இறங்குமுகத்தில் அத்தியாவசியப் பொருட்களின் விலை

சேலம்: தமிழகத்தில் ஆட்சி மாற்றம் ஏற்பட்டுள்ளதன் எதிரொலியாக, அத்தியாவசிய பொருட்களின் விலை சரிந்து வருகிறது.
தமிழக சட்டசபை தேர்தலில், அத்தியாவசிய பொருட்களின் விலை ஏற்றம் தாக்கத்தை ஏற்படுத்தியது. அ.தி.மு.க., சார்பில் அறிவிக்கப்பட்ட தேர்தல் அறிக்கையிலும் சரி, பிரசாரத்தின் போதும் விலைவாசி உயர்வை கட்டுப்படுத்த நடவடிக்கை எடுக்கப்படும் என தெரிவிக்கப்பட்டது. கடந்த 2011 மார்ச் மாதத்தை ஒப்பிடுகையில், தற்போது அனைத்து வகையான அத்தியாவசிய பொருட்களின் விலையிலும் சரிவு ஏற்பட துவங்கி உள்ளது. பருப்பு, சர்க்கரை, வெல்லம், கோதுமை ஆகியவற்றின் விலையில் சரிவு ஏற்பட்டிருப்பது, இவற்றை மூலப்பொருளாக கொண்டு தயாரிக்கப்படும் உணவு பொருட்களின் விலையிலும் சற்று சரிவை ஏற்படுத்தி உள்ளது. பருப்பு வகைகளை பொறுத்தவரை துவரம் பருப்பு கிலோ, 72 ரூபாய்க்கு விற்றது, 66 ரூபாயாகவும், பாசி பருப்பு, 76 ரூபாய்க்கு விற்றது, 68 ரூபாயாகவும், பாசிப்பயிறு, 77 ரூபாய்க்கு விற்றது, 65 ரூபாயாக சரிவு ஏற்பட்டுள்ளது. அதே நேரத்தில் உளுந்தம் பருப்பு விலையில் மாற்றம் இன்றி கிலோ, 77 ரூபாயாக நீடிக்கிறது. சர்க்கரை கிலோ, 34 ரூபாய்க்கு விற்றது, 31 ரூபாயாகவும், மஞ்சள் கிலோ, 200 ரூபாய்க்கு விற்றது, 120 ரூபாயாகவும், மிளகு, 320 ரூபாய்க்கு விற்றது, 300 ரூபாயாகவும், சீரகம், 265 ரூபாய்க்கு விற்றது, 225 ரூபாயாக சரிந்துள்ளது. ஏலக்காய் கிலோ, 1,800 ரூபாய்க்கு விற்றது, 1,000 ரூபாயாகவும், கருப்பட்டி கிலோ, 110 ரூபாய்க்கு விற்றது, 80 ரூபாயாகவும், வெல்லம் கிலோ, 44 ரூபாய்க்கு விற்றது, 38 ரூபாயாக குறைந்துள்ளது. கடலை பருப்பு, 46 ரூபாய்க்கு விற்றது, 41 ரூபாயாக சரிந்ததை தொடர்ந்து, கடலை மாவின் விலை, 48 ரூபாயிலிருந்து, 44 ரூபாயாக சரிந்துள்ளது. மஞ்சள் விலை சரிவை அடுத்து மஞ்சள் தூளின் விலை, 240 ரூபாயிலிருந்து, 160 ரூபாயாக குறைந்துள்ளது.
அனைத்து வகையான அரிசிகளின் விலையில் சராசரியாக, 10 சதவீதம் வரை சரிவு ஏற்பட்டுள்ளது. பஞ்சாப் கோதுமை கிலோ, 26 ரூபாய்க்கு விற்றது, 23 ரூபாயாக குறைந்துள்ளது. கோதுமை விலை சரிவை அடுத்து ஆட்டா மாவு, சப்பாத்தி, பூரி மாவுகளின் விலையில் விரைவில் சரிவு ஏற்படும் என வியாபாரிகள் தெரிவித்தனர். கோதுமை விலை சரிவை அடுத்து, சம்பா ரவையின் விலை, 90 ரூபாய்க்கு விற்றது, 74 ரூபாயாக குறைந்துள்ளது. மார்க்கெட்டில் தட்டுப்பாடு காரணமாக மிளகாய் விலையில் கடும் உயர்வு ஏற்படும் நிலையில், மஞ்சள் விலையில் சரிவு ஏற்பட்டுள்ளதால், சாம்பார் பொடி, ரச பொடி, புளிக்குழம்பு, காரக்குழம்பு, கறிமசால், சிக்கன் மசால் பொடிகளின் விலையில் உயர்வு ஏற்படாமல் கட்டுக்குள் உள்ளது. மிளகாய் விலையில் சரிவு ஏற்படும் பட்சத்தில், ரெடிமேடு பொடிகளின் விலையில் சரிவு ஏற்படும் என்கின்றனர் வியாபாரிகள். அத்தியாவசிய பொருட்களின் விலை இறங்குமுகத்தில் உள்ள நிலையில், எண்ணெய் வகைகளின் விலையில் சற்று உயர்வு ஏற்பட்டு வருகிறது. தமிழகத்தில் மின் தட்டுப்பாடு சரி செய்யப்படும் நிலையில், எண்ணெய் விலைகளிலும் சரிவு ஏற்படும் என, எண்ணெய் ஆலை அதிபர்கள் தெரிவிக்கின்றனர்.
நன்றி தின மலர்