பெடரர் அதிர்ச்சி தோல்வி *அரையிறுதியில் சானியா ஜோடி

லண்டன்: விம்பிள்டன் டென்னிஸ் தொடரின் ஆண்கள் ஒற்றையர் காலிறுதியில், சுவிட்சர்லாந்தின் ரோஜர் பெடரர் அதிர்ச்சித் தோல்வியடைந்தார். பெண்கள் இரட்டையர் பிரிவு அரையிறுதிக்கு இந்தியாவின் சானியா மிர்சா, ரஷ்யாவின் வெஸ்னினா ஜோடி முன்னேறியது.
லண்டனில், 125வது விம்பிள்டன் கிராண்ட்ஸ்லாம் டென்னிஸ் தொடர் நடக்கிறது. இதன் ஆண்கள் ஒற்றையர் காலிறுதியில் தரவரிசையில் 3வது இடத்திலுள்ள பெடரர், பிரான்சின் சோங்காவை எதிர்கொண்டார். இதன் முதல் இரண்டு செட்களை 6-3, 7-6 என, பெடரர் வென்றார். எழுச்சி பெற்ற சோங்கா, அடுத்த இரு செட்களை 6-4, 6-4 என கைப்பற்றினார். வெற்றியாளரை முடிவு செய்யும் ஐந்தாவது செட்டில், அசத்திய சோங்கா 6-4 என வென்றார்.
மூன்று மணி நேரம், 8 நிமிடங்கள் நடந்த போராட்டத்தின் முடிவில் 6-3, 7-6, 4-6, 4-6, 4-6 என்ற செட் கணக்கில், பெடரர் அதிர்ச்சித் தோல்வியடைந்தார். விம்பிள்டன் தொடரின் அரையிறுதிக்கு சோங்கா தகுதி பெறுவது இதுவே முதன் முறை.
மற்றொரு போட்டியில் செர்பியாவின் டோகோவிச், ஆஸ்திரேலியாவின் பெர்னார்டை 6-2, 3-6, 6-3, 7-5 என்ற கணக்கில் வீழ்த்தி அரையிறுதிக்கு முன்னேறினார்.
நடால் வெற்றி:
மற்றொரு காலிறுதியில் உலகின் "நம்பர்-1 வீரர் ஸ்பெயினின் நடால், அமெரிக்காவின் மார்டி பிஷ்சை 6-3, 6-3, 5-7, 6-4 என்ற செட் கணக்கில், வீழ்த்தி அரையிறுதிக்குள் நுழைந்தார்.
சானியா அசத்தல்:
பெண்கள் இரட்டையர் காலிறுதியில் இந்தியாவின் சானியா மிர்சா, ரஷ்யாவின் எலினா வெஸ்னினா ஜோடி, ஸ்பெயினின் நூரியா, அரன்ட்ஜா ஜோடியை சந்தித்தது. இதன் முதல் செட்டை 6-3 என, ஸ்பெயின் ஜோடி வென்றது. இதையடுத்து இரண்டாவது செட்டில் எழுச்சி பெற்ற சானியா ஜோடி, 6-4 என கைப்பற்றியது. தொடர்ந்து நடந்த மூன்றாவது மற்றும் கடைசி செட்டை, சானியா ஜோடி 7-5 என்று தன்வசப்படுத்தியது.
முடிவில் 3-6, 6-4, 7-5 என்ற செட்கணக்கில் வெற்றி பெற்ற சானியா மிர்சா, வெஸ்னினா ஜோடி, விம்பிள்டன் தொடரில் முதன் முறையாக அரையிறுதிக்கு முன்னேறியது.
அசரென்கா அபாரம்:
பெண்கள் ஒற்றையர் காலிறுதியில் தரவரிசையில் 4வது இடத்திலுள்ள பெலாரசின் விக்டோரியா அசரென்கா, ஆஸ்திரியாவின் தமிரா பகை எதிர்கொண்டார். இதில் அபார ஆட்டத்தை வெளிப்படுத்திய அசரென்கா, 6-3, 6-1 என்ற நேர் செட்டில் எளிதாக வெற்றி பெற்று அரையிறுதிக்கு முன்னேறினார்.
மற்றொரு காலிறுதியில் ö குடியரசின் பெட்ரா கிவிட்டோவா, பல்கேரியாவின் பிரன்கோவாவை சந்தித்தார். இதில் 6-3, 5-7, 6-2 என்ற செட் கணக்கில், போராடி வெற்றி பெற்ற பெட்ரா, அரையிறுதிக்குள் நுழைந்தார்.