் முகுந்த், டிராவிட், வீராட்கோலி, லட்சுமண், ரெய்னா, ஹர்பஜன்சிங், பிரவீண்குமார், இஷாந்த் சர்மா, அமித் மிஸ்ரா, முனாப்பட்டேல், பத்ரிநாத், அபிமன்யூ மிதுன், ஒஜா, பார்த்தீவ் பட்டேல்.

இந்தியா வெற்றி பெற வாழ்த்துக்கள் ..

சக்தே இந்தியா

மே.இந்திய தீவுகளுக்கு எதிரான மூன்றாவது மற்றும் கடைசி டெஸ்ட் போட்டியில் டாஸ் வென்ற இந்திய அணி மே.இந்திய தீவுகள் அணியை பேட்டிங் செய்ய பணித்தது.இதை அடுத்து ஆடிய மே.இந்திய தீவுகள் அணி முதல் இன்னிங்ஸில் அனைத்து விக்கெட்களையும் இழந்து 204 ரன்களை எடுத்தது இந்திய அணி தரப்பில் இஷாந் சர்மா 5 விக்கெட்களை வீழ்த்தினார்.பின்னர் களமிறக்கிய இந்திய அணி ஆட்டத்தின் மூன்றாம் நாளான இன்று 100 ரன்களை எடுத்து 2 விக்கெட்களை இழந்துள்ளது.அபினவ் முகுந்த் சர்வதேச டெஸ்ட் போட்டியில் முதல் 50 ரன்களை கடந்து ஆடிக் கொண்டிருக்கிறார் அவருடன் அனுபவ வீரர் லட்சுமனனும் களத்தில் உள்ளார்...
முகுந்த் முத்தான முதல் 100 ரன்களை தொட வாழ்த்துகிறேன்...