பெர்சே, சட்ட விரோத அமைப்பு என ஹிஷாமுடின் பிரகடனம்

பெர்சே 2.0 என்று அழைக்கப்படும் தூய்மையான நியாயமான தேர்தல்களுக்கான கூட்டணி நேற்று தொடக்கம் சட்ட விரோத அமைப்பு என பிரகடனம் செய்யப்பட்டுள்ளது. சங்கப் பதிவதிகாரி அந்தத் தகவலை இன்று அறிவித்தார்.

1966ம் ஆண்டுக்கான சங்கச் சட்டத்தின் 5வது பிரிவின் கீழ் உள்துறை அமைச்சர் ஹிஷாமுடின் ஹுசேன் அந்தப் பிரகடனத்தை செய்துள்ளதாக சங்கப் பதிவதிகாரி அப்துல் ரஹ்மான் ஒஸ்மான் விடுத்த அறிக்கை கூறியது.

பெர்சே 2.0 பதிவு செய்யப்பட்ட அமைப்பு அல்ல என்பது விசாரணைகள் மூலம் தெரிய வந்துள்ளதாக அவர் சொன்னார்.

பெர்சே 2.0 தீவிரமாக செயல்படுவதாகவும் அதனால் மக்களிடையே பதற்ற நிலை உருவாகியிருப்பதாகவும் அந்த அறிக்கை குறிப்பிட்டது.

அரசாங்கத்தை வீழ்த்தும் நோக்கமுடைய பிரச்சாரத் துண்டுப் பிரசுரங்களை அந்தக் கூட்டணி விநியோகம் செய்து வருவதாகவும் அது தெரிவித்தது.

அதன் நடவடிக்கைகள் நாட்டின் தோற்றத்துக்கு பாதகமான தாக்கத்தைக் கொண்டு வந்துள்ளது என்றும் அத்துடன் பொது ஒழுங்கு, பாதுகாப்பு, பொருளாதார வளப்பம், நாட்டின் இறையாண்மை ஆகியவற்றுக்கும் மருட்டலைக் கொண்டு வந்துள்ளது என்றும் மக்களிடையே நிலவும் ஒற்றுமையையும் சீர்குலைத்துள்ளது என்றும் அந்த அறிக்கை கூறியது.

2008ல் ஹிண்ட்ராப் சட்டவிரோதமானது என அறிவிக்கப்பட்டது



தூய்மையான நியாயமான தேர்தல்களை வலியுறுத்தி ஜுலை 9ம் தேதி கோலாலம்பூர், சபா, சரவாக் ஆகியவற்றில் பேரணிகளை நடத்த பெர்சே 2.0 திட்டமிட்டுள்ளது.

2008ம் ஆண்டு அக்டோபர் மாதம் ஹிண்ட்ராப் என்ற இந்து உரிமை நடவடிக்கைக் குழு சட்டவிரோத அமைப்பு எனப் பிரகடனம் செய்யப்பட்டது.

ஹிண்ட்ராப் அமைப்பு, சட்டவிரோத நோக்கங்களுக்கு பயன்படுத்தப்படுவதை ஆதாரங்கள் காட்டியதாலும் பொது ஒழுங்கிற்கும் தார்மீக நெறிகளுக்கும் மருட்டலாக இருந்ததாலும் அதனை சட்டவிரோத அமைப்பு எனப் பிரகடனம் செய்வது என முடிவு செய்யப்பட்டதாக அப்போதைய உள்துறை அமைச்சர் சையட் ஹமிட் அல்பார் கூறினார்.

2007ம் ஆண்டு மலேசிய இந்தியர்களுக்கு நல்ல வாய்ப்புக்கள் கிடைக்க வேண்டும் எனக் கோரி ஹிண்ட்ராப் மாபெரும் பேரணியை நடத்தியது. அதற்கு இரண்டு வாரங்கள் முன்னதாக நிகழ்ந்த முதலாவது பெர்சே பேரணியில் 40,000 பேர் பங்கு கொண்டனர்.

மலேசியாஇன்று