திருட்டு காக்கா!

முன்னொரு காலத்தில் ஒரு குருவியும், காகமும் நண்பர்களாக இருந்தன. ஒரு நாள் அவை இரண்டும் இரை தேடச்சென்றன. ஒரு பாயில் தானியங்கள் காய வைத்திருப்பதைக் காகம் கண்டது. இந்தத் தானியங்களை நம் இருவரில் யார் நிறையச் சாப்பிடுகின்றனர் என்று பார்க்கலாம்,'' என்றது காகம்.

""சரி பார்க்கலாம்,'' என்றது குருவி.

""நம்மில் வெற்றி பெற்றவர் மற்றவரைத் தின்று விடலாம்,'' என்றது காகம்.

காகம் ஏதோ வேடிக்கைகக்குச் சொல்கிறது என்று நினைத்து, குருவி சிரித்துக் கொண்டே ஒத்துக் கொண்டது. நண்பர்கள் ஒருவரையொருவர் தின்பார்களா என்ன?

குருவி ஒவ்வொரு தானியமாகக் கொத்திக் கொத்தித் தின்றது. ஆனால், காகம் திருட்டுத் தனம் செய்தது. தான் தின்ற ஒவ்வொரு தானியத்துக்கும் அதைப் போல் மூன்று பங்கைப் பாய்க்கு அடியில் குருவிக்குத் தெரியாமல் மறைத்துவிட்டது.
""நான் தான் ஜெயித்தேன்! இப்போது உன்னைத் தின்னப் போகிறேன்,'' என்றது காகம். காகத்தின் சூழ்ச்சியைக் குருவி புரிந்து கொண்டது.

""சரி நான் சொன்ன சொல் மீற மாட்டேன். ஆனால், என்னைத் தின்பதற்கு முன்பாக நீ உன் அலகைச் சுத்தம் செய்து கொண்டு வா; நீ கண்டதை எல்லாம் தின்னும் அசுத்தமானவன் ஆயிற்றே!'' என்று குருவி பதிலளித்தது.

காகம் உடனே ஆற்றை நோக்கிச் சென்றது.

ஆற்றிடம் சென்று ""ஆறே! ஆறே! எனக்குக் கொஞ்சம் தண்ணீர் தா. என் அலகைக் கழுவ,'' என்றது.

""உனக்குத் தண்ணீரா வேண்டும்? நல்லது! ஆனால், நீ கண்ட அசுத்தங்களையும் தின்பதாக எல்லாரும் கூறுகிறார்களே... உன்னுடைய அலகை என் நீரில் கழுவ வேண்டும் என்றால் பானை ஒன்று கொண்டு வந்து அதில் தேவையான அளவு நீர் மொண்டு கொள்,'' என்று பதில் கூறியது ஆறு.

காகம் கிராமத்திலுள்ள குயவரை நாடிச் சென்றது. ""குயவரே! குயவரே! தண்ணீர் எடுத்து என் அலகைக் கழுவ பானை ஒன்று வேண்டும்,'' என்றது.

""உனக்குப் பானையா வேண்டும்? ஆனால், என்னிடம் பானை செய்யக் களிமண் இல்லையே... நீ களி மண் கொண்டு வந்தால் பானை செய்து தருகிறேன்,'' என்றான் குயவன்.

களி மண் எடுக்கக் காகம் வயலுக்குச் சென்று மண்ணைக் கொத்தத் துவங்கியது.

""நீ அழுகிய பொருட்களையும் அசுத்தங்களையும் தின்பவன் என்பது உலகம் முழுவதும் தெரியும். உன் அலகால் மண்ணைக் கொத்த நான் அனுமதிக்கமாட்டேன். தேவையானால் மண் வெட்டியால் எடுத்துக் கொள்,'' என்றது பூமி.

மண் வெட்டி வாங்கக் கொல்லர் ஒருவரைத் தேடிச் சென்றது காகம்.

""கொல்லரே கொல்லரே மண்ணைத் தோண்ட மண்வெட்டி ஒன்று வேண்டும்,'' என்று கேட்டது.

""உனக்கு மண்வெட்டியா தேவை? ஆனால், என் உலையில் இப்போது நெருப்பு இல்லையே நான் மண்வெட்டி செய்து தர வேண்டுமானால், நீ நெருப்புக் கொண்டு வர வேண்டும்,'' என்றார் கொல்லர்.

காகம் அருகில் இருந்த ஒரு விவசாயியின் வீட்டுக்குச் சென்றது. விவசாயியின் மனைவி சமைத்துக் கொண்டிருந்தாள்.

அவளைப் பார்த்துக் காகம் நெருப்புத் துண்டு ஒன்று வேண்டும் என்று கேட்டது.

காகம்! ""உனக்கு நெருப்பா தேவை! எப்படி எடுத்துச் செல்வாய்,'' என்று கேட்டாள் விவசாயியின் மனைவி.

""என் முதுகின் மேல்,'' ளஎன்றது காகம்.

விவசாயியின் மனைவி நெருப்புத் துண்டை காகத்தின் முதுகின் மேல் வைத்தாள். அவ்வளவுதான். காகத்தின் இறக்கைகள் தீப்பிடித்து எரிந்தன. பேராசை பிடித்த காகம் தீயில் எரிந்து சாம்பலாயிற்று. நேர்மையான குருவியோ நீண்ட காலம் வாழ்ந்தது.