சினிமாவில் பேசும் வசனத்தை, சீமான் மேடையில் பேசுகிறார்: யுவராஜா

spselvam · spselvam Fri Jul 01, 2011 12:34 pm

சீமான் என்றாவது ஆரோக்கியமான கருத்து சொல்லி இருப்பாரா? சினிமாவில் பேசும் வசனத்தை, சீமான் மேடையில் பேசுகிறார் என்று இளைஞர் காங்கிரஸ் மாநில தலைவர் யுவராஜா கூறியுள்ளார்.

உள்ளாட்சி தேர்தலில் இளைஞர் காங்கிரஸ் சார்பில் போட்டியிட விருப்பம் உள்ளவர்களிடம், விருப்ப மனுக்கள் பெறுவது குறித்து கூட்டம் கரூரில் நடைபெற்றது. இதில் கலந்து கொண்ட இளைஞர் காங்கிரஸ் மாநில தலைவர் யுவராஜா பின்னர் செய்தியாளர்களிடம் பேசுகையில்,

தமிழ் நாட்டில் அமைந்து உள்ள புதிய ஆட்சியில் சட்டம் ஒழுங்கு சரிபார்க்கப்படும் என்று கூறியது நல்ல விசயம்தான். ஆனால் விடுதலை புலியை ஆதரித்து பேசிய சீமானை ஏன் கைது செய்யவில்லை.

கடந்த அ.தி.மு.க. ஆட்சியில் தடை செய்யப்பட்ட இயக்கத்திற்கு ஆதரவாக பேசிய வைகோ கைது செய்யப்பட்டார். எனவே முதல் அமைச்சர் ஜெயலலிதா தனிக்கவனம் செலுத்தி சீமானை கைது செய்து நடவடிக்கை எடுக்க வேண்டும். இல்லை என்றால் இளைஞர் காங்கிரஸ் சார்பில் விரைவில் தமிழகம் முழுவதும் போராட்டம் நடத்துவோம்.

இலங்கை தமிழர்களுக்கு பல்வேறு உதவிகள் செய்யப்பட்டு வருகிறது. சீமான் என்றாவது ஆரோக்கியமான கருத்து சொல்லி இருப்பாரா? சினிமாவில் பேசும் வசனத்தை, சீமான் மேடையில் பேசுகிறார்.

இலங்கை அதிபர் ராஜபக்சேவை போர்க் குற்றவாளியாக அறிவிக்க வேண்டும். கச்சத் தீவை மீட்க வேண்டும் என்பனவற்றில் எங்களுக்கு எந்தவிதமான ஆட்சேபனையும் இல்லை. தூத்துக்குடி கொழும்பு இடையிலான கப்பல் போக்குவரத்து தமிழர்களுக்கு இணைப்புப் பாலமாக இருக்கும் .

சமச்சீர் கல்வி திட்டம், மெட்ரோ ரெயில் திட்டம் நல்ல திட்டங்கள் ஆகும். எனவே அந்த திட்டங்கள் தொடர வேண்டும்.

உள்ளாட்சி தேர்தலில் போட்டியிட விருப்பம் உள்ளவர்களிடம் மனுக்கள் பெற்று வருகிறோம். தமிழகம் முழுவதும் வருகிற 8ந் தேதி வரை இந்த பணி நடைபெறும். இதுவரை 2,400 மனுக்கள் பெற்று உள்ளோம். இனிவரும் காலங்களில் எந்த தேர்தலிலும் காங்கிரஸ் கட்சி வலிமையுடன் இருக்க வேண்டும். அதன்படி வருகிற உள்ளாட்சி தேர்தலில் காங்கிரஸ் கட்சி தனித்து போட்டியிட வேண்டும். இந்த கோரிக்கையை மேலிடத்திற்கு பரிந்துரை செய்ய உள்ளோம் என்றார்.
நன்றி: நக்கீரன்