தயாநிதி மாறன், மேலும் மேலும் இறுகுகிறார்!

ஆ.ராசாவை பதவியிலிருந்து நீக்கவேண்டும் என்ற கோரிக்கை எழுந்தபோதும், இதுபோலவே மத்திய அரசு தயக்கம் காட்டியது.
புதுடில்லி, இந்தியா: மத்திய அமைச்சர் தயாநிதி குடும்பத்திற்கு சொந்தமான சன் குழுமம், 2G ஸ்பெக்ட்ரம் ஒதுக்கீட்டின் மூலம் லாபமடைந்துள்ளது என்ற குற்றச்சாட்டு நன்றாகவே பற்றிக்கொண்டு விட்டது. பிரதான எதிர்க்கட்சி பாரதீய ஜனதா, அமைச்சர் மாறன் உடனடியாகப் பதவி விலக வேண்டும் என்பதில் முனைப்புடன் நிற்கின்றது.

பாரதீய ஜனதாக் கட்சியின் பொது செயலர் ஜகத் பிரகாஷ், “தயாநிதி மாறன், உடனடியாக அமைச்சர் பதவியிலிருந்து விலக வேண்டும். விலகாவிட்டால், பிரதமர் தலையிட்டு அவரை அமைச்சர் பதவியிலிருந்து நீக்க வேண்டும்’ என்று கூறியிருக்கின்றார்.

மார்க்சிஸ்ட் கம்யூனிஸ்ட் கட்சியும், தயாநிதி மாறனின் பதவி விலகலைக் கோருகின்றது.

மார்க்சிஸ்ட் கம்யூனிஸ்ட் கட்சியின் பொலிட் பீரோ உறுப்பினர் யெச்சூரி, “தயாநிதி மாறன் மீதான குற்றச்சாட்டுகள் குறித்து, கடந்த 2008 பிப்ரவரி மாதத்திலேயே, நான் பிரதமரின் கவனத்திற்கு கொண்டு சென்றிருந்தேன். ஆனால், இதுவரை எந்த நடவடிக்கையும் எடுக்கப்படவில்லை. தயாநிதி மாறன் உடனடியாக அமைச்சர் பதவியிலிருந்து விலக்கப்பட வேண்டும்” என்று தெரிவித்துள்ளார்.

காங்கிரஸ் கட்சி, தயாநிதி மாறனின் பதவி விலகல் கோரிக்கைகள் குறித்து, இதுவரை கருத்து ஏதும் கூறவில்லை. ஆயினும், அக்கட்சியின் முக்கியஸ்தர்கள் சிலர், தயாநிதி மாறன் அமைச்சர் பதவியிலிருந்து விலக்கப்பட வேண்டும் என்றே தலைமைக்கு அழுத்தம் கொடுத்து வருவதாகத் தெரியவருகின்றது.

தயாநிதி மாறனை, மேலும் அமைச்சராக வைத்திருப்பது மத்திய அரசுக்கு கெட்ட பெயரைச் சம்பாதித்துக் கொடுக்கும் என்பது அவர்களது முதலாவது பாயின்ட். அடுத்தது, அவரைப் பதவியில் தொடர்ந்தும் வைத்திருப்பது காங்கிரஸ் கட்சிக்கு, ஊழலுக்குத் துணை போன கட்சி என்ற இமேஜைக் கொடுக்கும் என்பது அவர்களது வாதம்.

இதற்குமுன் ஆ.ராசா அமைச்சர் பதவியிலிருந்து நீக்கப்பட வேண்டும் என்ற கோரிக்கை பரவலாக எழுந்தபோதும், மத்திய அரசு தயக்கம் காட்டியிருந்தது. ஆயினும் இறுதியில், ஆ.ராசாவை விலக்க வேண்டும் என்ற கோரிக்கைகள் வலுப்படவே, அவர் பதவி விலக வேண்டிய நிலை ஏற்பட்டது. தற்போது ஆ.ராசா, திகார் சிறையில் இருக்கிறார்.

இப்போது, தயாநிதி மாறனின் டேர்னா?


வி.வி