பொடுகுத் தலையுடன் திரியும் 70 சதவீத இந்தியர்கள்-சர்வே

kitcha · kitcha Mon Jun 06, 2011 10:14 pm

மும்பை: இந்தியர்களில் 70 சதவீதம் பேர் தலையில் பொடுகுத் தொல்லையுடன் இருப்பதாக சர்வே ஒன்று தெரிவிக்கிறது.

உலகிலேயே மோசமான தலையுடன் இருப்பதும் இந்தியர்கள்தானாம். அதாவது பொடுகுத் தலையுடன் இருப்பது இந்தியர்கள் தான் அதிகமாம்.

யூனிலீவர் நிறுவனத்தின் சார்பில் கிளியர் பாரீஸ் கழகம் என்ற நிறுவனம் நடத்திய சர்வேயில் இந்த முடிவு தெரிவிக்கப்பட்டுள்ளது. யூனிலீவர் நிறுவனம் ஷாம்பு தயாரிக்கும் நிறுவனம் என்பதால் இந்தியர்களின் தலையில் தனது தயாரிப்புகளை குவிக்கும் நோக்கில் இந்த சர்வேயை வெளியிட்டுள்ளதோ என்ற சந்தேகம் எழுகிறது.

இந்த நிறுவனத்தின் சர்வேயில் கூறப்பட்டுள்ளதாவது...

இந்தியர்களில் 70 சதவீதம் பேருக்கு பேண் மற்றும் பொடுகுத் தொல்லை இருக்கிறது. கடந்த 12 மாதங்களில் நடத்தப்பட்ட சர்வே மூலம் இது தெரிய வந்துள்ளது.

அதிலும் 18 முதல் 30 வயது வரை உடையோர்தான் அதிக அளவில் பொடுகுத் தொல்லையால் பாதிக்கப்பட்டுள்ளனர்.

உலகம் முழுவதும் பிரேசில், மெக்ஸிகோ, இந்தியா, ரஷ்யா, ஜெர்மனி, இந்தோனேசியா, தாய்லாந்து, வியட்நாட், பிலிப்பைன்ஸ் ஆகிய நாடுகளைச் சேர்ந்த 13,000 பேரிடம் இதுதொடர்பாக பேட்டி காணப்பட்டதாக அந்த நிறுவனம் தெரிவிக்கிறது.

தட்ஸ்தமிழ்

**கே. பாலா** · **கே. பாலா** Tue Jun 07, 2011 1:50 am

மிளகு தூளுடன் பால் சேர்த்து தலையில் தேய்த்து சில நிமிடங்கள் ஊறிய பின் குளித்தால், பொடுகு தொல்லை நீங்கும்.

*வெந்தயத்தை தலைக்கு தேய்த்து குளித்தால், உடல் உஷ்ணம் குறைவதுடன் பொடுகு தொல்லை நீங்கும்.

*தலையில் சிறிதளவு தயிர் தேய்த்து சில நிமிடங்கள் கழித்து ஷாம்பு அல் லது சீயக்காய் தேய்த்து குளித்தால், பொடுகு நீங்கும்.

*வேப்பிலை கொழுந்து, துளசி ஆகியவற்றை நைசாக அரைத்துத் தலையில் தேய்த்து சிறிது நேரம் கழித்து குளித்தால் பொடுகு தொல்லை நீங்கும்.

*வசம்பை நன்கு பவுடராக்கி, தேங்காய் எண்ணெயில் ஊற வைத்து, அந்த எண்ணெயை தலையில் தேய்த்து வந்தால் பொடுகு மறைந்து போகும்.

* எலுமிச்சம் பழச்சாற்றுடன், தேங்காய் எண்ணெய் கலந்து தலையில் தேய்த்து வந்தாலோ அல்லது எலுமிச்சம் பழச்சாறுடன், தயிர் மற்றும் பச்சை பயிறு மாவு கலந்து தலையில் தேய்த்து சில நிமிடங்கள் கழித்து ஷாம்பு போட்டு குளித்தாலும் பொடுகு நீங்கும்.

*தலைக்கு குளிக்கும் போது, கடைசியாக குளிக்கும் தண்ணீரில், வினிகர் கலந்து குளித்தால், பொடுகு நீங்கும்.

*நெல்லிக்காய் தூள், வெந்தயப் பொடி, தயிர் மற்றும் கடலைமாவு கலந்து தலையில் தேய்த்து, சிறிது நேரம் கழித்து குளிக்க வேண்டும். இவ்வாறு வாரம் ஒரு முறை செய்து வர பொடுகு நீங்கும்.

*வாரம் ஒரு முறை, மருதாணி இலையை அரைத்து, சிறிதளவு தயிர் மற்றும் எலுமிச்சை சாறு கலந்து தலையில் தேய்த்தால், பொடுகு தொல்லை நீங்கும்.

*தேங்காய் எண்ணெயில் வெந்தயத்தை சேர்த்து காய்ச்சி, தலையில் தேய்த்து வந்தால், பொடுகு பிரச்னை நீங்கும்.

*தேங்காய் பால் எடுத்த பின் கையை தலையில் நன்றாகத் தேய்த்து, சிறிது நேரம் கழித்து மிதமான நீரில் தலையை அலசினால் பொடுகு, மறைந்து விடும்.

*முதல்நாள் சாதம் வடித்த தண்ணீரை எடுத்து வைத்து, மறுநாள் அதை தலையில் தேய்த்து குளித்தால், பொடுகு நீங்கும்.

*தயிர், முட்டை மற்றும் எலுமிச்சை சாறு கலந்து தலையில் தேய்த்துக் குளிக்க பொடுகு மறையும்.

*துளசி, கறிவேப்பிலையை அரைத்து எலுமிச்சம்பழச்சாற்றுடன் கலந்து தலையில் தடவி சிறிது நேரம் கழித்து குளித்தால் பொடுகு பிரச்னை நீங்கும்