2ஜி ஊழலில் சிதம்பரத்தின் பங்கு சிதம்பர ரகசியமா?

புதுடில்லி, இந்தியா: 2ஜி ஊழல் குற்றச்சாட்டு, கனிமொழியையும் முன்னாள் அமைச்சர் ராசாவையும் உள்ளே தள்ளியுள்ள நிலையில், உட்துறை அமைச்சர் அமைச்சர் ப.சிதம்பரத்துக்கு இதில் பங்கு இருக்கிறதா என்ற சந்தேகத்தை எழுப்பியிருக்கிறது பாரதீய ஜனதா கட்சி.

இந்தச் சந்தேகத்துக்கு, ஏற்கனவே பதிவு செய்யப்பட்ட டெலிபோன் உரையாடலே பாரதீய ஜனதாவின் ஆயுதமாக இருக்கிறது.

“2ஜி ஸ்பெக்ட்ரம் ஊழல் தொடர்பாக, முன்னாள் அமைச்சர் ராசாவுக்கும், மீடியா ஆலோசகர் நிரா ராடியாவுக்கும் இடையே நடந்த உரையாடல் பதிவாகியுள்ளது. இந்தப் பதிவின்மூலம், அப்போது நிதி அமைச்சராக இருந்த ப.சிதம்பரமும் இந்த விடயத்தில் தொடர்புடையவர் என்பதும் தெளிவாகியுள்ளது. ப.சிதம்பரத்துக்கு இந்த விடயத்தில் எவ்வளவு தொடர்பு இருக்கின்றது என்பது பற்றி பிரதமர் மன்மோகன் சிங் விளக்கம் அளிக்க வேண்டும்” என பாரதிய ஜனதா கட்சி கோரியுள்ளது.

டில்லியில் நேற்று நடைபெற்ற பிரஸ் மீட்டில், பாரதீய ஜனதா கட்சியின் செய்தி தொடர்பாளர் நிர்மலா சீதாராமன் இந்தச் சந்தேகம் தமது கட்சிக்கு இருப்பதாகக் கூறியுள்ளார்.

“2ஜி ஊழல் வழக்கில் சுப்ரீம் கோர்ட், ராசாவுக்கும் ராடியாவுக்கும் இடையே நடந்த உரையாடலின் எழுத்து வடிவத்தை சமர்பிக்கும்படி, கேட்டிருந்தது. ஆனால் இன்றுவரை உரையாடலின் எழுத்து வடிவத்தை சுப்ரீம் கோர்ட்டில் தாக்கல் செய்யவில்லை சி.பி.ஐ.

இது ஏன்? இந்த வழக்கில் சிதம்பரம் மீது சி.பி.ஐ., கரிசனம் காட்டுகிறது என்பதுதான் காரணம்.

டெலிபோன் உரையாடல் மூலம் சிதம்பரத்தின் பங்கு முக்கியமாக உள்ளது என்று நாங்கள் கூறுகின்றோம். சிதம்பரத்துக்கு பங்கு இருக்கிறதா, இல்லையா என்பது பற்றி, அரசு விளக்கம் அளிக்க வேண்டும். இந்த விஷயத்தில் பிரதமர் தொடர்ந்து மவுனம் சாதிப்பது ஏன்? அதுதான் எமக்குப் புரியவில்லை!” இவ்வாறு கூறியுள்ளார் நிர்மலா சீதாராமன்.

2ஜி ஸ்பெக்ட்ரம் ஊழல் குற்றச்சாட்டில் பாரதீய ஜனதா ப.சிதம்பரத்தையும் இழுத்துவிட விரும்புவது நன்றாகவே தெரிகின்றது. ஆனால், இவர்கள் குறிப்பிடும் தொலைபேசிப் பதிவு, Conversion Tracking on a 3rd. party என்ற வகையிலேயே இந்தியக் குற்றவியல் சட்டத்தில் எடுத்துக் கொள்ளப்படும். இதனால், பா.ஜ.க.வின் சந்தேகம் கோர்ட்டில் தாக்குப் பிடிக்காது.

அவ்வப்போது பரபரப்பைக் கிளறிவிட உதவலாம். அவ்வளவுதான்.


வி வி