அரசு ஆஸ்பத்திரியில் கலெக்டர் சகாயத்தின் இரவு ரோந்து : குறைகளை களைய உடனடி உத்தரவுகள்

மதுரை : மதுரை அரசு ஆஸ்பத்திரியில் நேற்று முன்தினம் இரவு கலெக்டர் சகாயம் நீண்டநேரம் ஆய்வு மேற்கொண்டார்.
இங்கு கடந்த வாரம், கலெக்டர் சகாயம் ஆய்வு மேற்கொண்டார். அதன்பின் அங்கு புரோக்கர்கள் கைது, லஞ்சம் கேட்பவர்கள் கைது செய்யப்பட்டு வருகின்றனர்.நேற்று முன்தினம் இரவு 7.30 மணிக்கு, ஆஸ்பத்திரி அதிகாரிகளுக்கு முன்னதாக தகவல் தெரிவிக்காமல் கலெக்டர் "விசிட்' செய்தார். அவருடன் டி.எஸ்.ஓ., முருகையா, நேர்முக உதவியாளர் ஜெயசிங்ஞானதுரை மற்றும் அதிகாரிகள் என 15க்கும் மேற்பட்டோர் சென்றனர். 28வது வார்டு மருந்து வழங்கும் பிரிவு அருகே, அமர்ந்திருந்த குடும்பத்தினரை கலெக்டர் விசாரித்தார். "சேலம் இடைப்பாடியில் இருந்து கண்சிகிச்சைக்காக மதுரை வந்ததாக,'தெரிவித்தனர்.

"கோவை, சேலத்தில் சிகிச்சை பெறாமல், மதுரை வந்தது ஏன்?' என கலெக்டர் வினவ, "இங்கு நல்ல சிகிச்சை கிடைப்பதாக, தெரிவித்தனர். உடனே தன்னுடன் வந்த செஞ்சிலுவை சங்கத்தினரை அவர்களுக்கு உதவும்படி கூறிய கலெக்டர், அப்பகுதியில் பேன், விளக்கு வசதி செய்ய பொதுப்பணித்துறை பொறியாளர் குமாரசாமிக்கு உத்தரவிட்டார். அப்பகுதியில் பழுதுபட்டிருந்த தொலைபேசியை மாற்றும்படி தெரிவித்தார். மூதாட்டிக்கு உதவி:அங்கிருந்து செல்லும்போது, கலெக்டரின் எதிரே மூதாட்டி ஒருவர் செருப்பை கையில் ஏந்தியபடி வந்தார். அவரிடம் கேட்டபோது, "சிகிச்சை பெறும் பேரனுக்கு சாப்பாடு கொண்டு வந்ததாகவும், வெளியேற வழிதெரியாமல் திண்டாடுவதாகவும்,' கூறினார். அவரை பஸ்ஸ்டாப்புக்கு அழைத்துச் சென்று வீடு திரும்ப உதவும்படி, செஞ்சிலுவை சங்கத்தினரிடம் தெரிவித்தார்.

102வது வார்டில் சிகிச்சை பெற்றுவரும் ஒவ்வொரு நோயாளியிடமும் விசாரித்தார். அதேநேரம் கலெக்டர் வந்த தகவல் அறிந்த ஆர்.எம்.ஓ.,க்கள் திருவாய்மொழிப் பெருமாள், பிரகதீஸ்வரன் விரைந்து வந்து கலெக்டரை வரவேற்றனர். அவர்களுடன் விசிட்டை தொடர்ந்த கலெக்டர், மோசமான நிலையில் இருந்த கழிப்பறையை பார்வையிட்டார். தரையில் படுத்திருந்த நோயாளிகளிடமும் விசாரித்தார்.

நன்மாறனிடம் விசாரிப்பு: பின் அருகில் உள்ள பார்வையாளர் அறையில் பேன், உடைந்த பெஞ்சுகளை மாற்ற உத்தரவிட்டார். 114வது தீவிர சிகிச்சை பிரிவிற்கு சென்று ஆலோசனைக தெரிவித்தார். ஸ்பெஷல் வார்டை பார்வையிட்ட கலெக்டர், சிகிச்சை பெற்று வரும் முன்னாள் எம்.எல்.ஏ., நன்மாறனிடம் நலம் விசாரித்தார். 214வது வார்டில் பார்வையிட்டு, வராண்டாவில் விளக்கு வசதி ஏற்படுத்தக் கூறினார். இப்பணிகளை 2 நாட்களில் சரிசெய்வதாக பொறியாளர் பதிலளித்தார். பின் கலெக்டருடன் போலீஸ் உதவிகமிஷனர் வெள்ளத்துரையும் சேர்ந்து கொண்டார். ஆஸ்பத்திரியில் ஒருபகுதி வழியாக சமூகவிரோத சக்திகள் நுழைவதாகவும், அதை மூட வேண்டும் எனவும் கலெக்டரிடம் கூறினார். ""ஆஸ்பத்திரி வளர்ச்சிக்காக பேரிடர் மேலாண்மை நிதியில் இருந்து ரூ. 2 கோடி பெற்றுத் தருகிறேன். அதன்மூலம் ஆஸ்பத்திரி மற்றும் விரிவாக்க கட்டடத்திற்கு பயன்படுத்துங்கள்,'' என்றார் கலெக்டர். அங்கிருந்தே சம்பந்தப்பட்ட அதிகாரிகளுடன் போனில் பேசினார்.

லஞ்சப் புகார்: சில நோயாளிகள், வார்டு 99 மற்றும் 205ல் ஸ்டிரெச்சர் தள்ளுவோர் பணம் கேட்பதாக தெரிவித்தனர். "அவர்களுக்கு குறைந்த சம்பளமே வழங்கப்படுவதாக,' டாக்டர்கள் கலெக்டரிடம் கூறினர். ""அவர்களுக்கு குறைந்தபட்ச கூலி வழங்க ஏற்பாடு செய்யுங்கள். கட்டாயப்படுத்தி பணம் கேட்போரை கட்டுப்படுத்துங்கள்,'' என கலெக்டர் கூறினார். மூன்று மணிநேரம் அங்கிருந்த கலெக்டர் சகாயம், இரவு 10.30 மணிக்குப் பின் வீடு திரும்பினார்.
தினமலர்

நல்ல குடிமை பணி......