ஜி.கே.மணியை பதவி நீக்கம் செய்ய 7 நாள் கெடு : பா.ம.க.,வுக்கு அதிருப்தியாளர்கள் எச்சரிக்கை

""பா.ம.க., தோல்விக்கு காரணமான ஜி.கே.மணியை, ஒரு வாரத்தில்
பதவியில் இருந்து நீக்க வேண்டும். பா.ம.க.,வால் பாதிக்கப்பட்ட வன்னிய
மக்களை மீட்டு புதிய அமைப்பு அல்லது கட்சி துவங்கப்படும்,'' என,
மேச்சேரியில் நடந்த பா.ம.க., போட்டி கூட்டத்தில், முன்னாள் எம்.எல்.ஏ.,
காவேரி பேசினார்.
பா.ம.க.,வில் இருந்து முன்னாள் எம்.எல்.ஏ.,க்கள் காவேரி, காமராஜ்
ஆகியோர் நீக்கப்பட்டனர். இதற்கு, பா.ம.க., மாநில தலைவர் மணி தான் காரணம்
என, குற்றம்சாட்டிய அவர்கள், சேலம் மாவட்டம், மேச்சேரியில், பா.ம.க.,வுக்கு
எதிராக நேற்று போட்டி கூட்டம் நடத்தினர்.
கூட்டத்தில், பா.ம.க., கரும்புசாலையூர் கிளை செயலர் தாண்டா கவுண்டர்
வரவேற்றார். கூட்டத்தில் காமராஜ் பேசியதாவது: கட்சியில் எனக்கு மாநில
செயற்குழு பொறுப்பு வழங்கியிருப்பதாக மணி கூறினார். அதை ஏற்று, தேர்தல் பணி
செய்தேன். நீக்கப்பட்ட போது காமராஜ் நீக்கப்பட்டார் என, கூறினர். பொறுப்பை
கூட சொல்லவில்லை. அப்போது தான், மணி, எனக்கு பொறுப்பு வழங்கியதாக
ஏமாற்றியுள்ளார் என்பது தெரிந்தது.
மேலும், ராமதாசிடம், மணி குறித்து எந்த ஒரு உண்மையை சொன்னாலும் அவர்
ஏற்றுக்கொள்வதில்லை. புகார் செய்த மேட்டூர் வழக்கறிஞர் ஒருவரை தொடர்பு
கொண்ட மணி, "ராமதாஸ் நினைத்தால் கூட என்னை கட்சியில் இருந்து நீக்க
முடியாது' என, கூறியுள்ளார். அந்த அளவுக்கு மணியிடம், ராமதாஸ் வசமாக சிக்கி
கொண்டு மீள முடியாமல் தவிக்கிறார். இவ்வாறு காமராஜ் பேசினார்.
இடைப்பாடி எம்.எல்.ஏ., காவேரி பேசியதாவது: சட்டசபை தேர்தலில்
பா.ம.க., தோல்விக்கு காரணம் கேட்டபோது, மதுவிலக்கு கட்சியின் கொள்கை
முடிவாக இருக்க வேண்டும். கூட்டணி மாறுவதால், தி.மு.க.,- அ.தி.மு.க.,
தலைவர்களை திட்டக் கூடாது என, சில கருத்துகளை தெரிவித்தேன். துணிச்சலாக
பேசிய என்னை கட்சி நிர்வாகிகள் பாராட்டினர். அது, பா.ம.க., மாநில தலைவர்
ஜி.கே.மணிக்கு பிடிக்கவில்லை. அதனால், என்னை கட்சியில் இருந்து நீக்கினர்.
மாநில தலைவர் மணிக்கு பதவி தேவையில்லை. அவரை ஏழு நாட்களுக்குள்
பதவியில் இருந்து நீக்க வேண்டும். பா.ம.க., தோல்விக்கு முழுக்க முழுக்க மணி
தான் காரணம். தொடர்ந்து தலைவர் பதவியில் நீடித்தால், கட்சி படு
பாதாளத்துக்கு சென்று விடும். அன்புமணியால் பதவி இல்லாமல் இருக்க முடியாது.
அதேநேரம் மக்கள் ஓட்டு போட்டு அவர் ஜெயிக்க முடியாது.
மாநிலம் முழுவதும் பா.ம.க.,வில் உள்ள அதிருப்தியாளர்கள், கட்சியில்
இருந்து நீக்கப்பட்டவர்கள், பா.ம.க.,வால் பாதிக்கப்பட்டவர்களை ஒன்று
சேர்த்து, விரைவில் புதிய கட்சி அல்லது அமைப்பு துவங்கப்படும். அதற்கான
அறிவிப்பை விரைவில் வெளியிடுவோம். இவ்வாறு காவேரி பேசினார்.
கூட்டத்தில், நடந்து முடிந்த சட்டசபை தேர்தலில் பெண்களுக்கு ஒரு
இடம் கூட ஒதுக்காததை வன்மையாக கண்டிக்கிறோம் என்பது உட்பட, பல்வேறு
தீர்மானங்கள் நிறைவேற்றப்பட்டன. கூட்டத்தில், கல்ராயன்மலை பா.ம.க., ஒன்றிய
செயலர் சம்பத், மகுடஞ்சாவடி ஒன்றிய தலைவர் ராஜாகவுண்டர் உட்பட, பா.ம.க.,
ஒன்றிய, கிளை நிர்வாகிகள், வன்னியர் சங்க நிர்வாகிகள் உட்பட, 300க்கும்
மேற்பட்டோர் பங்கேற்றனர்.
மணியிடம் சிக்கி ராமதாஸ் தவிப்பு : பா.ம.க., அதிருப்தியாளர்கள்,
மேட்டூரில் நேற்று நடத்திய கூட்டம், மாநில தலைவர் ஜி.கே.மணிக்கு எதிரான
கூட்டமாகவே இருந்தது. அதில் சிலர் பேசியதாவது :
சேலம் மாவட்ட வன்னியர் சங்க முன்னாள் பொருளாளர் வடிவேலு: ஜி.கே.மணி,
தொடர்ந்து மாநில தலைவர் பதவியில் நீடித்தால், பா.ம.க., நிறுவனர் ராமதாஸ்
குடும்பத்துடன் ஜெயிலுக்கு போனாலும் ஆச்சரியப்படுவதற்கு இல்லை. வன்னியர்
நலனுக்காக, நாங்கள் உருவாக்கிய இயக்கத்தை, விரைவில் ஜி.கே.மணி முடித்து
விடுவார்.
கல்ராயன்மலை ஒன்றிய செயலர் சம்பத்: வன்னியர்களுக்கு இடஒதுக்கீடு
கேட்டு நடந்த போராட்டத்தில் கலந்து கொண்டவர்களில் நானும் ஒருவன். கடந்த
1996ல் தனித்து போட்டியிட்ட பா.மக., நான்கு தொகுதியில் வென்றது. தற்போது
மூன்று இடங்களில் மட்டுமே வென்றுள்ளது. அதற்கு கட்சித் தலைமையே காரணம்.
வன்னியர் சங்க முன்னாள் தலைவர் அழகேசன்: ஒரு தட்டில் வன்னிய
மக்களையும், மற்றொரு தட்டில் ஜி.கே.மணியையும் வைத்து, எது வேண்டும்? எனக்
கேட்டால், ஜி.கே. மணியைத்தான் ராமதாஸ் தேர்வு செய்வார். அந்த அளவுக்கு
ஜி.கே.மணியிடம், ராமதாஸ் சிக்கித் தவிக்கிறார்.