அலி ருஸ்தாம்: பெர்சே 2.0 வின் தலைவர் எஸ்.அம்பிகாவின் குடியுரிமை பறிக்கப்பட வேண்டும்

பெர்சே 2.0 வின் தலைவர் எஸ்.அம்பிகாவின் குடியுரிமையை மத்திய அரசு பறிக்க வேண்டும் என்று மலாக்கா முதலமைச்சர் அலி ருஸ்தாம் கேட்டுக்கொண்டார்.

“நாட்டில் குழப்பத்தை ஏற்படுத்துவதில் தீவிரமாக ஈடுபாட்டுடன் செயல்படுபவர்” குடியுரிமைப் பெற தகுதியற்றவர் என்று அலி மலேசியன் தேசிய சிலாட் சம்மேளத்தின் கூட்டத்திற்கு தலைமையேற்ற பின்னர் செய்தியாளர்களிடம் கூறினார்.

“சில உறுப்பினர்கள் அவருடைய குடியுரிமையைப் பறிக்க வேண்டும் அல்லது அவரை நாடு கடத்த வேண்டும் என்று கேட்டுக்கொண்டனர்.

“பல உயிர்கள் பலியாவதைவிட ஒருவரை இழப்பது மேலானது”, என்று கூறிய அவர், “அவருக்கு எதிராக மிகக் கடுமையான தண்டனை அளிக்க வேண்டும்” என்று மத்திய அரசைக் கேட்டுக்கொள்வது வெறும் ஆலோசனைதான் என்று மேலும் கூறினார்.

“இப்போது அவர் ஒரு ஹீரோவாக விரும்புகிறார். நமக்கு ஜனநாயகம் வேண்டுமென்றால் இதர நாடுகள் செய்வதுபோல் நாம் ஆர்ப்பாட்டங்கள் செய்ய வேண்டுமென்று அவர் விரும்பினால், அவர் இன்னொரு நாட்டின் குடிமகளாக இருக்கட்டும்”, என்று அம்னோவின் முன்னாள் உதவித் தலைவரான அலி கூறினார்.

கம்போங் பாரு, சிளப் சுல்தான் சுலைமானில் இன்று பின்னேரத்தில் நடந்த ஓர் ஆவேசமான செய்தியாளர் கூட்டத்தில் ஒரு பெசாகா உறுப்பினர் அவர் ஒரு துரோகி என்று அங்கிருந்த உறுப்பினர்களின் ஆரவாரத்திற்கிடையே கத்தினார்.

தேசிய அளவிலான 300 க்கு மேற்பட்ட சிலாட் அமைப்புகளின் மத்திய அமைப்பான பெசாகா நான்கு மில்லியன் சிலாட் உறுப்பினர்களைக் கொண்டிருப்பதாக கூறிக்கொள்கிறது.

ஜூலை 9 இல் நடக்கவிருக்கும் பேரணியில் பெர்சே ஆர்வலர்களுடன் சிலாட் விளையாட்டாளர்கள் போர் தொடுப்பார்கள் என்று இதற்கு முன்பு பெர்சாத்துவான் செனி சிலாட் லின்சா மலேசியாவின் மகாகுரு ஒமர்டின் மௌஜு கூறியிருந்தார்.


“அம்பிகா அனத்துக்கும் பொறுப்பேற்க வேண்டும்”

இசெய்தியாளர் கூட்டத்தில் இருந்த ஒமருடின் பெசாகா உறுப்பினர்கள் பெர்சே பேரணி நடக்கும் அதே நேரத்தில் நடக்கவிருக்கும் அம்னோ இளைஞர்களின் பேரணியுடன் சேர்ந்து “இஸ்தானா நெகாராவை தற்காப்பதற்காக” நடப்பார்கள் என்று கூறினார்.

“ஆனால், அவர் பேரணியை நடத்தவில்லை என்றால், நாங்களும் போக மாட்டோம்”, என்றாரவர்.

ஆனால், குழப்பங்கள் ஏற்பட்டால், அவர்களையோ (பெசாகா உறுப்பினர்கள்) மக்களையோ குறைகூறக்கூடாது என்று அலி கூறினார்.

“மே 13 மீண்டும் ஏற்படலாம் என்று நான் கவலையடைகிறேன். இது நமது வரலாறு. இதனை நாம் முன்பு சந்தித்துள்ளோம். ஆகவே இதனை நாம் சாதாரணமானதாக எடுத்துக்கொள்ளக்கூடாது. இளையத் தலைமுறையினருக்கு இது தெரியாமல் இருக்கலாம்.

“பெசாகா அதன் உறுப்பினர்களின் உணர்ச்சியைக் கட்டுப்படுத்த முடியாமல் போகலாம். இப்போது நடந்த கூட்டத்தில் உறுப்பினர்கள் உணர்வுப் பிளம்பாக இருந்தனர். யாருக்கும் ஏதாவது நடந்தால், எங்களைக் குறை சொல்லக்கூடாது. அம்பிகா அனைத்திற்கும் பொறுப்பேற்க வேண்டும்”, என்றாரவர்.

மலேசியாஇன்று