மலேசியாவில் 'பெர்சே' இயக்கம். பாக்ரி எம்பியும் மேலும் ஐவரும் கைது செய்யப்பட்டனர்

டிஎபி பாக்ரி எம்பி எர் தெக் ஹுவா, ஜோகூர் டிஎபி இளைஞர் பிரிவுத் தலைவர் தான் ஹொங் பின், மற்றும் நால்வர் இன்று கைது செய்யப்பட்டு ஜோகூரிலுள்ள தாமான் பெலாங்கி போலீஸ் நிலையத்துக்குக் கொண்டு செல்லப்பட்டனர்.

‘பெர்சே’ நடவடிக்கைகளுக்கான அறிகுறியாக எது இருந்தாலும் அதற்கு எதிராக போலீசார் மேற்கொண்டு வரும் நடவடிக்கையின் இன்னொரு அத்தியாயம் அது எனக் கருதப்படுகிறது.

தாமான் பெலாங்கி சந்தைக் கூடத்தில் இன்று காலை தாங்கள் இருந்ததற்கும் அங்கு மேற்கொண்ட நடவடிக்கைகளுக்கும் ஜுலை 9ம் தேதிக்குத் திட்டமிடப்பட்டுள்ள பெர்சே 2.0 பேரணிக்கும் எந்தச் சம்பந்தமும் இல்லை என தொடர்பு கொள்ளப்பட்ட போது எர் கூறினார்.

தாமும் தானும் ‘ஒரு தூய்மையான நாடு, மக்கள் அதிர்ஷ்டசாலிகள்’ ( “Negara Bersih, Rakyat bertuah”) என்னும் கருப்பொருளைக் கொண்ட ‘கொத்தோங் ரோயோங் துப்புரவு இயக்கத்தையே நடத்திக் கொண்டிருந்ததாக அவர் சொன்னார்.

“போலீசாட் மிகவும் உணர்ச்சி வசப்படுவதாக நான் எண்ணுகிறேன். எங்கள் கருபொருள் ‘ஒரு தூய்மையான நாடு, மக்கள் அதிர்ஷ்டசாலிகள்’ என்பதாகும். ஆனால் அந்த விளக்கத்தைப் போலீசார் ஏற்றுக் கொள்ளவில்லை,” என அந்த டிஎபி தலைவர் குறிப்பிட்டார்.

அவர்கள் அணிந்திருந்த மஞ்சள் டி சட்டைகள், பெர்சே டி சட்டைகளிலிருந்து மாறுபட்டதாக வடிவமைக்கப்பட்டிருந்ததும் கூட அந்த அறுவருக்கும் உதவவில்லை. பெர்சே டி சட்டையை அணிந்திருந்ததற்காக நூற்றுக்கும் மேற்பட்ட அரசியல்,சமூகப் போராளிகள் கடந்த ஒரு வாரமாக நாடு முழுவதும் கைது செய்யப்பட்டுள்ளனர்.

“அந்த இயக்கம், கோலாலம்பூரில் ஜுலை 9க்கு திட்டமிடப்பட்டுள்ள பெர்சே கூட்டத்துக்கும் எந்தத் தொடர்பும் இல்லை என்றும் கூட நாங்கள் குறிப்பிட்டோம்,” என எர் சொன்னார்.

ஆனால் அந்தக் குழுவின் நடவடிக்கைகள் பற்றிக் கேள்விப்பட்டவுடன் சந்தைக் கூடத்துக்கு விரைந்த 20 போலீஸ் அதிகாரிகள் அதனை நம்பவில்லை.

ஜோகூர் டிஎபி இளைஞர் பிரிவு உதவித் தலைவர் ஜேசன் ஜோசோப், மாநில மத்தியக் குழு உறுப்பினர் சென் கா எங், புக்கிட் இண்டா கிளைச் செயலாளர் யான் பூன் மெங், அரசியல் கல்விப் பிரிவுத் துணை இயக்குநர் தாங் சீ கியா ஆகியோர் கைது செய்யப்பட்ட மற்றவர்கள் ஆவர்.


மலேசியாஇன்று

அரண்டவன் கண்ணுக்கு இருண்டதெல்லாம் பேய்.... அரசாங்கம் மஞ்சள் வர்ணத்தைக் கண்டு அலறுகிறது.