ஜூலை 2ல் காங்., தலைவர் சோனியா - அன்னா ஹசாரே சந்திப்பு

புதுடில்லி: லோக்பால் மசோதா விவகாரம் தொடர்பாக, காங்கிரஸ் தலைவர் சோனியாவை நேற்று சந்திக்கவுள்ளதாக, காந்தியவாதியான அன்னா ஹசாரே தெரிவித்திருந்தார். ஆனால், அதன்படி சந்திப்பு நடக்கவில்லை. நாளை (2ம் தேதி) ஹசாரேயே சந்திக்க சோனியா நேரம் ஒதுக்கிக் கொடுத்துள்ளதாக கூறப்படுகிறது.

"பிரதமர் பதவி வகிப்போரையும், லோக்பால் வரம்பிற்குள் கொண்டு வர வேண்டும்' என்பது உள்ளிட்ட, தங்களது கோரிக்கைக்கு ஆதரவு திரட்டுவதற்காக, காந்தியவாதியான அன்னா ஹசாரே தலைமையிலான குழுவினர், அரசியல் கட்சி தலைவர்களை சந்தித்து பேசி வருகின்றனர். பா.ஜ., தலைவர் அத்வானி, மார்க்சிஸ்ட் பொதுச் செயலர் பிரகாஷ் கராத் ஆகியோரை ஏற்கனவே சந்தித்து பேசி விட்டனர். காங்கிரஸ் தலைவர் சோனியாவை நேற்று சந்தித்து பேச உள்ளதாக, அன்னா ஹசாரே தெரிவித்திருந்தார். ஆனால், நேற்று அவர்களின் சந்திப்பு நடக்கவில்லை. இது குறித்து காங்கிரஸ் வட்டாரங்கள் கூறுகையில், "யாரையும் சந்திப்பதற்கு, சோனியா இன்று (நேற்று) நேரம் ஒதுக்கவில்லை. எனவே, அன்னா ஹசாரேயுடன் சந்திப்பு நடப்பதற்கு வாய்ப்பு இல்லை' என்றனர். ஹசாரேயை சந்திக்க நாளை சோனியா நேரம் ஒதுக்கியுள்ளார். அன்றைய தினம் இருவரின் சந்திப்பு நடைபெறும் என்றும் காங்., வட்டாரங்கள் மேலும் கூறின.

மத்திய அரசு நிலை என்ன? இதற்கிடையில், "லோக்பால் மசோதா விவகாரத்தில், தன் நிலை என்ன என்பதை மத்திய அரசு தெளிவுபடுத்த வேண்டும்' என, பீகார் முதல்வர் நிதிஷ் குமார் கூறினார். அன்னா ஹசாரே, அரவிந்த் கேஜ்ரிவால், கிரண்பேடி, மனிஷ் சி÷ஷாடியா ஆகியோர், பீகார் முதல்வர் நிதிஷ் குமாரை நேற்று சந்தித்து, லோக்பால் மசோதா தொடர்பாக பேசினர். தங்களின் யோசனைகளுக்கு ஆதரவு கேட்டனர்.

சந்திப்புக்கு பின் நிதிஷ் குமார் கூறியதாவது: லோக்பால் மசோவை நிறைவேற்றுவதற்கு முன், அது தொடர்பாக, அரசியல் கட்சிகளிடம் கருத்து கேட்கப்படும் என, மத்திய அரசு அறிவித்துள்ளது. இதற்காக, லோக்பால் தொடர்பான, இரண்டு வரைவு மசோதாக்களை, மாநில அரசுகளுக்கு அனுப்பி வைக்க, மத்திய அரசு முடிவு செய்துள்ளது. அது ஏன் என தெரியவில்லை. மேலும், லோக்பால் மசோதா தொடர்பாக, மாநில அரசுகளிடம் கருத்து கேட்பதற்கு முன், அது தொடர்பாக, தன் நிலை என்ன என்பதை மத்திய அரசு தெளிவுபடுத்த வேண்டும். அதற்கு பின்னரே, இந்த விவகாரத்தில் நான் கருத்து தெரிவிக்க முடியும். பீகாரில் லோக் அயுக்தாவை ஏற்படுத்துவது குறித்து, அன்னா ஹசாரே உள்ளிட்டோரிடம் ஆலோசனை நடத்தினேன். எங்களது கட்சியினருடனும், கூட்டணி கட்சியான பா.ஜ.,வுடனும் இதுகுறித்து ஆலோசிக்க விரும்புகிறேன். இதுகுறித்து மேலும் விரிவாக விவாதிக்க, அன்னா ஹசாரே உள்ளிட்டோருக்கு அழைப்பு விடுத்துள்ளேன். இவ்வாறு நிதிஷ் குமார் கூறினார்.

கிரண் பேடி கூறுகையில், "நிதிஷ் குமாருடனான சந்திப்பு, ஆரோக்கியமான முறையில் இருந்தது. இது தொடர்பாக, எங்களுடன் தொடர்ந்து ஆலோசிக்க விரும்புவதாக அவர் கூறியுள்ளார்' என்றார். அன்னா ஹசாரே கூறுகையில், "ஊழலை ஒழிப்பதற்காக, நிதிஷ் குமார் ஏற்கனவே சில நடவடிக்கைகளை எடுத்துள்ளார். அவர் எங்களுக்கு ஒத்துழைப்பு அளிப்பார் என்ற நம்பிக்கை உள்ளது' என்றார்.
தினமலர்