கள்ளச்சாராயத்துக்கு எதிராக அதிரடி நடவடிக்கை போலீஸ் ஸ்டேஷன் கூண்டோடு டிரான்ஸ்ஃபர்!

''சார் வணக்கம். நான் நம்ம டிபார்ட்மெண்ட்லதான் வேலை பார்க்குறேன். திருக்கோவிலூர்ல கள்ளச் சாராய விற்பனை அமோகமா நடக்குது. அதுக்கு நம்ம ஆளுங்களே உதவியா இருக்குறாங்க. கள்ளச் சாராயத்தால பல குடும்பங்கள் நடுத்தெருவுக்கு வந்துட்டு இருக்குது. நீங்க மனசு வெச்சா மட்டும்தான் கள்ளச்சாராயத்தை ஒழிக்க முடியும்!'' - என்று விழுப்புரம் மாவட்ட எஸ்.பி-யிடம் ஒரு பெண், போனில் தொடர்பு கொண்டு புகார் சொல்லி இருக்கிறார்.

உடனே, லோக்கல் போலீஸ் ஸ்டேஷனுக்குத் தகவல் சொல்லாமல், தனி டீம் ஏற்பாடு செய்து விசாரிக்கச் சொல்லி இருக்கிறார், எஸ்.பி. சேவியர் தன்ராஜ். அந்த டீமும் விசாரித்து விட்டு, ''உங்களுக்கு வந்த தகவல் உண்மைதான் சார்... திருக்கோவிலூர் ஏரியாவில் கள்ளச்சாராயம் அளவுக்கு அதிகமாகத்தான் இருக்கிறது!'' என்று சொல்லி இருக்கிறார்கள்.



அடுத்த சில தினங்களில் எஸ்.பி. தனது ஸ்பெஷல் டீமை அழைத்து, ''நீங்க திருக்கோவிலூர் கிளம்புங்க. அங்கே இருக்கிற கலால் போலீஸ் ஸ்டேஷன்ல போய் உட்காருங்க. என்ன நடக்குதுன்னு பாருங்க. யாரெல்லாம் சாராய வியாபாரிகளுடன் தொடர்புல இருக்குறாங்களோ, அந்த லிஸ்டை உடனே எனக்கு அனுப்புங்க. அத்தனை பேரையும் டிரான்ஸ்ஃபர் பண்ணிடுவோம்!'' என்று சொல்ல அதே போல அதிரடி நடவடிக்கைகள் ஆரம்பமாகி இருக்கிறது.

சம்பந்தப்பட்ட காவல் நிலையத்தில் பணியாற்றும் அத்தனை போலீஸாருக்குமே சாராய வியாபாரிகளுடன் நல்ல நட்பு இருப்பது தெரிய வரவே... லிஸ்ட் எஸ்.பி-க்குப் போனது. அந்த ஸ்டேஷனில் இருந்த அத்தனை பேரையும் கூண்டோடு டிரான்ஸ்ஃபர் செய்துவிட்டு, புதிதாக போலீஸார்களை அங்கே பணியமர்த்தி விட்டார் எஸ்.பி. இப்போது, புதிய போலீஸார், கள்ளச் சாராயக்காரர்களை ஓடஓட விரட்டியடிக்கத் தொடங்கி விட்டார்கள்.

''கடந்த தி.மு.க. ஆட்சியின்போது கள்ளச் சாராய விற்பனையை கண்டுக்காம விட்டுட்டாங்க. அதோட மட்டுமில்லாம, அப்போ இருந்த ஆளும் கட்சிக்காரங்களே சிலர் சாராயம் காய்ச்சிட்டு இருந்தாங்க. அதனால போலீஸும் அவுங்களுக்கு சப்போர்ட்டா இருந்தாங்க. இப்போதான் எஸ்.பி. அதிரடியா விரட்டியடிக்க ஆரம்பிச்சிருக்கார். இனியாவது நல்லது நடக்குதான்னு பார்க்கலாம்!'' என்கிறார்கள் ஏரியாவாசிகள்.

விழுப்புரம் மாவட்ட எஸ்.பி. சேவியர் தன்ராஜிடம் பேசினோம். ''எனது டீம், சாராயம் காய்ச்சும் பல இடங்களில் இருந்த கேன்களையும், பானைகளையும் அடித்து நொறுக்கி விட்டார்கள். ஆயிரக்கணக்கான லிட்டர் சாராயத்தை அழித்து இருக்கிறார்கள். திருக்கோவிலூரை சாராயம் இல்லாத ஊராக மாற்றும் வரை என் நடவடிக்கை தொடரும்...'' என்றார் அதிரடியாக.

நன்றி விகடன்

///கடந்த தி.மு.க. ஆட்சியின்போது கள்ளச் சாராய விற்பனையை கண்டுக்காம விட்டுட்டாங்க.///

இதைச் சொல்லத்தான் இவ்வளவு பில்டப்பா....!!! இந்த எஸ்.பி. இப்பொழுதுதான் தேர்தலில் வெற்றி பெற்று எஸ்.பி.யாகி கள்ளச்சாரயத்தை ஒழிக்க ஆரம்பித்துள்ளாரோ?