கறுப்பு பண விவகாரம் விசாரிக்க சிறப்பு குழு ; சுப்ரீம் கோர்ட் இன்று பிறப்பித்தது ஒரு புதிய ஆணை

புதுடில்லி: நாட்டில் உள்ள கறுப்பு பணத்தை மீட்பதில் எழுந்துள்ள சிக்கல்கள் குறித்து மத்திய அரசுக்கு எதிர்கட்சிகள் நெருக்கடி கொடுத்து வந்த இந்த தருணத்தில் சுப்ரீம்கோர்ட் அதிரடியாக இந்த விவகாரம் குறித்து விசாரிக்க ஒரு சிறப்பு புலனாய்வுக்குழுவை Special Investigation Team (SIT) நியமித்து உத்தரவிட்டுள்ளது.

நாட்டில் உள்ள பதுக்கல்காரர்கள் பலர் வெளிநாடுகளில் கள்ளப்பணத்தை போட்டு வைத்துள்ளனர். இந்த பணத்தை மீட்டு கொண்டு வந்தாலே பல மாநில வளர்ச்சி நிதிக்கு பயன்படுத்த முடியும் என்று சமீபத்திய பொருளாதார ஆய்வறிக்கை தெளிவுப்டுத்தியது. மேலும் கறுப்பு பணவிவகாரம் தொடர்பாக யோகாகுரு பாபா ராம்தேவ் பெரும் உண்ணாவிரதம் போராட்டத்தை துவக்கினார்.

தாய்த்திருநாட்டின் வரி ஏய்ப்பு பணம் வெளிநாட்டில் டிபாசிட் செய்யப்படுவதை கண்டறிந்து மீட்டு கொண்டு வர உரிய நடவடிக்கை எடுக்கப்பட வேண்டும் என கோரும் பொதுநல வழக்கு பிரபல வக்கீல் ராம்ஜெத்மலானி சுப்ரீம் கோர்ட்டில் தாக்கல் செய்தார். இந்த வழக்கை விசாரித்து வரும் நீதிபதிகள் இது தொடர்பான விஷயத்தில் விளக்கம் அளிக்க மத்திய அரசு ஏற்கனவே நோட்டீஸ அனுப்பி இருந்தது. இந்த விசாரணை இன்று நீண்ட விடுமுறைக்கு பின்னர் கோர்ட் துவங்கியதும் நடந்தது.

மனுவை விசாரித்த நீதிபதிகள் சுதர்சன் ரெட்டி மற்றும் நிஜ்ஜார் அடங்கிய பெஞ்ச் இன்று பிறப்பித்த உத்தரவில் ; கறுப்பு பணம் தொடர்பாக விசாரிக்க ஓய்வு பெற்ற சுப்ரீம் கோர்ட் நீதிபதி ஜீவன்ரெட்டி தலைமையில் ஒரு குழுவை நியமித்து ஆணை பிறப்பித்துள்ளனர். இந்த விவகாரத்தில் மத்திய அரசு மிக மெத்தனமாக இருந்ததை கோர்ட் குறைகூறியது. .இது தொடர்பான விசாரணையை தீவிரப்படுத்தவும் நீதிபதிகள் வலியுறுத்தியுள்ளனர்.

இக்குழுவினர் இந்த விவகாரம் தொடர்பான விஷயங்கள் குறித்து விசாரித்து முக்கிய விஷயங்களை வெளியுலகிற்கு கொண்டு வருவர் என எதிர்பார்க்கப்படுகிறது.

வெளிநாட்டில் பதுக்கப்பட்டுள்ள பணத்தை அறிந்து கொள்வதிலும், மீட்பதிலும் சர்வதேச அளவிலான ஒப்பந்தங்கள் மீறல் போக்கை கடைபிடிக்க முடியாது என மத்திய நிதிஅமைச்சர் பிரணாப்முகர்ஜி கூறியிருந்தார். சீலிடப்பட்ட கவரில் வெளிநாட்டில் பணம் போட்டவர்கள் பட்டியலை வேண்டுமானால் கோர்‌ட்டுக்கு தருகிறோம் என்றும் கூறியிருந்தார். இந்நிலையில் சுப்ரீம்கோர்ட் உத்தரவின் மூலம் கறுப்புபண விவகாரத்தில் முன்னேற்றம் காண முடியும் என எதிர்பார்க்கப்படுகிறது.