சத்தியம் செய்ய மாட்டேன் : எடியூரப்பா அறிவிப்பு

தர்மஸ்தலா மஞ்சுநாதா கோவிலில் சத்தியம் செய்யும் முடிவை கைவிட்ட முதல்-மந்திரி எடிïரப்பா, குமாரசாமி மற்றும் சித்தராமையாவுக்கு எதிராக மானநஷ்ட வழக்கு தொடரப்போவதாக அறிவித்துள்ளார்.



கர்நாடக முதல்-மந்திரி எடியூரப்பா மீது முன்னாள் முதல்-மந்திரியும், ஜனதாதளம்(எஸ்) கட்சியின் மாநில தலைவருமான குமாரசாமி பல்வேறு ஊழல் குற்றச்சாட்டுகளை கூறி வருகிறார்.

இந்த நிலையில் ஊழல் புகார்களை வெளியிட வேண்டாம் என்றும், இது தொடர்பாக சமரசம் செய்து கொள்ளலாம் என்றும் கூறி இதற்காக தன்னிடம் எடியூரப்பா ஒரு தூதுவரை அனுப்பி வைத்ததாக பரபரப்பான குற்றச்சாட்டை குமாரசாமி கூறினார்.



கர்நாடக அரசியலில் பெரும் பரபரப்பை ஏற்படுத்திய இந்த தகவலை, எடியூரப்பா மறுத்தார். அத்துடன், "சமரசத்துக்காக தூதுவரை அனுப்பவில்லை என்று தர்மஸ்தலா கோவிலில் மஞ்சுநாத சுவாமி முன் சத்தியம் செய்ய நான் தயார்.

அதுபோல் சத்தியம் செய்ய குமாரசாமி தயாரா?'' என்று எடியூரப்பா சவால் விடுத்தார். அந்த சவாலை குமாரசாமியும் ஏற்றுக் கொண்டார். இதை தொடர்ந்து இருவரும் நாளை(திங்கட்கிழமை) தர்மஸ்தலா கோவிலில் சத்தியம் செய்வதற்கான ஏற்பாடுகளை கோவில் தர்மகர்த்தாவான வீரேந்திர ஹெக்டே செய்து வந்தார்.



இந்த நிலையில் தர்மஸ்தலா கோவிலில் சத்தியம் செய்வதை எடியூரப்பாவும், குமாரசாமியும் கைவிட வேண்டும் என்று பெஜாவர் மடாதிபதி விஸ்வேஸ்வர தீர்த்த சுவாமி, ஆதிசுஞ்சனகிரி மடாதிபதி பாலகங்காதரநாத சுவாமி உள்ளிட்ட மடாதிபதிகள் வேண்டுகோள் விடுத்து இருந்தனர்.



நேற்று முன்தினம் பெங்களூர் வந்திருந்த அகில இந்திய பா.ஜனதா தலைவர் நிதின் கட்காரியும், இதே கோரிக்கையை முன்வைத்தார்.

`எடியூரப்பாவும், குமாரசாமியும் கோவிலில் சத்தியம் செய்யும் முடிவை கைவிட வேண்டும். முதல்-மந்திரி எடியூரப்பா கர்நாடக மாநிலத்தின் வளர்ச்சியில் கவனம் செலுத்த வேண்டும்' என்று அவர் யோசனை தெரிவித்து இருந்தார்.



மடாதிபதிகள் வேண்டுகோள் விடுத்தபோது தனது முடிவை 26-ந் தேதி(இன்று) அறிவிப்பதாக கூறி வந்த எடியூரப்பா, பா.ஜனதா தலைவர் நிதின் கட்காரியின் வேண்டுகோளை நிச்சயம் ஏற்றுக் கொள்வார் என்று எதிர்பார்க்கப்பட்டது.



அதேபோல கோவிலில் சத்தியம் செய்யும் முடிவில் இருந்து எடியூரப்பா நேற்று பின் வாங்கினார். கோவிலில் சத்தியம் செய்ய மாட்டேன் என்று அவர் கூறியுள்ளார். குல்பர்கா மாவட்டத்தில் சுற்றுப்பயணம் செய்த எடியூரப்பா, அங்கு இயற்கை உர விவசாயி மல்லிநாதா வீட்டில் மதிய உணவு சாப்பிட்டார். முன்னதாக எடியூரப்பா நிருபர்களுக்கு அளித்த பேட்டியில் கூறியதாவது:-



"கோவிலில் சத்தியம் செய்ய வேண்டாம் என்று பா.ஜனதா தலைவர் நிதின் கட்காரி வேண்டுகோள் விடுத்தார். வளர்ச்சி பணிகளில் கவனம் செலுத்தும்படியும் அவர் யோசனை தெரிவித்துள்ளார். இதேபோல பல்வேறு மடாதிபதிகளும் சத்தியம் செய்யும் முடிவை கைவிடும்படி கோரிக்கை விடுத்தனர்.



அவர்களது இந்த கோரிக்கையை ஏற்றுக் கொண்டு கோவிலில் சத்தியம் செய்யும் முடிவை கைவிடுகிறேன். என்றாலும் ஏற்கனவே திட்டமிட்டபடி 27-ந் தேதி (நாளை) தர்மஸ்தலா செல்கிறேன். அங்கு கோவிலில் சாமி தரிசனம் செய்வேன்.


அதே வேளையில் என் மீது அபாண்டமான குற்றச்சாட்டுகளை கூறி வரும் குமாரசாமி, எதிர்க்கட்சி தலைவர் சித்தராமையா ஆகியோரை சட்டரீதியாக சந்திப்பேன். அவர்கள் மீது மான நஷ்ட வழக்கு தொடருவேன்’’ என்று கூறினார்

நக்கீரன்