ஸ்டேஷனில் போலி வக்கீல் ரவுசு: "மண்டை காய்ந்த' நிஜ வக்கீல்கள்

positivekarthick · positivekarthick Tue Jun 28, 2011 8:45 am

திருச்சி: திருச்சியில் போலி வக்கீலின் பேச்சைக் கேட்ட உண்மையான வக்கீல்கள், "மண்டை காய்ந்தனர்!' திருச்சி கூடுதல் ஜே.எம்.1 நீதிமன்ற வளாகத்தில், வக்கீல்கள் அணியும் கறுப்பு கோட்டுடன், மர்ம நபர் ஒருவர், நேற்று உலாவி கொண்டிருந்தார். கறுப்பு கோட் அணிந்திருந்தாலும், கழுத்தில் கட்டக்கூடிய, "டை' அணியாமல் இருந்தது, வக்கீல்களுக்கு சந்தேகத்தை ஏற்படுத்தியது. அவரிடம் வக்கீல்கள் விசாரித்தனர். தன் பெயர், பெனடிக்ட் பிரேம்குமார் என்று கூறிய அவர், மற்ற கேள்விகளுக்கு ஏடாகூடமாக பதிலளித்தார். ஆத்திரமடைந்த வக்கீல்கள், அவரை கன்டோன்மென்ட் போலீஸ் ஸ்டேஷனுக்கு அழைத்து வந்தனர். இன்ஸ்பெக்டர், அவரிடம் விசாரணை நடத்தினார். அப்போது அவர், "நான் எல்.எல்.பி., படித்திருக்கிறேன். ஒரு லட்சம் வழக்குகளுக்கு மேல் நடத்தியவன். எனக்கு ஐகோர்ட் நீதிபதிகள் அனைவரும் பழக்கம். ஒரு போன் செய்தால், இங்கேயே வந்துவிடுவர்... ஜாக்கிரதை' என மிரட்டினார்.

சிறிது நேரத்தில், சொந்த ஊர் திருநெல்வேலி என்றும், திருச்சி என்றும், திருச்சி உறையூர் மேன்ஷனில் தங்கியிருப்பதாகவும் மாறி மாறி பேசினார். அவரின் பேச்சைக் கேட்டு இன்ஸ்பெக்டரும், வக்கீல்களும் அதிர்ச்சியடைந்தனர். அடுத்த சில நிமிடங்களில், "எனக்கும், என் குழந்தைகளுக்கும் கடவுளுடைய அனுக்கிரகம் நேரடியாகக் கிடைக்கும். நள்ளிரவு, 12 மணிக்கு கர்த்தரே இறங்கி வந்து, என்னையும், என் குழந்தையையும் தலை மேல் கைவைத்து ஆசிர்வதிப்பார்' என்றார். "மண்டை காய்ந்த' வக்கீல்கள், "மனநிலை சரியில்லாத நபர் போல இருக்கிறார். அவர் மீது வழக்கு எதுவும் பதிவு செய்ய வேண்டாம்' என, இன்ஸ்பெக்டரிடம் கூறிவிட்டு இடத்தை காலி செய்தனர்.
தினமலர்