மலேசிய அந்நியத் தொழிலாளர்களுக்கான பொது மன்னிப்புக்குக் கட்டணம் இல்லை

சட்டவிரோத குடியேற்றக்காரர்கள் அடுத்த மாதம் தொடங்கி ஆறு மாதங்களுக்கு அமலில் இருக்கும் பொதுமன்னிப்புத் திட்டத்தில் தங்களைப் பதிந்துகொள்ளக் கட்டணம் எதுவும் செலுத்த வேண்டியதில்லை.

இலவசமாகவே அவர்கள் பதிந்துகொள்ளலாம் என்று தெரிவித்த உள்துறை அமைச்சின் தலைமைச் செயலாளர் மஹ்மூட் ஆதம் முகவர்களோ, முதலாளிகளோ அவர்களிடம் கட்டணம் வசூலிப்பது சட்டப்படி குற்றமாகும் என்றார்.

“அவர்கள் (சட்டவிரோத குடியேறிகள்) சுய தொழில் செய்வோராக இருந்தாலும் சரி எவரிடமும் வேலை செய்யாதவர்களாக இருந்தாலும் சரி தாராளமாக வந்து பதிந்து கொள்ளலாம்”, என இன்றுகாலை நடைபெற்ற செய்தியாளர் கூட்டத்தில் அவர் கூறினார்.

பதிந்துகொள்வதற்குக் கட்டணம் இல்லை. ஆனால் அவர்களை வேலைக்கு வைத்துள்ள முதலாளிகள் வேலை உரிமத்துக்கு விண்ணப்பம் செய்தால் அதற்கான லெவி கட்டணங்கள் உண்டு.

“அதைச் செலுத்துவது முதலாளிகளின் பொறுப்பு”, என்றாரவர்.

அந்தத் தொகை குடியேற்றக்காரர்கள்மீது சுமத்தப்படாமலிருப்பதை அரசு உறுதிப்படுத்தும்..

மலேசியாவில் சுமார் 1.9மில்லியன் சட்டவிரோத குடியேறிகள் இருக்கலாம் என மதிப்பிடப்படுவதால் இதுவரை அளிக்கப்பட்டவற்றுள் இதுவே மிகப் பெரிய பொதுமன்னிப்பு வழங்கும் திட்டமாக இருக்கும்.

தாமாக வந்து பதிந்துகொள்வோர்மீது எந்த நடவடிக்கையும் எடுக்கப்படாது என்று உத்தரவாதம் அளித்த மஹ்மூட், பொதுமன்னிப்புக் காலம் முடிவடைந்த பின்னர் அவர்களுக்கு எதிராக நடவடிக்கை மேற்கொள்ளப்படும் என்றார்.

“அதனால் பொதுமன்னிப்பு காலத்தைத் தவறவிட்டு பிறகு குறை சொல்லாதீர்கள்”, என்றாரவர்.

பொதுமன்னிப்பைப் பயன்படுத்திக்கொள்வதற்காகவே சட்டவிரோத குடியேறிகள் நாட்டுக்குள் நுழைவதைத் தடுக்கக் குடிநுழைவு மையங்களில் கண்காணிப்புப் பணி முடுக்கி விடப்பட்டுள்ளது.

குடியேற்றக்காரர்கள் பதிவுசெய்துகொண்ட பின்னர் குறிப்பிட்ட துறையில் தேவைக்கு அதிகமானோர் இருப்பது தெரியவந்தால் அவர்கள் அவர்களின் நாடுகளுக்குத் திருப்பி அனுப்பப்படுவர் என்றும் அவர் குறிப்பிட்டார்.

கடந்த பத்தாண்டுகளில் ஐந்து பொதுமன்னிப்புத் திட்டங்கள் வழங்கப்பட்டுள்ளதாகக் கூறிய மஹ்மூட் இதுவே கடைசியாக இருக்கலாம் என்றார்.

“ஒன்றரை ஆண்டுக்காலமாக இதற்குத் திட்டமிடப்பட்டு வந்தது”, என்றாரவர்.

அவர்கள் எல்லாக் குடிநுழைவு அலுவலகங்களிலும் பதிவு செய்து கொள்ளலாம்.

மலேசியாஇன்று

மலேசிய விசா – ஜூலை 11ம் தேதி பதிவு!

தற்போது விசா இல்லாமல் மலேசியாவில் வேலை செய்வோருக்கான புதிய நடைமுறை
பற்றி, நேற்று (புதன்கிழமை) மலேசிய இமிகிரேஷன் இலாகா அறிவித்துள்ளது.
இதன்படி, இவர்களுக்கு தம்மைப் பதிவு செய்துகொள்ள 2 வாரகால அவகாசம்
வழங்கப்படுகின்றது.
விசா இல்லாமல் மலேசியாவில் தங்கியிருப்போர், அடுத்த மாதம் 11ம்
தேதியிலிருந்து, சரியாக 2 வாரங்களுக்குள் தம்மைப் பதிவு செய்துகொள்ள
வேண்டும் என அறிவித்துள்ளது மலேசிய குடிவரவுத்துறை. பதிவு செய்வோர்மீது
சட்ட நடவடிக்கைகள் ஏதும் எடுக்கப்பட மாட்டாது எனவும் கூறப்பட்டுள்ளது.
ஆனால், பதிவு செய்வோர் அனைவரது விரல் ரேகைகளும் பதிவு செய்யப்படும்.
ஒருவேளை இவர்கள் மலேசியாவில் இருந்து வெளியேற்றப்பட்டால், பின்னர் வேறு
பெயரில் நாட்டுக்குள் வருவதைத் தடுக்கவே இந்த ஏற்பாடு எனக்
கூறப்படுகின்றது.
இரண்டு வாரங்கள் பதிவு செய்வோரில், மலேசியாவில் வேலை செய்யத்
தகுதியுடையவர்களுக்கு வேலை விசா வழங்கப்படும். வேலை செய்யத்
தகுதியற்றவர்கள் திருப்பி அனுப்பப்படுவார்கள்.

இந்த 2 வார காலப்பகுதியில் பதிவு செய்யாமல்,
விசாவும் இல்லாமல் மலேசியாவில் தங்கியிருப்பவர்கள், ஒருவேளை இமிகிரேஷன்
அதிகாரிகளிடம் அகப்பட்டால், சிறைத் தண்டனையும், ஆண்களுக்குக் கசையடித்
தண்டனையும் வழங்கப்படும் எனவும் அறிவிக்கப்பட்டுள்ளது.