தினமலரில் படிதது

சினிமா டைரக்டர் பாக்யராஜ்: இனிமேல், நான் அளந்து தான் பேசுவேன். அதிகம் பேசமாட்டேன். "மைக்'கைப் பிடித்துப் பேசாமல் இருப்பது நல்லது என்ற முடிவுக்கு வந்திருக்கிறேன். நானே இப்படி என்றால், வடிவேலு நிலைமையை கொஞ்சம் யோசித்துப் பாருங்கள்.

டவுட் தனபாலு: இதை நீங்க, ஆட்சி மாறுறதுக்கு முன்னால யோசிச்சிருக்கணும்... ஆட்சி மாறின பிறகு பேசுறதுல அர்த்தமில்லை... திரும்பவும் தி.மு.க.,வே ஆட்சிக்கு வந்திருந்தா இப்படி பேசியிருப்பீங்களா...? "நான் பிரசாரம் பண்ணதால தான் ஆறாவது முறை முதல்வரானார்'னு சொல்லியிருக்க மாட்டீங்களா...?

பா.ஜ., எம்.பி.,யும், பாலிவுட் நடிகையுமான ஹேமமாலினி: ஜல்லிக்கட்டு என்ற பெயரில், காளைகள் கொடுமைக்கு ஆளாக்கப்படுகின்றன. ஜல்லிக்கட்டு என்பது, விலங்குகளை கொடுமைப்படுத்துவதை தடுக்கும் சட்ட விதிகளை மீறும் நிகழ்வாக உள்ளது. பொழுதுபோக்கிற்காக, காளைகள் கொடுமைப் படுத்தப்படுகின்றன.

டவுட் தனபாலு: யம்மா... நீங்க, கட்சிக்குப் புதுசா வந்தவங்க... உங்களுக்கு, தமிழக பா.ஜ.,வின், "அடிப்படை கொள்கைகள்' தெரியாமல் இருக்கலாம்... ஜல்லிக்கட்டு விவகாரத்துல அவங்க நிலைப்பாடு என்னன்னு பொன்.ராதாகிருஷ்ணன்ட்ட கேட்டு, அதுக்கப்பறம் உணர்ச்சிவசப்படுங்க...!

உணவுப் பொருள் கடத்தல் தடுப்புப் பிரிவு கூடுதல் டி.ஜி.பி., ராதாகிருஷ்ணன்: ரேஷன் அரிசி கடத்துபவர்கள், அவர்களுக்கு உடந்தையாக இருப்பவர்கள் மீது கடும் நடவடிக்கை எடுக்கப்பட்டு வருகிறது. இதுவரை, 29 பேர், குண்டர் சட்டத்தில் சிறையில் அடைக்கப்பட்டுள்ளனர்.

டவுட் தனபாலு: இந்த, "இதுவரை'ங்கிற வார்த்தைக்கு என்ன அர்த்தம்...? அ.தி.மு.க., ஆட்சிக்கு வந்த பிறகா... நீங்க பதவி ஏத்த பிறகா... இவ்ளோ பேர் இப்போ கைதாகிறாங்கன்னா, கடந்த ஆட்சியில போலீஸ்காரங்க என்ன பண்ணாங்க...?

பா.ஜ., மூத்த தலைவர் ஜஸ்வந்த் சிங்: தொலைத் தொடர்புத் துறை முன்னாள் அமைச்சர் ராஜாவும், தி.மு.க., எம்.பி., கனிமொழியும், ஸ்பெக்ட்ரம் வழக்கு விசாரணையில் குறுக்கிடக்கூடும் என்ற காரணத்துக்காக, அவர்களுக்கு ஜாமின் மறுக்கப்பட்டது சரியல்ல. என் தனிப்பட்ட கருத்து இது; என் கட்சி சார்பான கருத்து அல்ல.

டவுட் தனபாலு: எதுக்கு அப்படி சொல்றீங்க...? "என் கட்சியின் கருத்தும் கூட'ன்னு சொல்லி வைங்க... காங்கிரஸ் கூட்டணி கசந்துபோச்சுன்னா, உங்களோட தி.மு.க., கைகோர்க்கிறதுக்கு நல்ல வாய்ப்பா இருக்கும்...!