சென்னை கவுன்சிலிங்கில் பங்கேற்கும் மாணவர்- பெற்றோருக்கு பஸ் கட்டண சலுகை: அமைச்சர் தகவல்

சென்னை அண்ணா பல்கலைக்கழகத்தில் என்ஜினீயரிங், “ரேங்க்” பட்டியலை இன்று வெளியிட்ட அமைச்சர் பழனியப்பன் நிருபர்களிடம் கூறியதாவது:-

என்ஜினீயரிங் பொது கவுன்சிலிங் வருகிற 8-ந்தேதி சென்னை அண்ணா பல்கலைக்கழகத்தில் தொடங்குகிறது. இது 35 நாட்கள் நடைபெறும். முன்னதாக இந்த மாதம் 30-ந்தேதி விளையாட்டு வீரர்களுக்கு “கவுன்சிலிங்” நடக்கிறது.

தொழில் பிரிவு மாணவர்களுக்கு 1-ந்தேதி முதல் 6-ந்தேதி வரை கவுன்சிலிங் நடக்கிறது. மாற்று திறனாளிகளுக்கான கவுன்சிலிங் 7-ந்தேதி நடைபெறும். என்ஜினீயரிங் கலந்தாய்வில் பங்கேற்க வரும் மாணவ- மாணவி மற்றும் அவர்களுடன் வரும் பெற்றோர் அல்லது உறவினர் ஒருவருக்கு, பஸ் கட்டண சலுகை இந்த ஆண்டும் வழங்கப்படும்.

கலந்தாய்வில் பங்கேற்கும் மாணவ- மாணவிகளுக்கு சென்னை அண்ணா பல்கலைக்கழகத்தில் அனைத்து வசதிகளும் செய்து தரப்படும். தமிழ்நாட்டில் மொத்தம் உள்ள 494 பொறியியல் கல்லூரிகளில் சுமார் 1 லட்சத்து 20 ஆயிரம் அரசு ஒதுக்கீட்டு இடங்கள் இந்த கலந்தாய்வு மூலம் நிரப்பப்படும். பொறியியல் கல்லூரிகளில் எவ்வளவு கட்டணம் வசூலிக்க வேண்டும் என்பதை, இன்று மாலை கமிட்டி கூடி முடிவு செய்கிறது.

அதன் பிறகு கட்டண விவரம் அறிவிக்கப்படும். அரசு நிர்ணயிக்கும் கட்டணத்தை விட மாணவர்களிடம், கூடுதலாக வசூல் செய்தால் சம்பந்தப்பட்ட கல்லூரிகள் மீது கடும் நடவடிக்கை எடுக்கப்படும்.

ஏற்கனவே நியமிக்கப்பட்டுள்ள கட்டணம் முறைப்படுத்தும் கமிட்டி தொடர்ந்து கல்லூரிகளை கண்காணிக்கும். மாணவ- மாணவிகளை பாதிக்காத வகையில் அரசு கட்டணத்தை நிர்ணயிக்கும். அண்ணா பல்கலைக் கழகத்தை சீரமைப்பதற்காக முதல்- அமைச்சர் உத்தரவிட்டுள்ளார்.

அதற்கான நடவடிக்கைகள் மேற்கொள்ளப்பட்டு வருகிறது.

இவ்வாறு அமைச்சர் பழனியப்பன் கூறினார்.

பேட்டியின் போது அண்ணா பல்கலைக்கழக துணைவேந்தர் மன்னர் ஜவகர், கல்வி துறை செயலாளர், ஆணையர் மற்றும் அதிகாரிகள் உடன் இருந்தனர்.

மாலை மலர்