விஜேந்தர் தோற்றார் - மீண்டும் வெண்கல நாயகன்

மிலன்: உலக குத்துச்சண்டை அரை இறுதிப் போட்டியில் உஸ்பெக் வீரர் அப்பாசிடம் இந்திய குத்துச்சண்டை வீரர் விஜேந்தர் தோற்று வெளியேறியுள்ளார். இப்போட்டியில் வெல்வதை தனது கனவாகக் கொண்டிருந்த விஜேந்தர் தோற்றாலும், வெண்கல பதக்கம் பெறுகிறார். பீஜிங்கில் நடந்த ஒலிம்பிக் போட்டியில் பங்கேற்ற அவர், அரையிறுதியில் கியூபா வீரர் எமிலியோ கொரயாவிடம் தோற்றதால் வெண்கலப் பதக்கத்தைப் பெற்றார். இன்று அதே போல், மீண்டும் வெண்கலப்பதக்கம் வெல்லும் வாய்ப்பு அவருக்கு கிடைத்திருக்கிறது.


உலக குத்துச்சண்டை போட்டிகளில் இதுவரை இந்தியா சார்பில் எந்த பதக்கமும் யாரும் பெறவில்லை என்பதால், அரையிறுதியில் விஜேந்தர் தோல்வி அடைந்தாலும், இந்திய விளையாட்டு வரலாற்றில், அவர் முதல் பதக்கம் பெற்றவர் என்ற முத்திரையை பதிக்கவிருக்கிறார்.சமீபத்தில் ஒரு "டிவி' நிகழ்ச்சியில் பங்கேற்ற விஜேந்தர், ""சிறிய வீடு, அப்பா பஸ் டிரைவர், ஆங்கிலம் தெரியாது போன்றவை பற்றி கவலைப்படவில்லை. எனது குடும்பம் எப்போதும் ஆதரவாக இருந்தது. எனது சகோதரர் என்னை குத்துச்சண்டை வீரராக பார்க்க ஆசைப்பட்டார். இதற்காக தன்னுடைய குத்துச்சண்டை வீரர் கனவை தியாகம் செய்தார். சாம்பியனாக முடியும் என்ற நம்பிக்கையுடன் போராடி, வெற்றி கண்டேன்,'' என்றார். அரியானாவில் பிவானியில் உள்ள கலுவாஸ் எனும் கிராமத்தில் 1985 அக்.29ல் பிறந்தவர் விஜேந்தர். பிவானியில் இருந்த குத்துச்சண்டை பயிற்சி மையத்தில் அவர் பயிற்சிகளை மேற்கொண்டார். இவரது தம்பியும் குத்துச்சண்டை வீரர், தற்போது அவர் ராணுவத்தில் பணிபுரிகிறார். ஜக்தீஸ் சிங் எனும் அவரது கோச் அவரது திறமையை கண்டறிந்து ஊக்குவித்தார்.


மாநில அளவிலான போட்டியில் விஜேந்தர் வெல்வதற்கு அவர் உறுதுணையாக இருந்தார். பின்னர் தேசிய அளவில் நடந்த போட்டியில் வெள்ளிப் பதக்கம் பெற்றார். இதுதவிர, தேசிய அளவில் பல்வேறு போட்டிகளில் பங்கேற்று பதக்கங்களைப் பெற்றார். பாக்சிங் உலகில் கொடிகட்டி பறக்கும் கியூபா நாட்டுக்கு சென்றும் பயிற்சி பெற்றார்.2004 ஒலிம்பிக் போட்டியில் ஏதென்ஸ் சென்ற அவர் அங்கு ஏதும் சாதிக்கவில்லை. 2006ம் ஆண்டில் காமன்வெல்த் போட்டியில் பிரிட்டனை சேர்ந்த குத்துச்சண்டை வீரர் பெர்கின்சிடம் அரையிறுதியில் தோற்றார். பின் இப்போட்டியில் வெள்ளிப்பதக்கம் பெற்றார். 2006 ஆசியன் கேம்ஸ் போட்டியிலும் வெண்கலம் வென்றிருக்கிறார்.


காவல்துறையில் டி.எஸ்.பி., பதவி : சர்வதேச அளவிலான போட்டிகளில் இந்திய குத்துச்சண்டை வீரரான, விஜேந்தர் அரையிறுதிக்கு மேல் முன்னேற முடியாதது அவர், எதிர்காலத்தில் வகுக்க வேண்டிய வியூகங்களை காட்டியுள்ளது. 2008 ஒலிம்பிக் போட்டியில் வெண்கல பதக்கம் பெற்ற அவருக்கு அரியானா அரசு காவல்துறையில் டி.எஸ்.பி., பதவி வழங்கியது. சமீபத்தில் இவருக்கு சமீபத்தில் ராஜிவ் காந்தி கேல் ரத்னா விருது வழங்கப்பட்டது.