மலேசியா: கிளன்மேரி துப்பாக்கிச் சூட்டுச் சம்பவங்கள் மீது மரண விசாரணை நடத்தப்பட வேண்டும் !

மூன்று இளைஞர்கள் கேள்விக்குரிய சூழ்நிலைகளில் மரணமடைந்த கிளன்மேரி துப்பாக்கிச் சூட்டுச் சம்பவம் மீது மரண விசாரணை நடத்தப்பட வேண்டும் என போலீஸ், சட்டத்துறைத் தலைவர் அலுவலகத்துக்குப் பரிந்துரை செய்யும்.

அந்த விவகாரம் மீது போலீஸ் இன்னும் புலனாய்வை முடிக்கவில்லை என்று சிலாங்கூர் போலீஸ் படைத் தலைவர் துன் ஹிசான் துன் ஹம்சா சொன்னார். கடந்த ஆண்டு நவம்பர் மாதம் அந்தச் சம்பவம் நிகழ்ந்தது.

“நாங்கள் மரண விசாரணை நடத்தப்பட வேண்டும் என யோசனை கூறுவதால் அது குறித்து போலீஸ் கருத்துரைப்பது பொருத்தமாக இருக்காது”, என துன் ஹிசான் தெரிவித்தார்.

“என்றாலும் சந்தேகத்துக்குரியவர்களை கைது செய்வதற்காக போலீஸ் நடவடிக்கை எடுத்தது. அதற்கு மேல் நான் கருத்துரைக்க விரும்பவில்லை. ஏனெனில் அது உத்தேச மரண விசாரணையை பாதிக்கக் கூடும்.”

“நாங்கள் புலனாய்வை முடித்துக் கொண்டதும் கூடிய விரைவில் டிபிபி அலுவலகத்துக்கு அறிக்கைகளை அனுப்புவோம்”, என்றும் துன் ஹிசான் தெரிவித்தார்.

புலனாய்வுக்கு ஏன் இவ்வளவு காலம் பிடிக்கிறது என்னும் கேள்விக்குப் பதில் அளித்த சிலாங்கூர் போலீஸ் படைத் தலைவர் பல்வேறு துறைகளிடமிருந்து தகவல்களைப் பெற்றுத் தொகுக்க வேண்டியிருந்ததாக சொன்னார்.

அந்த மூன்று இளைஞர்கள் மீது நடத்தப்பட்ட சவப் பரிசோதனைகள் “சுட்டுக் கொல்லப்படும் பாணியில்” அவர்கள் போலீசாரால் சுடப்பட்டிருப்பதைக் காட்டுவதாக விடுதலைக்கான வழக்குரைஞர் அமைப்பின் பேராளரும் பிகேஆர் உதவித் தலைவருமான என் சுரேந்திரன் நேற்று கூறியிருந்தார்.

அந்த மூன்று இளைஞர்களும் மண்டியிட்ட நிலையில் இருந்த போது அருகில் இருந்து போலீசாரால் சுடப்பட்டதாக கூறப்படுகிறது.

22 வயதான முகமட் ஹனாபி ஒமார், 15 வயதான முகமட் ஷமில் ஹபிஸ் ஷாபியி, 20 வயதான முகமட் ஹைருல் நிஜாம் துவா ஆகிய அந்த மூவரும் கடந்த ஆண்டு நவம்பர் மாதம் 13ம் தேதி ஷா அலாம், கிளன்மேரியில் அதி வேகமாகச் சென்ற காரை விரட்டிச் சென்ற போது போலீசாரால் சுட்டுக் கொல்லப்பட்டதாக கூறப்பட்டது.

அந்த இளைஞர்கள் தங்களை பாராங்கத்திகளைக் கொண்டு தாக்க வந்ததாகவும் அப்போது அவர்கள் சுடப்பட்டதாகவும் போலீஸ் இதற்கு முன்னர் கூறியது.

மலேசியாஇன்று

கிளன்மேரி துப்பாக்கிச் சூட்டுச் சம்பவம் மீது மரண விசாரணை நடத்தப்பட வேண்டும் என போலீஸ் யோசனை கூறும்

டபிள்யூசிபி: கடந்த ஆண்டு நவம்பர் மாதம் அந்தச் சம்பவம் நிகழ்ந்தது. இப்போது தான் மரண விசாரணையா? “நாங்கள் அந்த விவகாரத்தை திறந்துள்ளோம். அந்தத் துப்பாக்கிச் சூட்டுச் சம்பவம் பற்றி புலனாய்வைத் தொடங்கியுள்ளோம்” என்பது அதன் பொருளா?

பொது மக்கள் கண்டனம் தெரிவிக்கா விட்டால் புலனாய்வு ஏதும் இருக்காது. அந்த விவகாரம் “மேல் நடவடிக்கை தேவை இல்லை” முத்திரை குத்தப்பட்டிருக்கும்.

அங்ஸ்வாக்: கொல்லப்பட்ட மூவரும் மலாய்க்காரர்கள் ஆனால் இப்ராஹிம் அலி மௌனமாக இருக்கிறார். அவர் தமது அரசியல் எஜமானர்கள் உயிர்வாழ்வது பற்றி மட்டுமே பேசுகின்றார்.

சரியானவன்: அந்தச் சம்பவத்தில் சம்பந்தப்பட்டவர்களும் பாதிக்கப்பட்டவர்களும் முஸ்லிம்கள். ஆனால் முஸ்லிம் வழக்குரைஞர்கள் மூச்சுக் கூட விடவில்லை. அம்னோ ஆட்சியால் ஒதுக்கப்பட்ட ஏழை மலாய்க்காரர்களை “மற்ற இனங்கள்” பாதுகாக்கும் மற்றொரு விவகாரம் இதுவாகும்.

பெர்ட் தான்: பரந்த சிந்தனைகளைக் கொண்ட மலாய்க்காரர்கள் ஆத்திரமடைந்து போலீஸ் மீது நெருக்குதல் தொடுக்க மாட்டார்களா? மலாய்க்காரர்களுடைய உயிர் என்ன சாதாரணமானதா? அரசு சாரா மலாய் அமைப்புக்கள் எங்கே போயின? இப்ராஹிம் அலி எங்கே போனார்?

டிஎன்எ: அந்தக் “கொல்லப்பட்ட சம்பவம்” நிகழ்ந்து ஏழு மாதங்களாகி விட்டன. போலீசார் இன்னும் விசாரித்துக் கொண்டிருக்கின்றனரா? நீல நிற சீருடை அணிந்த மனிதர்களின் திறமையை அது காட்டுகிறது.

உண்மையில் அரசு ஊழியர்கள் பலர் வேலை செய்யும் முறையே அதுதான். பல பொது விடுமுறைகள், வாரத்திற்கு ஐந்து நாள் மட்டுமே வேலை. ஆண்டு விடுமுறை,”‘பயிற்சி” என்பது உண்மையில் விடுமுறையே. எந்த மன உளைச்சலும் இல்லாமல் கோப்பிக் கடைகளில் உட்கார்ந்து கொண்டிருக்கலாம். நமது இளைஞர்கள் அரசாங்கத்தில் வேலை செய்ய விரும்புவதற்கான காரணங்களும் அவையே.

உங்கள் அடிச் சுவட்டில்: மரண விசாரணை ஏன் தேவை? சவப் பரிசோதனை முடிவுகள் தயாராக இருக்கின்றன. சம்பந்தப்பட்ட போலீஸ் அதிகாரிகள் மீது குற்றம் சாட்டுவதா இல்லையா என்பதை முடிவு சட்டத்துறைத் தலைவருடைய கடமையாகும்.

அடையாளம் இல்லாதவன்_40f4: மரண விசாரணையின் நோக்கமே உண்மையை மறைப்பதும் தாமதத்தை ஏற்படுத்துவதுமாகும். மறைப்பதற்கு காலத்தைக் கடத்தும் முயற்சியே அது. மற்ற சம்பவங்கள் அந்தத் துப்பாக்கிச் சூட்டுச் சம்பவத்தை பின்னுக்குத் தள்ளி விடும் என்றும் அதனால் இறுதியில் அது மறக்கப்பட்டு விடும் என்றும் போலீஸ் நம்புகிறது. பின்னர் கொலைகாரர்கள் சுதந்திரமாக மகிழ்ச்சியாக வாழலாம்.