சாண எரிவாயு அமைப்பு

வணக்கம் நண்பர்களே. சாண எரிவாயு அடுப்பு பற்றி கேள்விப்பட்டிருப்பீர்கள். கிராமத்தில் உள்ளவர்கள் பார்த்திருக்கலாம். இந்த சாண எரிவாயு எப்படி இயங்குகிறது என்பதை இப்போது காண்போம். இந்த அமைப்பு எங்கள் வீட்டிலேயே உள்ளது. ஐந்து வருடங்களுக்கு மேல் சிறப்பாக இயங்கியது. ஆனால் கடந்த ஒரு வருட காலமாக மாடு இல்லாத காரணத்தால் இயக்கம் நிறுத்தி வைக்கப்பட்டுள்ளது.


சரி செயல் முறையை பார்ப்போம்.

இந்த அமைப்பானது எங்கள் வீட்டிலிருந்து சுமார் 10 மீட்டர் தொலைவில் அமைக்கப்பட்டுள்ளது. இது மூன்று பகுதிகளை கொண்டது.

1. சாணம் கரைக்கும் தொட்டி:



இது சற்று உயரத்தில் அமைக்கப்பட்டுள்ளது. அப்போது தான் சாணம் எளிதாக அடுத்தத் தொட்டிக்கு ஓடும். இந்த தொட்டியில் சுமார் 4 மாட்டின் சாணத்தை நன்றாக கரைத்து கொள்ள வேண்டும். குப்பைகள் எதுவும் கலக்காமல் பார்த்துக் கொள்ள வேண்டும். இந்த தொட்டியில் உள்ள குழாயை அடைத்துவிட்டு சாணத்தை கரைத்து கரைக்க வேண்டும். கரைத்த பின் குழாய் அடைப்பை திறந்து விட வேண்டும்.


2. மையத் தொட்டி:



இது முக்கியமான பகுதி ஆகும். இது முட்டை வடிவில் காணப்படும். அதாவது ஒரு முட்டையை செங்குத்தாக நிறுத்தி வைத்தால் எப்படி இருக்குமோ அதை போல அமைக்கப்பட்டுள்ளது. இந்த தொட்டியில் தான் நொதித்தல் என்ற வினை நிகழ்ந்து வாயு உருவாகிறது. இந்த வாயுவானது குழாய் மூலமாக வீட்டிற்குள் வரும். இந்த
அமைப்பு ஏற்படுத்தும் போது சுமார் 100 மாட்டின் சாணத்தை மொத்தமாக கரைத்து ஊற்ற வேண்டும். இந்த அமைப்பானது பூமிக்குள் புதைக்கப்பட்டதை போல காணப்படும்..

3. சாணம் வெளியேறும் தொட்டி:




இது மூன்றாவது பகுதியாகும். இதன் மூலம் எஞ்சிய சாணம் வெளியேறும். வாயு அதிகமாக உற்பத்தியாகும் போது இத்தொட்டியில் சாணம் உயர்ந்தும், வாயுவின் அளவு குறையும் போது சாணத்தின் அளவு குறைந்தும் இதில் காணப்படும். தினமும் சாணம் கரைப்பதால் அதிகமாகும் சாணம் இத்தொட்டியின் மூலம் வெளியேறுகிறது. இந்த சாணம் அருகேயுள்ள குழியில் சேகரிக்கப்பட்டு பின்னர் விவசாய நிலங்களில் கொட்டலாம்.

அடுப்பு:
நாம் சிலிண்டருக்கு பயன்படுத்தும் அதே அடுப்புதான் இதற்கும் பயன்படுத்தப்படுகிறது.

செலவு:
இதற்கு அரசு மானியம் வழங்கப்பட்டது. அது போக 10000 ரூபாய்க்குள் செலவானது.
தினசரி 4 மாடுகளின் சாணம் இருந்தால் 8 பேர் கொண்ட குடும்பத்திற்கு போதுமான வாயு கிடைக்கும்.

நன்மைகள்:

• இயற்கையானது.
  
• செலவு மிச்சம். எரிவாயு விலை உயர்ந்து வருவதால், இது சிக்கனமானது.
  
• வெடிக்கும் அபாயம் இல்லை.
  
• ஒரு முறை அமைத்து விட்டால், வேறு செலவு எதுவுமில்லை.