அ.தி.மு.க. பிரமுகர்கள் திகிலில்! நாற்காலிகள் ஆடுகின்றன!!

சென்னை, இந்தியா: அ.தி.மு.க.வில் ஒரு நடைமுறை இருக்கின்றது. ஒருவர் இரவு படுக்கைக்குச் செல்லும்போது என்ன பதவியில் இருந்தாரோ, மறுநாள் படுக்கையிலிருந்து எழும்போது அந்தப் பதவி இருக்கும் என்பது நிச்சயமில்லை! முதல்வர் ஜெயலலிதா எதிர்க்கட்சித் தலைவராக இருந்தபோதே இந்த நடைமுறை இருந்தது.

இப்போது இது, சூப்பர் வேகத்தில்!

முதல்வராகி 2 மாதங்களுக்குள், 1 அமைச்சர், 8 மாவட்டச் செயலாளர்களின் பதவிகளைப் பறித்திருக்கிறார் ஜெயலலிதா. இதனால் அரண்டு போயிருக்கின்றனர் அ.தி.மு.க. பிரமுகர்கள்.

அ.தி.மு.க. அமைச்சர்களைக் கண்காணிக்கவென்றே சென்னையில் ஒரு தனி டீம் உண்டு. மாவட்டம்தோறும் வேறு டீம்கள் உள்ளன. அவர்கள் செய்வதெல்லாம், மாவட்டச் செயலாளர்களையும், இதர பிரமுகர்களையும் கண்காணிப்பதுதான். இதைத் தவிர அ.தி.மு.க. பிரமுகர்களைப் பற்றிய உளவுத்துறை ரிப்போர்ட்களும் முதல்வரின் மேஜைக்கு தவறாமல் வந்துவிடும்.

உளவுத்துறையின் சதர்ன் டிவிஷன் சென்டரில் இருந்து வந்த உளவுத்துறை அறிக்கை ஒன்றுதான், நெல்லை மாநகர் மாவட்டச் செயலாளரான பாப்புலர் முத்தையாவின் பதவிக்கு உலை வைத்தது.இந்த உளவு அறிக்கையில் மதுவிற்பனை விவகாரம் பற்றி விலாவாரியாகக் குறிப்பிடப்பட்டுள்ளது.

நெல்லை மாவட்டத்தில் கடந்த தி.மு.க. ஆட்சிக் காலத்தில் டாஸ்மாக் பார்களை தி.மு.க-வைச் சேர்ந்த நபர்களே வைத்திருந்தனர். இவர்களில் சிலருக்கும் முத்தையாவுக்கும் இடையே முன்பே ஒரு அன்டர்ஸ்டான்டிங் இருந்துவந்தது. இப்போது ஆட்சி மாறியபின், டாஸ்மாக் பார்கள் அ.தி.மு.க.வினரின் கைகளுக்கு வரும் என்று கட்சிக்காரர்கள் பலரும் ஆவலுடன் காத்திருக்க, மீண்டும் அவை தி.மு.க. ஆட்களிடமே போய்ச் சேர்ந்துள்ளன.

அதன் பின்ணியில் இருந்தது நெல்லை மா.செ., பாப்புலர் முத்தையா என்றது உளவு அறிக்கை! அத்துடன் முத்தையாவின் பதவி காலி!!

பதவி பறிக்கப்படும் ஒவ்வொருவருக்கும், இப்படி ஒவ்வொரு காரணங்கள் உள்ளன. சிலருக்கு சொந்தப் பகை காரணங்கள். வேறு சிலருக்கு ஈகோ பிரச்சினைகள். ஓரிரு துரதிஷ்டசாலிகள் எந்தவித காரணமும் இல்லாமல், ‘போட்டுக் கொடுக்கப்பட்டு’ தூக்கப்படுவதும் அவ்வப்போது நடப்பதுண்டு!


வி வி