இந்தியா - மேற்கிந்தியத்தீவுகள் முதல் டெஸ்ட் இன்று தொடக்கம்

மகா பிரபு · மகா பிரபு Mon Jun 20, 2011 9:37 am

இந்தியா-மேற்கிந்தியத்தீவுகள் இடையிலான முதல் டெஸ்ட் போட்டி கிங்கிஸ்டனில் திங்கள்கிழமை தொடங்குகிறது.மேற்கிந்தியத்தீவுகளில்சுற்றுப் பயணம் மேற்கொண்டுள்ள இந்திய அணி ஏற்கெனவே அங்கு நடைபெற்ற 20 ஓவர் போட்டியில் வென்றுள்ளது. ஒருநாள் தொடரை இளம் வீரர்கள் அடங்கிய இந்திய அணி 3-2 என்ற கணக்கில் வென்றது.இந்நிலையில் இரு அணிகளுக்கு இடையிலான முதல் டெஸ்ட் போட்டி திங்கள்கிழமை தொடங்குகிறது. இப்போட்டியில் கேப்டன் தோனி, மூத்த வீரர்கள் திராவிட், லட்சுமண் களம் இறங்குகின்றனர். எனவே இந்தியஅணியின் பேட்டிங் வரிசையில் பலம் கூடியுள்ளது.அதே நேரத்தில் ஒருநாள் தொடரை இழந்து விட்டபோதிலும் கடைசி இரு ஒருநாள் போட்டிகளில் வென்ற உற்சாகத்தில் மேற்கிந்தியத்தீவுகள் வீரர்கள் களம் இறங்குகின்றனர்.இந்திய அணி மேற்கிந்தியத்தீவுகளில் இதற்கு முன் சுற்றுப் பயணம் மேற்கொண்ட போது முதல் டெஸ்ட் போட்டியில் வென்றது இல்லை. அந்த வரலாற்றை தோனி தலைமையிலான அனுபவ, இளம் வீரர்களைக் கொண்ட இப்போதைய அணி மாற்றி அமைக்கும் என்பதே ரசிகர்களின் எதிர்பார்ப்பாக உள்ளது.இந்திய நேரப்படி இரவு 8.30 மணிக்கு இந்த ஆட்டம் தொடங்குகிறது.

மேற்கிந்தியத்தீவுகளின் பலம்: மேற்கிந்தியத்தீவுகளில் அணியில் அனுபவ வீரர் சந்தர்பால், வேகப்பந்து வீச்சாளர் எட்வர்ட்ஸ் ஆகியோர் அணிக்குத் திரும்பியுள்ளனர். பந்து வீச்சாளர்கள் கெமர் ரோச், ரவி ராம்பால், ஆல் ரவுண்டர் நாஷ் ஆகியோர் அணியில் இடம் பெற்றுள்ளனர். கடைசி இரு ஒருநாள் போட்டிகளில் இந்திய பேட்ஸ்மேன்களின் பலவீனத்தை பயன்படுத்தி "ஷார்ட் பிச்' பந்துகள் மூலம் அவர்களை மேற்கிந்தியத்தீவுகள் பந்து வீச்சாளர்கள் வெளியேற்றினர். இதே முறையை அவர்கள் டெஸ்ட் போட்டியிலும் கடைபிடிக்கக் கூடும்.பேட்டிங்கைப் பொருத்த அளவில் டேரன் பிராவோ, சர்வான், சந்தர்பால், சாமுவேல்ஸ் உள்ளிட்டோர் அணிக்கு வலு சேர்க்கின்றனர். டெய்ன் பிராவோ, கிறிஸ் கெயில் ஆகியோர் இல்லாதது அணிக்கு சிறிது பின்னடைவாகவே கருதப்படுகிறது. எனினும் சொந்த மண்ணில் களம் காண்பது அந்த அணிக்கு கூடுதல் பலம்.

நம்பர் 1 அணி: ஐசிசி டெஸ்ட் தரவரிசையில் இந்திய அணி இப்போது முதல் இடத்தில் உள்ளது. வலுவான பேட்டிங் வரிசையே இந்திய அணியின் முக்கிய பலம், நிலைத்து நின்று ஆடும் திராவிட், லட்சுமண் ஆகியோர் வலுவான ஸ்கோரை எட்ட உதவுவார்கள். பத்ரிநாத், ரெய்னா, கோலி, முரளி விஜய், முகுந்த், மிதுன் ஆகியோர் டெஸ்ட் போட்டியில் தங்கள் திறமையை நிரூபிக்க இப்போட்டி சிறந்த வாய்ப்பாக அமையும்.உலகக் கோப்பையை வென்று தந்த கேப்டன் தோனி அணிக்கு திரும்பியிருப்பது வீரர்களுக்கு கூடுதல் உத்வேகம் அளித்துள்ளது. மேலும் உலகக் கோப்பையை வென்ற பின் தோனி தலைமையில் விளையாடும் முதல் சர்வதேச ஆட்டம் இது என்பதால் இதில் அணி வெற்றி பெற வேண்டும் என்ற உத்வேகத்துடன் வீரர்கள் களம் இறங்குவார்கள்.பந்து வீச்சில் காயம் காரணமாக முனாஃப் படேல் விளையாடுவதில் தொடர்ந்து சந்தேகம் நீடிக்கிறது. ஆட்டம் தொடங்குவதற்கு முன்புதான் அவர் விளையாடுவது குறித்துத் தெரியும். பிரவீண் குமார், இஷாந்த் சர்மா, ஹர்பஜன் சிங், பிரக்யான் ஓஜா ஆகியோர் பந்து வீச்சில் அணிக்கு வலு சேர்க்கின்றனர்.

நன்றி தினமணி