வேன்-லாரி பயங்கர மோதல், பெண்கள் உள்பட 11 பேர் பலி

**சிவா** · **சிவா** Wed Jun 15, 2011 10:41 pm

வேன்-லாரி பயங்கரமாக மோதிக்கொண்டன. அதில் பெண்கள் உள்பட 11 பேர் இறந்தனர். துக்கம் விசாரித்து விட்டு திரும்பிய போது இந்த சோக சம்பவம் நடந்தது.

துக்கம் விசாரிக்க...

நாமக்கல் மாவட்டம் மோகனூர் பேரூராட்சி கவுன்சிலராக இருந்த விசுவநாதன் கடந்த வாரம் இறந்து விட்டார். மகன் இறந்த சோகம் தாங்காமல் அதிர்ச்சியில் இருந்த அவரது தாயார் மலையம்மாள் (வயது 55) நேற்று காலை இறந்தார். இந்த துக்க நிகழ்ச்சியில் கலந்து கொள்ள தஞ்சாவூர் மாவட்டம் திருப்பூந்துருத்தியை சேர்ந்த உறவினர்கள் 25-க்கும் மேற்பட்டவர்கள் மோகனூருக்கு வேனில் வந்தனர்.

அவர்கள் துக்கம் விசாரித்து விட்டு நேற்று மாலை ஊருக்கு புறப்பட்டனர். இந்த வேன் மோகனூர் அருகே ஒரு திருப்பத்தில் செல்லும் போது எதிர்பாராதவிதமாக விபத்தில் சிக்கியது.

இந்த வேனும், எதிரே வந்த லாரியும் நேருக்கு நேர் பயங்கரமாக மோதிக்கொண்டன. அந்த லாரி தஞ்சாவூரில் இருந்து கரும்பு சக்கை ஏற்றிக்கொண்டு கரூர் மாவட்டம் புகளூரில் உள்ள காகித ஆலைக்கு சென்று கொண்டு இருந்தது.

வேன் உருண்டது

இந்த விபத்தில் சிக்கிய வேன் நிலைதடுமாறி ரோட்டு ஓரத்தில் 2 முறை உருண்டது. அதில் இருந்தவர்கள் இடிபாடுகளில் சிக்கினார்கள். இதை பார்த்ததும் அந்த பகுதியில் உள்ள மக்கள் திரண்டனர். அவர்கள் மீட்பு பணியில் ஈடுபட்டனர்.

இருந்த போதிலும் இந்த விபத்தில் வேனில் இருந்தவர்களில் 6 பேர் சம்பவ இடத்தில் உடல் நசுங்கி பரிதாபமாக இறந்தனர். அவர்களில் 4 பேர் பெண்கள். மற்ற 2 பேர் ஆண்கள் ஆவார்கள்.

11 பேர் பலி

படுகாயம் அடைந்தவர்களை மீட்டு சிகிச்சைக்காக நாமக்கல் அரசு ஆஸ்பத்திரிக்கு கொண்டு சென்றனர். செல்லும் வழியில் 4 பேர் இறந்தனர். ஆஸ்பத்திரியில் முதல் உதவி சிகிச்சை அளித்து விட்டு மேல் சிகிச்சைக்கு கொண்டு சென்ற போது ஒருவர் இறந்தார். இதனால் இந்த விபத்தில் இறந்தவர்களின் எண்ணிக்கை 11 ஆக உயர்ந்தது.

லாரி டிரைவர் மீட்பு

விபத்தில் சிக்கிய லாரியின் முன்பகுதியும் சேதம் ஆனது. எனவே டிரைவர் இடிபாடுகளில் சிக்கி தவித்தார். அவரால் வெளியே வரமுடியவில்லை. இதை அறிந்ததும் அந்த பகுதியை சேர்ந்த பொதுமக்கள் அவரை காப்பாற்றும் பணியில் மும்முரமாக ஈடுபட்டனர்.

இருந்த போதிலும் டிரைவரின் வலது காலை மீட்பதில் பெரும் சிரமம் ஏற்பட்டது. எனவே டிராக்டரின் உதவியால் அவரை உயிரோடு மீட்க நடவடிக்கை எடுக்கப்பட்டது. லாரியின் உடைந்த பகுதியில் கயிறு மூலம் கட்டி அதை டிராக்டர் உதவியால் இழுத்தனர். அதற்கு நல்ல பலன் கிடைத்தது. சிறிது நேரத்தில் டிரைவர் மீட்கப்பட்டார். அவரை சிகிச்சைக்காக ஆஸ்பத்திரிக்கு அனுப்பி வைத்தனர்

போலீஸ் விசாரணை

இந்த விபத்து காரணமாக அந்த பகுதியில் போக்குவரத்து பாதிக்கப்பட்டது. இதுகுறித்து போலீசார் விசாரணை நடத்தி வருகிறார்கள்.

தினதந்தி

வேன்-லாரி பயங்கர மோதல், பெண்கள் உள்பட 11 பேர் பலி

வேன்-லாரி பயங்கர மோதல், பெண்கள் உள்பட 11 பேர் பலி

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக