இந்திய அணி 'நம்பர்-1: ஆஸ்திரேலியா, தென் ஆப்ரிக்காவை முந்தியது

துபாய் : ஐ.சி.சி., ஒருநாள் போட்டிக்கான ரேங்கிங் பட்டியலில் இந்திய அணி முதல் முறையாக "நம்பர்-1' இடத்துக்கு முன்னேறி வரலாறு படைத்துள்ளது. கொழும்புவில் நேற்று நடந்த முத்தரப்பு கிரிக்கெட் லீக் போட்டியில் இந்திய அணி, நியூசிலாந்தை வீழ்த்தியது. இதன் மூலம் சர்வதேச கிரிக்கெட் கவுன்சிலின்(ஐ.சி.சி.,) ஒருநாள் போட்டிக்கான ரேங்கிங் (தரவரிசை) பட்டியலில் இந்தியா 128 புள்ளிகளுடன் முதல் முறையாக முதலிடத்துக்கு முன்னேறியது. தென் ஆப்ரிக்கா (127 புள்ளி) இரண்டாவது இடத்துக்கு தள்ளப்பட்டது. ஆஸ்திரேலியா (124 புள்ளி) மூன்றாவது இடத்தில் உள்ளது.


தொடரும் வெற்றி: கடந்த 2002, அக்டோபரில் ஒரு நாள் போட்டிக்கான ரேங்கிங் முறை அறிமுகப்படுத்தப்பட்டது. இதில் ஆஸ்திரேலியா, தென் ஆப்ரிக்க அணிகள் தான் மாறி மாறி முதலிடத்தை பெற்று வந்தன. இந்த நிலைமையை தோனி தலைமையிலான இந்திய அணி மாற்றிக் காட்டியுள்ளது. சமீப காலமாக ஒரு நாள் போட்டிகளில் வெற்றி மேல் வெற்றி பெற்று வருகிறது. கடந்த 2008ல் இலங்கை, இங்கிலாந்துக்கு எதிரான ஒரு நாள் தொடரை வென்றது. 2009ல் இலங்கை, நியூசிலாந்து, வெஸ்ட் இண்டீசுக்கு எதிரான ஒரு நாள் தொடரை கைப்பற்றியது. தொடர்ந்து 5 ஒரு நாள் போட்டி தொடர்களில் வெற்றிக் கொடி நாட்டியது.


இலங்கை சவால்: தற்போது முத்தரப்பு தொடரையும் வெற்றியுடன் துவக்கியதன் மூலம் இந்திய அணி ரேங்கிங் பட்டியலில் முதலிடத்தை பெற்றுள்ளது. ஆனாலும் தென் ஆப்ரிக்கா மற்றும் இந்தியாவுக்கு இடையில் ஒரு புள்ளி மட்டுமே வித்தியாசம் காணப்படுகிறது. எனவே, வரும் போட்டிகளில் தோனி தலைமையிலான அணி வெற்றிநடையை தொடர வேண்டும். அப்போது தான் "நம்பர்-1' இடத்தை தக்க வைத்துக் கொள்ள முடியும். முத்தரப்பு தொடரில் இன்று நடக்க உள்ள இலங்கை அணிக்கு எதிரான லீக் போட்டியில் வெற்றி பெறுவது மிகவும் அவசியம். ஒருவேளை தோல்வி அடைந்தால், மீண்டும் இரண்டாவது இடத்துக்கு தள்ளப்படும்.


புதிய ரேங்கிங் விபரம்: ஐ.சி.சி., வெளியிட்டுள்ள ஒரு நாள் போட்டிக்கான புதிய ரேங்கிங் பட்டியலின் படி அணிகளின் நிலை வருமாறு:

அணிகளின் புள்ளி விபரம்


1 இந்தியா 128
2 தென் ஆப்ரிக்கா 127
3 ஆஸ்திரேலியா 124
4 பாகிஸ்தான் 109
5 இலங்கை 106
6 இங்கிலாந்து 106
7 நியூசிலாந்து 105
8 வெஸ்ட் இண்டீஸ் 78
9 வங்கதேசம் 55
10 ஜிம்பாப்வே 26
11 அயர்லாந்து 25