உடல் பருமன்: அறுவைச் சிகிச்சையைத் தீர்மானிப்பது எது?

சத்தான உணவு மற்றும் தேவையான உடற்பயிற்சிகளைத் தொடர்ந்து செய்தால் நமது உடலும், மனமும் நலமாக இருக்கும். பொதுவாக உடல் உயரத்தைப் பொருத்து, உடல் எடையும் மாறும். இவ்வாறு உடலின் உயரம் மற்றும் எடையைப் பொருத்து உடல் பருமனை கீழ்க்கண்டவாறு கணக்கிடலாம்.
இது "பாடி மாஸ் இண்டக்ஸ்' (பிஎம்ஐ) அழைக்கப்படுகிறது. பொதுவாக ஆரோக்கியமாக உள்ள நபருக்கு, அவருடைய பிஎம்ஐ 18-லிருந்து 24 வரை இருக்கும். பிஎம்ஐ 25-லிருந்து 29 வரை உள்ளவர்கள் அதிக உடல் எடை உடையவர்கள் என்றும் பிஎம்ஐ 30-லிருந்து 35 வரை உள்ளவர்கள் அளவுக்கு அதிகமாக எடை மற்றும் உடல் பருமன் உள்ளவர்கள் என்றும் கருதப்படுகின்றனர்.

பிஎம்ஐ 35-க்கு அதிகமாக இருந்தால் பாதிப்பிற்குரிய அதிக உடல் எடை மற்றும் பருமன் உள்ளவர்கள் என பிரிக்கப்படுகிறார்கள். பிஎம்ஐ 40-க்கும் அதிகமாக இருந்தால், உடல் பருமன் பிரச்னையின் உச்சகட்டமாகக் கொள்ளலாம்.

இத்தகையோருக்கு பல உடல்நலப் பிரச்னைகள் ஏற்படும். குறிப்பாக உடல் பருமன் பிரச்னை காரணமாக இள வயதில் சர்க்கரை நோய், உயர் ரத்த அழுத்தம் உள்ளிட்ட இதயம் தொடர்பான நோய்கள், நுரையீரல்-மூச்சுக் குழாய் தொடர்பான பிரச்னைகள் ஏற்பட வாய்ப்பு உண்டு.

ஒருவரின் உடல் எடையைத் தாங்கும் கால் மூட்டுகளில் தேய்மானம்கூட வரலாம். எனவே, அதிக உடல் எடை காரணமாக உடல் பருமன் பிரச்னை உள்ளவர்கள் காரணத்தைக் கண்டறிந்து சிகிச்சை பெறுவது அவசியம்.

காரணங்கள் என்ன?

தினமும் அளவுக்கு அதிகமான உணவைச் சாப்பிடுவது, மிகக் குறைந்த உடற்பயிற்சி ஆகியவையே உடல் பருமன் பிரச்னைக்கு முக்கியக் காரணங்களாகும். சில சமயங்களில் மூளையின் அடிப்பகுதியில் ஏற்படும் கட்டிகள், கணையம் மற்றும் அட்ரீனல் போன்ற நாளமில்லா உறுப்புகளில் வரும் கட்டிகள், சில குறிப்பிட்ட நோய்களுக்காக தொடர்ந்து சில மாத்திரைகளைச் சாப்பிடுதல், தைராய்டு சுரப்பி சரியாக வேலை செய்யாமல் இருத்தல் ஆகியவை காரணமாகவும் உடல் பருமன் பிரச்னை ஏற்படலாம்.

எனவே மேலே குறிப்பிட்ட பிஎம்ஐ ("பாடி மாஸ் இண்டக்ஸ்') கணக்கீட்டின் அடிப்படையில் காரணத்தைக் கண்டறிந்து சிகிச்சை பெறுவது அவசியம். குறிப்பாக உடல் பருமன் பிரச்னை காரணமாக சர்க்கரை நோய் அல்லது உயர் ரத்த அழுத்த சர்க்கரை நோய் இருந்தால், அவற்றைக் கட்டுப்படுத்துவதற்கு தொடர் சிகிச்சை அவசியம்.

முக்கிய சிகிச்சை என்ன?

உடல் பருமன் பிரச்னைக்கு உணவுப் பழக்கத்தில் மாற்றம், நடைப் பயிற்சி உள்பட சீரான தொடர் உடற்பயிற்சி ஆகியவை சிகிச்சையில் முக்கியப் பங்கு வகிக்கின்றன. கொழுப்புச் சத்தை உடல் உட்கிரகிப்பதைத் தடுக்க அளிக்கப்படும் மருந்துகளும் உதவும்.

பொதுவாக பிஎம்ஐ 30 வரை இருந்து, அதிக உடல் பிரச்னை உள்ளவர்களுக்கு மேலே குறிப்பிட்ட வாழ்க்கை முறை மாற்றம், மருத்துவ சிகிச்சையே போதுமானது. அறுவைச் சிகிச்சை தேவையில்லை. பிஎம்ஐ 35 அல்லது 40-க்கு மேல் இருந்தால், அறுவைச் சிகிச்சைதான் தீர்வு.

"கேஸ்ட்ரிக் பேண்ட்' மூலம் இரைப்பை கொள்ளளவைக் குறைப்பது உள்ளிட்ட அறுவைச் சிகிச்சை முறைகளைச் செய்ய வேண்டியிருக்கும். உடல் பருமன் குறைந்த பிறகு, "பேண்ட்'-டை அகற்றி விடலாம். பிரச்னையின் தீவிரத் தன்மைக்கு ஏற்ப "கேஸ்ட்ரிக் பைபாஸ்' உள்ளிட்ட அறுவைச் சிகிச்சை முறைகள் குறித்தும் முடிவு செய்து உடல் எடையைக் குறைக்க முடியும்.

டாக்டர் பி. சதீஷ்