குழந்தையின் சமயத்தை என்ஆர்டி தீர்மானிப்பதா?, அதிர்ந்து போனார் டிஏபி தலைவர்

பதிவுத்துறையில் (என்ஆர்டி) பெற்றோர்கள் தங்கள் பிள்ளைகளை அனாக் மலேசியா என்று பதிவுசெய்ய முயன்று தோல்வியில் முடிந்த கதைகள் தொடர்ந்து வந்து கொண்டிருக்கின்றன.

சிலாங்கூர் சட்டமன்ற உறுப்பினர் ஹன்னா இயோபுக்கு ஏற்பட்ட அதே அனுபவம் கொம்டார் சட்டமன்ற உறுப்பினர் இங் வை ஏய்க்குக்கு அவரின் இரண்டாவது மகள் இங் கேரினைப் பதிவுசெய்ய முனைந்தபோது ஏற்பட்டது.

ஜூன் 11-இல் பிறந்த கேரினின் பிறப்பைப் பதிவுசெய்த அவரின் பெற்றோர், இனம் என்ற இடத்தில் “அனாக் மலேசியா” என்றும் சமயம் என்ற இடத்தில் “Belum Ada (இன்னும் இல்லை)”என்றும் குறிப்பிட்டிருந்தனர்.

ஆனால், கெரினுக்கு அதிகாரப்பூரவ பிறப்புச்சான்றிதழ் கொடுக்கப்பட்டபோது அதில் இனம் என்ற இடத்தில் “சீனர்” என்றும் சமயம் என்ற இடத்தில் “பெளத்தம்” என்றும் குறிப்பிடப்பட்டிருந்தது.

தம்மைக் கலந்தாலோசிக்காமலும் தம் அனுமதியின்றியும் தம் பிள்ளையின் இனத்தையும் சமயத்தையும் என்ஆர்டி தானே தீர்மானித்திருப்பதைக் கண்டு பினாங்கு முதலமைச்சரின் அரசியல் செயலாளரான இங் “அதிர்ந்து போனார்”.

இதற்கு சம்பந்தப்பட்ட அதிகாரியைக் குறை சொல்லாமல் என்ஆர்டி-யின் இறுக்கமான கட்டமைப்புத்தான் காரணம் என்றவர் கூறினார். இன்னும் எந்தச் சமயத்தையும் பின்பற்றத் தொடங்கியிராத தம் மகளை பெளத்த சமயத்தவர்தான் என்று அது “தீர்மானித்திருப்பதை” அவரால் நம்ப முடியவில்லை.



அனாக் மலேசியா என்பதற்குப் பதிலாக சீனர் என்று குறிப்பிடப்பட்டிருப்பதும் அவருக்கு ஆத்திரமூட்டியது.

“நான் முடிவு செய்ய வேண்டியதை எனக்காக அவர் எப்படி முடிவு செய்யலாம்? இது முக்கியமான விசயம்… எங்கள் பிள்ளைகளை அனாக் மலேசியா என்று பதிவு செய்யும் உரிமை எங்களுக்கு இல்லையா… என்ன?

“அதுதானே 1மலேசியா உணர்வு. அதைத்தான் ஊக்குவிக்க வேண்டும். வருங்காலத் தலைமுறையினரின் இனத்தையும் சமயத்தையும் தீர்மானிக்கும் உரிமை அவர்களுக்குத்தான் இருக்க வேண்டும்”, என்றாரவர்.

இம்மாதத் தொடக்கத்தில் சுபாங் ஜெயா சட்டமன்ற உறுப்பினர் இயோ தம் மகளை அனாக் மலேசியா என்று பதிவுசெய்ய முயன்று அது முடியாமல் போகவே, பிறப்புச்சான்றிதழில் இனத்தைக் குறிப்பிடும் விவகாரம் கவனத்தைப் பெறத் தொடங்கியது.

இங்கின் விசயத்தில் நடந்ததைப்போலவே இயோவின் மகள் ஷாய் அடோரா ராமின் விசயத்திலும் நடந்திருந்தது. பெற்றொரின் விருப்பத்துக்கு மாறாக அவரின் சமயம் ‘சீனர்’ எனக் குறிப்பிடப்பட்டிருந்தது.

கலப்புமணம் செய்துகொண்டவர்களின் பிள்ளைகள் தாய் அல்லது தந்தையின் இனத்தைச் சேர்ந்தவர்களாகத்தான் குறிப்பிடப்பட வேண்டும் வேறு விதத்தில் குறிப்பிட இடமில்லை என்று என்ஆர்டி விளக்கமளித்தது.

இங், தாம் சீனராக இருந்தாலும் தம் பிள்ளையை அனாக் மலேசியா என்று குறிப்பிடும் விருப்ப உரிமை தமக்கு உண்டு என்றே நினைக்கிறார்.

ஒரு குழந்தையைப் பதிவு செய்யும்போது அதன் தாய் அல்லது தந்தையின் இனத்தையும் சமயத்தையும்தான் பின்பற்றியே பதிவு செய்வதுதான் முறை என்று கூறிய அதிகாரியின் “நெறியற்ற செயலை” எதிர்த்து மேல்முறையீடு செய்யப்போவதாக அவர் குறிப்பிட்டார்.

“காலத்துக்கு ஒவ்வாத முறையைக் கடைப்பிடிக்கிறோம். நமது சமயத்தைத் தீர்மானிக்கும் உரிமை நமக்கில்லை.

“என் வருங்கால தலைமுறை என் சமயத்தையும் இனத்தையும்தான் பின்பற்ற வேண்டும் என்று நான் கட்டாயப்படுத்த விரும்பவில்லை…..அவர்கள் அவர்களுக்கு முன்னிருந்தவர்கள்போல் விருப்பத் தேர்வு அற்றவர்களாக இருப்பதை நான் விரும்பவில்லை”, என்றவர் கூறினார்.

மலேசியாஇன்று