ஸ்ரீலங்கன் பிரீமியர் லீக்: இந்திய வீரர்களுக்கு பிசிசிஐ தடை

இலங்கையில் நடைபெறவுள்ள ஸ்ரீலங்கன் பிரீமியர் லீக் கிரிக்கெட் போட்டியில் பங்கேற்க இந்திய வீரர்களுக்கு இந்திய கிரிக்கெட் கட்டுப்பாட்டு வாரியம் (பிசிசிஐ) தடை விதித்துள்ளது.இந்த போட்டியை இலங்கை கிரிக்கெட் வாரியம் நடத்தாமல், சிங்கப்பூரைச் சேர்ந்த தனியார் நிறுவனம் ஒன்று நடத்த அனுமதி வழங்கப்பட்டுள்ளது. இதனால் வீரர்கள் ஒப்பந்தத்தில் பிரச்னை ஏற்படும் என்பதால் இந்திய வீரர்கள் அதில் பங்கேற்கக் கூடாது என்று பிசிசிஐ கூறியுள்ளது.

நாகபுரியில் செய்தியாளர்களிடம் பேசிய பிசிசிஐ தலைவர் சஷாங் மனோகர் இது குறித்துக் கூறியது: தனியார் நிறுவனங்கள் நடத்தும் கிரிக்கெட் போட்டிகளில் நமது வீரர்கள் பங்கேற்பதை வாரிய விதிகள் அனுமதிக்காது. எனவே சிங்கப்பூர் நிறுவனம் நடத்தும் ஸ்ரீலங்கன் பிரீமியர் லீக் போட்டியில் நமது வீரர்கள் பங்கேற்கக் கூடாது என்று அறிவுருத்தப்பட்டுள்ளது.பிசிசிஐ நிர்வாகிகள் கலந்து கொண்ட கூட்டம் சனிக்கிழமை நடைபெற்றது. இதில் இந்த முடிவு எடுக்கப்பட்டது. பிசிசிஐ தடையில்லாச் சான்றிதழ் வழங்கினால் மட்டுமே இந்திய வீரர்கள் அந்தப் போட்டியில் பங்கேற்க முடியும். எங்களது முடிவு குறித்து இலங்கை கிரிக்கெட் வாரியத்துக்கு ஏற்கெனவே தெரிவித்து விட்டோம்' என்றார் அவர்.இலங்கையில் நடைபெறவுள்ள ஆட்டத்தில் இந்திய வீரர்களுக்கு அனுமதி மறுக்கப்பட்டதால், ஐபிஎல் போட்டிகளில் இலங்கை வீரர்கள் பங்கேற்க அந்நாட்டு வாரியம் தடை விதிக்குமா என்று சஷாங் மனோகரிடம் செய்தியாளர்கள் கேட்டனர். இதற்கு நான்
அப்படி கருதவில்லை என்று அவர் பதிலளித்தார்.கொழும்பில் உள்ள பிரேமதாசா மைதானத்தில் ஜூலை 19 முதல் ஆகஸ்ட் 4-ஆம் தேதி வரை ஸ்ரீலங்கன் பிரிமியர் லீக் போட்டி நடைபெறவுள்ளது. பிரவீண் குமார், முனாஃப் படேல், ஆர்.அஸ்வின், இர்பான் பதான், தினேஷ் கார்த்திக், மனோஜ் திவாரி, ரவிந்திர ஜடேஜா, வல்தாட்டி உள்பட 12 இந்திய வீரர்கள் இதில் பங்கேற்க விருப்பம் தெரிவித்திருந்தனர்.

முன்னதாக இந்தியாவில் சமீபத்தில் ஐபிஎல் போட்டியில் பங்கேற்ற இலங்கை வீரர்களை, இங்கிலாந்துக்கு எதிரான டெஸ்ட் தொடரில் விளையாட வேண்டுமென அந்நாடு திரும்ப அழைத்தது. இதனால் பிசிசிஐ-க்கும் இலங்கை கிரிக்கெட் வாரியத்துக்கும் சிறிய கருத்து வேறுபாடு ஏற்பட்டது என்பது நினைவுகூரத்தக்கது.இன்று இலங்கை கிரிக்கெட் வாரியம் கூட்டம்: இந்நிலையில் பிசிசிஐ-யின் முடிவு குறித்து ஆலோசனை நடத்த இலங்கை கிரிக்கெட் வாரியத்தின் கூட்டம் திங்கள்கிழமை நடைபெறவுள்ளது.பிசிசிஐ-யின் இந்த முடிவு குறித்து கூட்டத்தில் விவாதித்து முடிவு செய்வோம். அதற்கு முன் இந்த விஷயத்தில் கருத்து ஏதும் கூற முடியாது என்று இலங்கை கிரிக்கெட் வாரிய செயலாளர் நிஷாந்தா ரணதுங்க கூறியுள்ளார்.

தினமணி