கலப்பின மாட்டின் பால் குடிப்பதால் மாரடைப்பு, நீரிழிவு ஏற்படுமா?

கலப்பின மாட்டின் பால்குடித்தால் மாரடைப்பு, நீரிழிவு நோய் ஏற்படுமா? என்பது குறித்த ஆராய்ச்சியை தமிழ்நாடு கால்நடை மருத்துவ பல்கலைக்கழகம் செய்ய முடிவு செய்துள்ளது.

நாட்டு மாடு

இந்தியா உள்ளிட்ட ஆசிய கண்டத்திலும், ஆப்பிரிக்கா கண்டத்திலும் பூர்வீக நாட்டு மாடுகள் உள்ளன. இந்த மாடுகள் வருடத்திற்கு 700 லிட்டர் பால் மட்டுமே கொடுக்கும்.

ஆனால் இந்த மாடுகளுக்கு நோய் எதிர்ப்பு சக்தி அதிகம். பால் குடிக்க நன்றாக இருக்கும். இரவில்நன்றாக தூக்கம் வரும். இந்த மாட்டின் பாலில் கொழுப்பு அளவு அதிகம். ஆனால் இந்த மாடுகளின் பாலை குடித்தால் எளிதில் ஜீரணம் ஆகும்.

ஐரோப்பிய இனபசுக்கள்

ஐரோப்பிய கறவை மாடுகள் ஜெர்ஸி, ஹோல்ஸ்டீன் பிரீசியன் ஆகிய இனங்கள் வருடத்திற்கு 3 ஆயிரத்து 100 லிட்டர் பால் கொடுக்கும். அதாவது நாட்டு மாடுகளை விட அதிக அளவில் பால் கொடுக்கின்றன.

இதனால் இந்தியா உள்பட பெரும்பாலான நாடுகளில் ஜெர்ஸி - நாட்டு மாடுகள் கலந்த கலப்பின மாடுகள் தான் அதிகம். இந்த மாடுகள்தான் அதிக பாலைகொடுக்கிறது. இதனால் பால் பற்றாக்குறை போக்கப்படுகிறது.

நாட்டுமாடுகளில் ஏ2 வகையான கசீன் என்ற புரதம் உள்ளது. இந்த புரதச்சத்து அதிகம் இருப்பதால் பால் எளிதில் ஜீரணம் ஆகிறது. குழந்தைகளுக்கும், பெரியவர்களுக்கும் நல்ல ஆரோக்கியம் ஏற்படுகிறது.

ஜெர்ஸி பசுக்களில் 35 சதவீத பசுக்களில் ஏ1 வகை புரதம் உள்ளது. 65 சதவீத பசுக்களில் ஏ2 புரதம் உள்ளது. ஹோல்ஸ்டீன் பிரீசியன் இனமாடுகளில் 50 சதவீத பசுக்களில் ஏ1 புரதம் உள்ளது.

மாரடைப்பு

ஏ1 புரதம் உள்ள கலப்பின பாலை குடிப்பவர்களுக்கு அஜீரணகோளாறு ஏற்படுகிறது என்றும், இருதய நோய்கள் குறிப்பாக மாரடைப்பு ஏற்படுகிறது என்றும், நீரிழிவு நோய் ஏற்படுகிறது என்றும் ஆராய்ச்சியாளர்களில் சிலர் கருத்து தெரிவித்து உள்ளனர்.

எனவே இந்தியாவில் குறிப்பாக தமிழ்நாட்டில் உள்ள கலப்பின பசுக்களின் பாலில் ஏ1 புரதம் உள்ளதா? என்பதை அறிய தமிழ்நாடு கால்நடைமருத்துவ பல்கலைக்கழகம் ஆராய்ச்சி செய்ய முடிவு செய்துள்ளது.

தினதந்தி