மரமாய் இருந்தாலும்...மன்னித்து விடு.

**rameshnaga** · **rameshnaga** Fri Jun 10, 2011 1:02 pm

நேற்று வரை-உன்மீது கல்லெறிந்து காயப்படுத்தி இருக்கிறேன்;
உன் உடலெங்கும்-ஆணியால்
என் பெயர்,என் தேர்வு எண், என் பிறந்த தேதி--மற்றும்
எனக்குப் பிடித்த பெயர்கள்...
(இஷ்! உனக்கு மட்டும் இரகசியமாய் ...அவள் பெயரும் கூட..)
எல்லாம் எழுதி இருக்கிறேன்.
நான் விளையாட..உன் கிளைகளை முறித்து இருக்கிறேன்.
உன் பூக்களை, காய்களை ...கசக்கி இருக்கிறேன்.
இன்று யாரோ...
உன் மேல் பால் வடிந்து பார்த்ததாய் சொல்லி விட ....
நீ (திடீர்க்)கடவுளாகி விட்டாய்.
மஞ்சள்..குங்குமம்.,ஆரத்தி.,அர்ச்சனை.,--என
ஊரே விழுகிறது உன் காலில்.
குறி சொல்லும் எவனோ உடுக்கடித்து..ஓங்காரமிட..
ஊரே தன் எதிர்காலம் கேட்கிறது உன்னிடத்தில்..
எனக்கும் பயமாகி விட்டது..
தயவு செய்து--
நேற்று வரை உன்மேல் நான் இழைத்த குற்றங்களைத்
தண்டித்துவிடாதே.