சி.ஐ.ஏ.யின் ஒரு ரகசியம், இன்றிரவு அம்பலம்!

இந்த ரகசியம் இரு சி.ஐ.ஏ. உளவாளிகளைப் பற்றியது. இருவரும், உளவு பார்ப்பதற்காக சீனாவுக்குச் சென்றவர்கள்.
வாஷிங்டன், அமெரிக்கா: பல வருடங்களாக சி.ஐ.ஏ. தமக்குள்ளேயே புதைத்து வைத்திருந்த ரகசியம் ஒன்றை இன்றிரவு (வியாழக் கிழமை) வெளியிடுகின்றது. சி.ஐ.ஏ.யால் உளவுபார்க்க அனுப்பப்பட்ட இரு உளவாளிகளுக்கு என்ன நடந்தது என்ற விபரங்களே இங்கு குறிப்பிடப்படும் ரகசியம்.

இந்த இரு உளவாளிகளுக்கும் என்ன நடந்தது என்ற விபரங்கள் சி.ஐ.ஏ.யால் ஒரு டாக்குமென்ட்ரியாகப் படம்பிடிக்கப் பட்டிருந்தது. அதை சி.ஐ.ஏ., தமது உளவாளிகளுக்கு மாத்திரமே காண்பித்து வந்திருக்கிறது. இதுவரையும், வெளியே பொதுமக்களின் பார்வைக்கு விடவில்லை.

குறிப்பிட்ட இரு சி.ஐ.ஏ. உளவாளிகளும், உளவு பார்ப்பதற்காக சீனாவுக்கு அனுப்பி வைக்கப்பட்டவர்கள். அனுப்பி வைக்கப்பட்ட ஆண்டு, 1952.

சீனாவில் உளவு வேலையில் ஈடுபட்டுக்கொண்டிருந்தபோது, இருவரும் அகப்பட்டுக் கொண்டார்கள். சீனா அவர்களை ரகசியச் சிறையொன்றில் அடைத்து வைத்திருந்தது. பல வருடங்களாக அவர்கள் சிறையிலேயே இருக்க வேண்டியதாயிற்று.

தமது உளவாளிகளை சி.ஐ.ஏ. எப்படிக் கவனித்துக் கொள்கின்றது என்பதற்கு ஒரு உதாரணமாகவே இந்த இருவரையும் பற்றிய டாக்குமென்ட்ரி தயாரிக்கப்பட்டது. அதனால்தான், சி.ஐ.ஏ.யிலுள்ள மற்றைய உளவாளிகள் அனைவருக்கும் காண்பிக்கப்பட்டது. (உங்களுக்கு ஏதாவது அசம்பாவிதம் நடந்தால், நாங்கள் கைவிட மாட்டோம் என்ற மெசேஜ் இதில் உள்ளது!)

இரு உளவாளிகளும் சீனாவில் அகப்பட்டுக்கொண்ட விஷயம் தெரியவந்ததும், அவர்களை விடுவிக்க சி.ஐ.ஏ. என்னென்ன நடவடிக்கைகளை எடுத்தது, சீனாவிலும் அவர்களுக்கு எப்படி ரகசியமாக உதவி செய்தது, அவ்விருவரின் அமெரிக்காவிலுள்ள குடும்பத்தினரது பணத் தேவைகளை சி.ஐ.ஏ. எப்படிக் கவனித்துக் கொண்டது, இறுதியில் அவர்களை எப்படி வெளியே கொண்டுவந்தது… என்று சகல விபரங்களும் இதில் படமாக்கப்பட்டுள்ளது.

1952ல் அகப்பட்டுக்கொண்ட இவ்விருவரில் ஒருவர், 1971ல் விடுவிக்கப்பட்டார். மற்றையவர் 1973ல் வெளியே வந்தார்.

சி.ஐ.ஏ. தனது உளவாளிகளுக்குக் காண்பிப்பதற்காக இப்படியொரு டாக்குமென்ட்ரியை வைத்திருக்கிறது என்ற விபரம், எப்படியோ அசோசியேட்டட் பிரஸ் செய்தி நிறுவனத்துக்குத் தெரியவந்துவிட்டது. உடனே அவர்கள் அமெரிக்க தகவல் அறியும் சட்டத்தின்மூலம், இதன் பிரதியொன்று தமக்கும் வழங்கப்பட வேண்டும் என விண்ணப்பித்தனர்.

சட்டப்படி உத்தரவு வரவே, வேறு வழியின்றி சி.ஐ.ஏ. டாக்குமென்ட்ரியின் பிரதியொன்றை அவர்களுக்கு கொடுக்க வேண்டியதாகிவிட்டது. விஷயம் வெளியே வந்துவிட்டதில், பொதுமக்களும் பார்க்கட்டுமே என்று இன்றிரவு டாக்குமென்ட்ரியைத் திரையிடுகின்றது சி.ஐ.ஏ.

அமெரிக்காவின் ஓகியோ மாகாணம், டேய்டன் நகரில் அமைந்துள்ள ரைட் பட்டர்சன் விமானப்படைத் தளத்தில் இன்றிரவு பொதுமக்கள் பார்வைக்காக ஒரு ஷோ காண்பிக்கப்படுகின்றது. நீங்கள், அந்த ஏரியாவில் வசித்தால், போய்ப் பாருங்கள்.


வி.வி