இருளில் மூழ்கியது: சென்னையில் 14 இடங்களில் நள்ளிரவில் சாலை மறியல்

சென்னை, ஜூலை. 1-

சென்னை நகரில் ஒரு மணி நேரமும், மற்ற மாவட்டங்களில் 2 மணி நேரமும் மின்வெட்டு அமலில் உள்ளது. தற்போது சென்னை நகரிலும், சுற்றுப்புறங்களிலும் வள்ளூர் அனல்மின் நிலையத்துக்கு பாதை அமைக்கும் பணி நடைபெறுகிறது. இதன் காரணமாக கடந்த 27-ந்தேதி முதல் வருகிற 10-ந்தேதி வரை கூடுதலாக மேலும் ஒரு மணி நேரம் மின்வெட்டு இருக்கும் என்று அறிவிக்கப்பட்டுள்ளது.

இந்த நிலையில் சென்னை நகரின் பல பகுதிகளில் நேற்று காலையும் மின்சாரம் தடைபட்டது. வடசென்னை பகுதியில் தண்டையார் பேட்டை, புது வண்ணாரப்பேட்டை, பெரம்பூர் மற்றும் தலைமை செயலகம், உயர்நீதிமன்றம், பாடி, கொரட்டூர் பகுதிகளில் காலை முதல் இரவு 8 மணி வரை மின்சாரம் இல்லை.

நகரின் சில பகுதிகளில் 4 மணி நேரமும் பல இடங்களில் 6 மணி நேரமும் மின்சாரம் வரவில்லை. இரவிலும் நீண்ட நேரம் மின்சாரம் தடைபட்டது. எனவே அந்த பகுதிகளில் உள்ள பொதுமக்கள் சாலை மறியலில் ஈடுபட்டனர்.

பெரம்பூரில் இரவு பொது மக்கள் சாலைமறியலில் ஈடுபட்டு அரசு பஸ்களை சிறை வைத்தனர். மண்ணடியை சேர்ந்தவர்கள் ஐகோர்ட்டு அருகே இரவில் மறியல் செய்தார்கள். கொளத்தூர் பெரியார் நகரிலும் இதுபோன்று போராட்டம் நடந்தது.

நேற்று இரவு மட்டும் சென்னையில் வியாசர்பாடி, எம்.கே.பி.நகர், ஓட்டேரி, யானைகவுனி உள்பட 14 இடங்களில் மின்தடையை கண்டித்து மறியல் போராட்டம் நடந்தது.

நேற்று வள்ளூர் அனல் மின்நிலைய மின் தொடர்பாதை அமைக்கும் பணியின்போது மின்சாரம் நிறுத்தப்பட்டது. அப்போது ஏற்பட்ட திடீர் கோளாறு காரணமாக மணிக்கு 230 கிலோ வாட் துணை மின்நிலையத்திலும் பின்னர் பேசின் பிரிட்ஜ், எண்ணூர், மயிலாப்பூர், துணைமின் நிலையங்களிலும் பழுது ஏற்பட்டது.

இதனால் சில இடங்களில் மின்சாரம் “சப்ளை” செய்ய முடியாத நிலை ஏற்பட்டது. பின்னர் இது சரி செய்யப்பட்டு மின்சாரம் வழங்கப்பட்டது. “மின்தடை” ஏற்பட்ட போது பொதுமக்கள் தெரிவித்த புகார்களுக்கு மின் நிலைய அதிகாரிகள் சரியாக பதில் சொல்லவில்லை. புகார் செய்யும் போன்கள் துண்டிக்கப்பட்டிருந்தன என்று பலர் குறை கூறினார்கள்.

அறிவிக்கப்படாத மின் தடையால் பெரிதும் அவதிப்பட்டதாகவும், இதற்கு மின்சார வாரியம் எந்த பதிலும் சொல்லாததால் போராட வேண்டிய நிலை வந்தது என்றும் பொதுமக்கள் கூறினார்கள். அவர்களை போலீசார் சமாதானப்படுத்தினார்கள்.