போர்க்குற்றம் குறித்து சுதந்திரமான விசாரணை நடத்த வேண்டும் - இங்கிலாந்து

விடுதலைப்புலிகளுக்கு எதிரான போரில் நடைபெற்ற மனித உரிமை மீறல் மற்றும் போர்க்குற்றம் குறித்து உடனடி நடவடிக்கை எடுக்கும்படி இலங்கை அரசுக்கு இங்கிலாந்து எச்சரிக்கை விடுத்து உள்ளது.

இலங்கை ராணுவத்துக்கும் விடுதலைப்புலிகளுக்கும் இடையே கடந்த 25 ஆண்டுகளுக்கு மேலாக நடைபெற்று வந்த போர், 2009-ம் ஆண்டு மே மாதம் முடிவுக்கு வந்தது.

தமிழர்கள் படுகொலை காட்சிகள்

இறுதி கட்ட போரின் போது இலங்கை ராணுவம் போர் குற்றம் புரிந்ததாக குற்றம் சாட்டி, ஐ.நா.சபை குழு அறிக்கை தாக்கல் செய்துள்ளது. அதைத் தொடர்ந்து இலங்கை அரசுக்கு எதிராக பொருளாதார தடை போன்ற நடவடிக்கை மேற்கொள்ள வேண்டும் என்று சர்வதேச நாடுகள் வற்புறுத்தி வருகின்றன.

இந்த நிலையில், இங்கிலாந்தின் `சேனல் 4' தொலைக்காட்சி, போரில் கைது செய்யப்பட்ட தமிழர்களை கொடூரமாக சித்ரவதை செய்து படுகொலை செய்யப்பட்ட மேலும் சில காட்சிகளை நேற்று முன்தினம் நள்ளிரவில் வெளியிட்டது.

ஒரு பெண் உள்பட 3 பேரின் கை, கால்கள் மற்றும் கண்கள் கட்டப்பட்டு சுட்டுக்கொல்லப்பட்ட காட்சிகள் மிகவும் பார்க்க முடியாத அளவுக்கு மிகவும் கொடூரமாக இருந்தது. "இலங்கையின் கொலைக் களங்கள்'' என்ற தலைப்பில் வெளியான இந்த காட்சிகள் செல்போன் மூலம் படம் பிடிக்கப்பட்டவையாகும்.

இங்கிலாந்து எச்சரிக்கை

மிகவும் கோரமாக இருந்த அந்த வீடியோ காட்சிகளைப் பார்த்து அதிர்ச்சி அடைந்ததாக இங்கிலாந்து நாட்டின் வெளியுறவு துறை மந்திரி அலிஸ்டர் பர்ட் கூறி இருக்கிறார். இது போன்ற குற்றங்கள் குறித்து இலங்கை அரசு உடனடியாக நடவடிக்கை எடுக்க வேண்டும் என்றும், அவர் எச்சரிக்கை விடுத்து இருக்கிறார்.

கடந்த மாதமும் இந்த சேனல் வெளியிட்ட இது போன்ற காட்சிகள் பெரும் பரபரப்பை ஏற்படுத்தி இருந்தது. அதைத் தொடர்ந்து ஐ.நா. சபை குழு வெளியிட்ட அறிக்கையில், இலங்கை அரசு சர்வதேச மனித உரிமை சட்டத்தை மீறியதற்கு அந்த காட்சிகளை ஆதாரமாக சுட்டிக்காட்டி இருந்ததையும் இங்கிலாந்து மந்திரி பர்ட் நினைவு கூர்ந்து இருந்தார். அவர் மேலும் கூறியதாவது-

சுதந்திரமான விசாரணை

"இலங்கையின் போர்க் குற்றம் குறித்து வெளியாகி உள்ள இது போன்ற ஆதாரங்கள் குறித்து இலங்கை அரசு பொறுப்பான முறையில் பதில் அளிக்க வேண்டும் என்று உலக நாடுகள் எதிர்பார்க்கின்றன. மேலும் மனித உரிமை மீறல் குறித்து முழுமையான சுதந்திரமான விசாரணையை இலங்கை அரசு நடத்த வேண்டும்.

இலங்கை அரசு இந்த கோரிக்கையை பொருட்படுத்தாவிட்டால் இலங்கை அரசு மீது ஐ.நா.சபை நடவடிக்கை எடுக்க வேண்டும் என்று வற்புறுத்தி வரும் உலக நாடுகளுடன் இங்கிலாந்தும் இணைந்து குரல் கொடுக்கும்''.

இவ்வாறு இங்கிலாந்து வெளியுறவு துறை மந்திரி அலிஸ்டர் பர்ட் கூறினார்.

தினதந்தி

சொல்லிக்கொண்டே இருக்கிறாங்ளே தவிர, செய்யிறாங்க இல்லையே, சிவா! இதோ இன்றைய கார்டியன் நியூஸ்??

தனி இழையில்..!