இந்திய வீராங்கனைகளுக்கு தடை! * ஊக்கமருந்து சோதனையில் சிக்கினர்

புதுடில்லி: காமன்வெல்த், ஆசிய விளையாட்டு போட்டியில் தங்கம் வென்ற மன்தீப் கவுர் மற்றும் ஜுனானா மர்மு ஆகிய இருவரும் ஊக்கமருந்து சோதனையில் சிக்கியுள்ளனர். இவர்களுக்கு இரண்டு ஆண்டு தடை விதிக்கப்படுகிறது.
கடந்த ஆண்டு நடந்த காமன்வெல்த், ஆசிய விளையாட்டு போட்டியில், 4*400 தொடர் ஓட்டத்தில் இந்திய பெண்கள் அணி தங்கம் வென்றது. இதில் இடம் பெற்றிருந்தவர் மன்தீப் கவுர். இதே போல ஆசிய விளையாட்டில் 400 மீ., ஓட்டத்தில் நான்காவது இடம் பெற்றவர் ஜுனானா மர்மு.
இதனிடையே, ஆசிய தடகள சாம்பியன்ஷிப் போட்டி வரும் ஜூலை 7ல், ஜப்பானில் துவங்குகிறது. இதற்கு முன்பாக, இந்திய வீராங்கனைகளுக்கு கடந்த மே 25ல் சர்வதேச தடகள அமைப்பு (ஐ.ஏ.ஏ.எப்.,) சார்பில், ஊக்கமருந்து சோதனை நடத்தப்பட்டது. இதில் மன்தீப் கவுர், "மெத்தன்டியனன்' மற்றும் "ஸ்டானோஜோலல்' என்ற மருந்தையும், ஜுனானா மர்மு, "மெத்தன்டியனன்' என்ற மருந்தையும் பயன்படுத்தியது தெரிய வந்துள்ளது.
இந்த இரண்டு பொருட்களுமே, சர்வதேச ஊக்கமருந்து தடை மையத்தால் (டபிள்யு.ஏ.டி.ஏ.,) தடை செய்யப்பட்ட "அனபோலிக் ஸ்டெராய்டு' வகையை சேர்ந்தது. இதில் "ஸ்டானோஜோலல்' என்ற மருந்து, கடந்த 1988ல் அமெரிக்க தடகள வீரர் பென் ஜான்சன் பயன்படுத்தியது.
2 ஆண்டு தடை:
இதுகுறித்து இந்திய தடகள சங்கத்தின் இயக்குனர் எம்.எல்.டோக்ரா கூறுகையில்,"" இரண்டு வீராங்கனைகளும், டபிள்யு.ஏ.டி.ஏ.,யின் கண்காணிப்பு வளையத்துக்குள் இருந்தனர். இதனால் தான் இவர்களுக்கு சோதனை நடத்தப்பட்டது,'' என்றார்.
இதனிடையே இவர்களது "பி' சாம்பிள் சோதனை முடிவிலும், ஊக்கமருந்து பயன்படுத்தியது உறுதியாகியுள்ளது. இதையடுத்து இந்திய தடகள சங்கம் உடனடியாக "சஸ்பெண்டு' செய்தது.
இதுகுறித்து தேசிய ஊக்கமருந்து தடை மையம் விசாரணை நடத்துகிறது. இதன் முடிவில் இந்த இரண்டு வீராங்கனைகளுக்கும், முதன் முறை என்பதால், எச்சரிக்கையுடன் 2 ஆண்டுகள் தடையும் விதிக்கப்பட உள்ளது.
ஒலிம்பிக் சிக்கல்?
இந்திய பெண்கள் 4*400 மீ., தொடர் ஓட்ட அணியில் மன்தீப் கவுர் முக்கிய பங்கு வகிக்கிறார். இப்போது சோதனையில் சிக்கி தடையை சந்திக்க இருப்பதால், ஜப்பானில் நடக்கவுள்ள ஆசிய தடகள சாம்பியன்ஷிப் தொடரில் பங்கேற்க முடியாது. இதனால் இதில் வெற்றி பெற்று, 2012 லண்டன் ஒலிம்பிக்கிற்கு தகுதி பெறுவதில் சிக்கல் ஏற்பட்டுள்ளது.
---