நாட்டில் ரகசியம் உடைந்து வெளிப்படை புரட்சி உருவாகிறது

இந்தியாவில் வெளிப்படை புரட்சி என்னும் புதிய சகாப்தம் நடந்து வருவதாக ராணுவ அமைச்சர் ஏ.கே. அந்தோணி தெரிவித்துள்ளார்.
ஊழலை ஒழிக்க வேண்டும் என்றும் அரசு நிர்வாகத்தில் வெளிப்படைதன்மை வேண்டும் என்றும் சமூக சேவகர் அன்னா ஹசாரே உட்பட பலர் வலியுறுத்தி வருகின்றனர். இந்நிலையில் டெல்லியில் பேட்டியளித்த அமைச்சர் அந்தோணி கூறியதாவது:

நாடு இப்போது புதிய சகாப்தத்தை கடந்து கொண்டிருக்கிறது. இந்தியாவில் வெளிப்படை புரட்சி என்னும் புதிய சகாப்தம் நடந்து வருகிறது. அரசியல், வர்த்தகம், நிர்வாகம், நீதித்துறை உட்பட எல்லா துறைகளிலும் ரகசியம் என்ற சுவர் உடைந்து சிதறுகிறது. இந்த சூழ்நிலை தொடங்கி விட்ட நிலையில் பாதியில் அதை நிறுத்த முடியாது.

அரசு நிர்வாகத்திலும் நடைமுறையிலும் பெரிய மாற்றம் வர வேண்டும் என்று பலரும் கூறுகின்றனர். ஆனால், மாற்றத்துக்கு இந்தியா தயாராக இல்லை. அரசியல்வாதிகள், அதிகாரிகள், தொழிலதிபர்கள், ராணுவம் மற்றும் முக்கிய பொறுப்புகளில் இருப்பவர்கள் யாருமே மாற்றத்துக்கு தயாராக இல்லை. இதுவும் ஜனநாயகத்தின் ஒரு பகுதிதான். ஆனால், ஒரு சில ஆண்டுகளில் மாற்றம் நடக்கும். தகவல் அறியும் உரிமை சட்டம் மூலம் வெளிப்படைதன்மையை உறுதிப்படுத்திய நாடாளுமன்றத்துக்குத்தான் முழு பெருமையும் சேரும்.

தகவல் அறியும் உரிமை சட்டம் 2005ம் ஆண்டு நாடாளுமன்றத்தில் நிறைவேற்றப்பட்டது. வாழ்க்கையின் எல்லா நிலைகளிலும் வெளிப்படைத்தன்மைக்கான புரட்சியை ஏற்படுத்த இது உதவியது. எதிர்காலத்தில் மனித வாழ்க்கையின் எல்லா பக்கங்களும் வெளிப்படையானதாக இருக்கும்.

மக்களிடம் விழிப்புணர்வை ஏற்படுத்துவதிலும் வளமான, ஒளிமயமான நாட்டை உருவாக்குவதிலும் ஊடகங்களின் பங்கு பாராட்டத்தக்கது. நாடு தொழில்மயமாகி வரும் நிலையில் தங்கள் நலன்களுக்காக பல்வேறு குழுக்கள் மோதல்களில் ஈடுபடுகின்றன. இந்த நிலையில், சுயநல சக்திகளோ குழுக்களோ தங்களுக்கு சாதகமாக ஊடகங்களை பயன்படுத்திக் கொள்ள அனுமதிக்க கூடாது. ஊடகங்கள் தங்கள் தனித்தன்மையை பாதுகாக்க வேண்டும். இவ்வாறு அந்தோணி பேசினார்.

-- தட்ஸ் தமிழ்