''சீமான் பெயரால் மிரட்டல்!'' வேதனையில் வேலூர் ஞானசேகரன்

வேலூர் சட்டமன்றத் தொகுதியை, 20 வருடங்களாகத் தன் கைக்குள் வைத்திருந்தவர், காங்கிரஸ் கட்சியின் ஞானசேகரன். விடுதலைப் புலிகளுக்கு எதிராக ஆவேசமாகப் பேசுபவர். அதனால், அவ்வப்போது 'கொலை மிரட்டல்’ அபாயத்துக்கு ஆளானவர். சமீபத்தில் அவர் தேர்தலில் போட்டியிட்டுத் தோல்வி அடைந்த நிலையிலும், ''வெளிநாட்டுத் தொலைபேசி எண்ணில் இருந்து எனக்கு கொலைமிரட்டல் வந்துள்ளது. போலீஸார் உரிய நடவடிக்கை எடுக்காமல் காலம் தாழ்த்துகிறார்கள்...'' என்று புகார் கூறவே, ஏரியா பரபரத்துக் கிடக்கிறது.

இந்த புகார் பற்றி விசாரிக்கக் களம் இறங்கினோம்.



நம்மிடம் பேசிய காங்கிரஸ் பிரமுகர்கள், ''ஞானசேகரனை கொலை செய்ய விடுதலைப் புலிகள் திட்டமிட்டு வேலை செஞ்சது உண்மை. அப்பவே, போலீஸில் புகார் கொடுத்தார். பாதுகாப்புக்கு போலீஸ்காரர்களை நியமிச்சாங்க. இப்போது ஆட்சி மாறியவுடன் மீண்டும் மிரட்டல் வந்துள்ளது. வேலூரில் ராஜா மாதிரி வலம் வந்த எங்க அண்ணன், இப்ப மனசு ஒடிஞ்சு போயிட்டார்...'' எனக் கலக்கமாகக் கூறினர்.

ஞானசேகரனிடம் பேசிய போது, ''விடுதலைப்புலிகள் இயக்கம்தான் இந்த மிரட்ட லுக்கு முக்கியக் காரணம். நாலு நாளைக்கு முன்னால், அதிகாலையில் என்னுடைய போனில் அழைப்பு வந்தது. எதிர்முனையில் பேசியவன், கெட்ட வார்த்தையில்தான் ஆரம்பித்தான். இணைப்பை உடனே துண்டித்து விட்டேன். மீண்டும், மீண்டும் அழைப்பு வந்து கொண்டே இருந்தது. 'உன்னைக் கொல்லாமல் விடமாட்டோம்!’ என ஆக்ரோஷமாகக் கூறினான். ஏற்கெனவே, இணையதளம் ஒன்றில், 'ராஜீவ் இறந்ததில் பைத்தியம் பிடித்து விட்ட ஞானசேகரன் தற்கொலை செய்து கொண்டார்!’ என்று போட்டார்கள். மாதத்துக்கு 20 மிரட்டல் போன்களாவது எனக்கு வருகின்றன. பெரும்பாலும் இலங்கைத் தமிழில்தான் பேசுகின்றனர். கெட்ட வார்த்தைகளில் திட்டுவார்கள். சீமான், 'நாம் தமிழர்’ இயக்கத்தைத் தொடங்கியதில் இருந்து, தமிழகத்தில் விடுதலைப்புலிகள் ஊடுருவல் அதிகமாகி விட்டது. தடைசெய்யப்பட்ட ஒரு இயக்கத்தை ஊக்கு விப்பது தேசத் துரோகக் குற்றம். என்னிடம் போனில் மிரட்டுபவர்கள் சிலர் சீமான் பெயரைக் கூறுகின்றனர். தேர்தலுக்கு முன், 10 போலீஸார் என் பாதுகாப்புக்கு இருந்தனர். இப்போது, இரண்டே போலீஸ் காரர்கள்தான். கேட்டால், 'அரசு கொடுத்துள்ள அனுமதி இவ்வளவுதான்!’ என்கிறார்கள். மிரட்டல் ஆசாமிகளைக் கண்டுபிடிப்பதில் மெத்தனம் காட்டாமல், விரைவில் கண்டுபிடித்து தண்டிக்க வேண்டும்!'' என்று உருக்கமாகக் கூறினார்.

வேலூர் டி.எஸ்.பி. ஜெயராமை சந்தித்து, ஞானசேகரனின் புகார் குறித்துக் கேட்டோம். ''சத்துவாச்சாரி போலீஸ் ஸ்டே ஷனில் ஞானசேகரன் புகார் கொடுத்தார். எஃப்.ஐ.ஆர். பதிவு செய்துள்ளோம். கடந்த 4 மாதங்களாக போனில் அவருக்கு வந்துள்ள அழைப்புகள் குறித்து விசாரிக்க சைபர் கிரைம் பிரிவுக்கு உத்தரவு இடப்பட்டுள்ளது. மிரட்டல் வந்த அழைப்புகள் எல்லாம் வெளிநாட்டு எண்கள். அதனால்தான், அந்த நபரைக் கண்டுபிடிப்பதில் தாமதம். அவருக்குப் போதிய அளவுக்கு பாதுகாப்பு அளிக்கப்பட்டு உள்ளது!'' என்றார்.



காவல்துறையின் அசட்டை எதிரிகளுக்கு சாதகமாகிவிடக் கூடாது!

நன்றி விகடன்