“கனிமொழியை 2 மாதங்களுக்கு வெளியே கொண்டுவர முயலவேண்டாம்!”

இந்த அட்வைஸை கலைஞர்வரை கொண்டுபோனவர் அமைச்சர் தயாநிதி மாறன் என்பதாக ஒரு கதை இருக்கின்றது.
டில்லி, இந்தியா: கனிமொழியை ஜாமீனில் வெளியே கொண்டுவர கலைஞர் தீவிரமாக முயன்றுகொண்டிருப்பது ஒன்றும் ரகசியமல்ல. ஆனால், முக்கிய நபர் ஒருவரிடமிருந்து கொடுக்கப்பட்டுள்ள ஒரு அட்வைஸ்தான் மிகவும் ஹாட்டாம்! அதைக் கேட்டு கலைஞரே அதிர்ந்து போயிருப்பதாகக் கூறுகின்றார்கள்.

அப்படி என்னதான் அந்த அட்வைஸ்?

“கனிமொழியை அடுத்த இரண்டு மாதங்களுக்காவது ‘உள்ளே’ வைத்திருப்பதுதான் லாங் ரன்னில் உங்களுக்கு நல்லது. இதை விரைவில் நீங்களே புரிந்து கொள்வீர்கள்” என்பதுதானாம் அந்த அட்வைஸ்!

இந்த அட்வைஸூடன் சேர்ந்து வேறு என்ன தகவல்களும் சொல்லப்பட்டனவோ தெரியவில்லை, இரண்டு மாதங்களுக்கு கம்மென்று இருப்பதுதான் நல்லது என்றே கலைஞரும் முடிவெடுக்க வேண்டிய நிலையில் இருக்கிறாராம்.

சுருக்கமாகச் சொன்னால், இதில் வேறு ஏதோ ஒன்றும் இருக்கிறது. இதுவரை சி.பி.ஐ.யால் பகிரங்கப்படுத்தப்படாத ஒரு விவகாரம் இதில் சங்கிலித் தொடர்போல இருக்கிறதாம். அதனால்தான் அடுத்த இரண்டு மாதங்களுக்கு தேவையில்லாமல் யாரையும் ‘அலர்ட்’ பண்ண வேண்டாம் என்ற அறிவுரையாம்.

இந்த அட்வைஸை கலைஞர்வரை கொண்டுபோனவர் அமைச்சர் தயாநிதி மாறன் என்பதாக ஒரு கதை இருக்கின்றது. அது உண்மையானால், அட்வைஸ் டில்லியிலுள்ள யாரிடமோ இருந்துதான் சென்றிருக்க வேண்டும்.

கடந்த வார இறுதியில் அமைச்சர் தயாநிதி மாறன் – கலைஞர் சந்திப்பு சென்னையில் நடைபெற்றிருக்கின்றது. இது பலருக்கும் தெரியும்படி வெளிப்படையாகவே நடைபெற்ற சந்திப்புதான். ஆனால், அந்தச் சந்திப்பின்போது, கலைஞரும் தயாநிதி மாறனும் மிகத் தனிமையில் சில நிமிடங்கள் பேசிக்கொண்டிருந்தபோது, குடும்பத்தினர் உட்பட யாருமே அந்த ரூமுக்குள் அனுமதிக்கப்படவில்லை.

இந்தச் சந்திப்பின்போதுதான் மேற்கண்ட அட்வைஸ், தயாநிதி மாறனால் கூறப்பட்டது என்பதே பேச்சு.

இதற்கிடையே மற்றொரு வேடிக்கையும் நடந்திருக்கின்றது. தயாநிதி மாறன் – கலைஞர் சந்திப்பு வார இறுதி நாளில் அல்லவா நடைபெற்றது? தயாநிதி மாறன் சென்னையில் கலைஞரைச் சந்திக்குமுன், வார நாட்களில் டில்லியில் யார்யாரையெல்லாம் சந்தித்தார் என்ற தகவல்களைச் சேகரிக்கத் தொடங்கியிருக்கின்றது தமிழக அரசின் உளவுப்பிரிவு.

இதில் வேடிக்கை என நாம் குறிப்பிட்டது எதைத் தெரியுமா? தமிழக உளவுத்துறை அதிகாரி ஒருவர் சென்னையிலிருந்து போன்போட்டு இந்த விபரங்களை விசாரித்தது, டில்லியிலுள்ள தமிழ் பத்திரிகையாளர் ஒருவரைத்தான்!

தமிழக உளவுத்துறை டில்லியில் வைத்திருந்த பழைய கான்டாக்ட் எல்லாம் மாறிவிட்டதோ, என்னவோ!

இவ்வளவும் சரி. இரண்டு மாதங்களுக்கு கனிமொழியைவெளியே கொண்டுவர முயலவேண்டாம் என்ற அட்வைஸில், அதென்ன இரண்டு மாதக் கணக்கு?

ஸ்பெக்ரம் வழக்கின் 3வது குற்றப்பத்திரிகை இன்னமும் தயாரித்து முடிக்கப்படவில்லை. சி.பி.ஐ. என்னதான் வேகப்படுத்தினாலும், சட்ட விவகாரம் என்பதால் ஆமைபோலவே காரியங்கள் நகர்கின்றனவாம். அதனால், 3வது குற்றப் பத்திரிக்கை தயாரிக்கப்பட்டு தாக்கல் செய்யப்பட, இன்னமும் இரண்டு மாதங்கள் ஆகிவிடும் என்கிறார்கள்.

அந்தக் குற்றப் பத்திரிகையில் வேறு யாருடைய பெயர்கள் எல்லாம் இருக்கின்றதோ!

கலைஞருக்கு முக்கிய இடத்திலிருந்து கொடுக்கப்பட்ட அட்வைஸ் விஷயம் உண்மையானால், சில விஷயங்களை ஊகிக்கலாம்.

• இந்த 3வது குற்றப்பத்திரிகையில் கலைஞர் குடும்பத்திலுள்ள மற்றொருவர் இணைக்கப்பட சான்ஸ் இருக்கின்றது.

• கனிமொழி விஷயத்தில் அதிக நெருக்கடி கொடுக்காவிட்டால், ஒருவேளை அந்த நபருக்குத் தலை தப்பலாம்!

கொடுக்கப்பட்டதாகக் கூறப்படும் அட்வைஸை மீண்டும் ஒருமுறை படித்துப் பாருங்கள். இப்போது, கொஞ்சம் அதிகமாகவே புரியும்-

“கனிமொழியை அடுத்த இரண்டு மாதங்களுக்காவது ‘உள்ளே’ வைத்திருப்பதுதான் லாங் ரன்னில் உங்களுக்கு நல்லது. இதை விரைவில் நீங்களே புரிந்து கொள்வீர்கள்”

vivi