ஸ்தம்பித்தது தெலுங்கானா : சந்திரசேகர ராவ், விஜயசாந்தியும் ராஜினாமா!

நாற்பத்தெட்டு மணி நேர முழு அடைப்புப் போராட்டத்தால், முற்றிலும் இயல்பு வாழ்க்கை முடங்கிய தெலுங்கானா பகுதி வெறிச்சோடிக் காணப்படுகிறது. இந்நிலையில், டிஆர்எஸ் கட்சித்தலைவர் சந்திரசேகர்ராவ், விஜய சாந்தி இருவரும் தங்களது எம்பி பதவிகளை ராஜினாமா செய்துள்ளனர். தனித் தெலுங்கானா மாநிலக் கோரிக்கையை வலியுறுத்தி, அப்பகுதி முழுவதும் முழு அடைப்புப் போராட்டம் நடைபெற்று வருகிறது. இதனால், தெலுங்கானா பகுதியைச் சேர்ந்த 10 மாவட்டங்களில் இயல்பு வாழ்க்கை முற்றிலும் முடங்கியது. பள்ளிகள், கல்லூரிகள், கடைகள், திரையரங்குகள் அனைத்தும் மூடப்பட்டன. பாதுகாப்புக்காக 72 கம்பெனி துணை ராணுவம் வரவழைக்கப்பட்டுள்ளது.

உஸ்மானியா பல்கலைக் கழகம் பகுதியில் பாதுகாப்புக்காக துணை ராணுவப் படையினர் குவிக்கப்பட்டுள்ளனர். அதே போல், தெலுங்கானா பகுதி முழுவதும் துணை ராணுவப் படை குவிக்கப்பட்டுள்ளது. 48 மணி நேர முழு அடைப்புப் போராட்டத்தால், தெலுங்கானா பகுதி முழுவதும் மக்கள் நடமாட்டம் இன்றி, சாலைகள் வெறிச்சோடிக் காணப்படுகின்றன. இந்நிலையில், தெலுங்கானா கோரிக்கையை வலியுறுத்தும் வகையில் தெலுங்கானா ராஷ்டிரிய சமிதிக் கட்சித் தலைவர் சந்திரசேகர ராவ் தமது மக்களவை உறுப்பினர் பதவியை ராஜினாமா செய்துள்ளார். அவரது கட்சியை சேர்ந்த நடிகை விஜயசாந்தியும் தமது எம்பி பதவியை ராஜினாமா செய்துள்ளனர். இருவரும் மக்களவைத் தலைவர் மீராகுமாருக்கு தங்களது ராஜினாமா கடிதங்களை அனுப்பி வைத்துள்ளனர். இதனிடையே, தெலுங்கானா கூட்டுநடவடிக்கை குழுவினர், வரும் 8 மற்றும் 9 தேதிகளில் ரயில் மறியல் போராட்டம் நடத்தப் போவதாக அறிவித்துள்ளனர். இதனால், ரயில் சேவையும் பாதிக்கும் நிலை ஏற்பட்டுள்ளது.



st