அணுஉலை பாதுகாப்பில் உலகத் தரம் வாய்ந்த தடுப்பு நடவடிக்கைகள்:

அணுஉலை பாதுகாப்பில் உலகத் தரம் வாய்ந்த தடுப்பு நடவடிக்கைகள்: பிரதமர் மன்மோகன் சிங் வேண்டுகோள்


அணு உலை பாதுகாப்பு தொடர்பாக உலகத் தரம் வாய்ந்த தடுப்பு நடவடிக்கை திட்டங்களை உருவாக்குமாறு தேசிய பேரிடர் மேலாண்மை ஆணையத்தை பிரதமர் மன்மோகன் சிங் கேட்டுக் கொண்டார். நாடு முழுவதும் 35 நகரங்களில் கதிரியக்க அளவு மானி பொருத்தப்பட உள்ளது.

ஆலோசனை கூட்டம்

ஜப்பானில் புகுஷிமா அணுஉலையில் சுனாமியால் பாதிப்பு ஏற்பட்டு அணுக்கதிர் வீச்சு ஏற்பட்டது. இதுபோல, கடந்த 22-ந் தேதி அன்று பாகிஸ்தான் கராச்சி அணுமின் நிலையம் மீது தீவிரவாதிகள் தாக்குதல் நடத்தினர். எனவே, இந்தியாவில் உள்ள அணு உலைகளின் பாதுகாப்பு குறித்து ஆய்வு செய்வதற்காக அவசர ஆலோசனை கூட்டத்தை பிரதமர் மன்மோகன் சிங் கூட்டினார்.

டெல்லி ரேஸ்கோர்ஸ் சாலையில் அமைந்துள்ள பிரதமர் இல்லத்தில் நடந்த இந்த உயர்மட்ட கூட்டத்தில் உள்துறை மந்திரி ப.சிதம்பரம், மத்திய மந்திரி சரத்பவார் மற்றும் தேசிய பேரிடர் மேலாண்மை ஆணைய அதிகாரிகள், அணுசக்தி துறை அதிகாரிகள் ஆகியோர் கலந்து கொண்டனர். அப்போது, நாடு முழுவதும் உள்ள அணு உலைகளின் முன்னெச்சரிக்கை பாதுகாப்பு ஏற்பாடுகள் குறித்து ஆய்வு செய்யப்பட்டது.

கதிர்வீச்சை அளக்கும் கருவி

மேலும், அணு உலைகளை பாதுகாப்பதில் உலகத் தரம் வாய்ந்த தடுப்பு நடவடிக்கை திட்டங்களை உருவாக்குமாறு தேசிய பேரிடர் மேலாண்மை ஆணையத்தை பிரதமர் மன்மோகன் சிங் கேட்டுக் கொண்டார். அணு உலை பாதுகாப்பு விஷயத்தில் ஒரு சிறு துரும்பு அளவுக்கு கூட, பிசகு ஏற்படக் கூடாது என்பதில் மத்திய அரசு உறுதியாக உள்ளதாக மூத்த அதிகாரி ஒருவர் தெரிவித்தார்.

ரசாயன கதிர்வீச்சு, கதிரியக்க வெளிப்பாடு, அணு உலை விபத்து போன்ற நெருக்கடியான சூழ்நிலைகளை எப்படி எதிர் கொள்வது என்பது குறித்தும் கூட்டத்தில் விவாதிக்கப்பட்டது. அதன் தொடர்ச்சியாக, 10 லட்சம் மக்கள் தொகைக்கு மேல் உள்ள 35 நகரங்களில் `கதிர்வீச்சு அளவு மானி' (டோசி மீட்டர்) பொருத்த முடிவு செய்யப்பட்டது. அதன்படி, ஆயிரம் போலீஸ் நிலையங்களில் இந்த கருவி பொருத்தப்படும்.

239 மாவட்டங்கள்

இதுபோல, 22 மாநிலங்களில் உள்ள 239 மாவட்டங்களை அதிகபட்ச (4 மற்றும் 5-ம் நிலை) பூகம்ப அபாய பகுதியாக அறிவிக்கப்பட்டுள்ளது. அந்த மாவட்டங்களில் `தேசிய பூகம்ப அபாயத்தை தணிக்கும் திட்டம்' செயல்படுத்த கூட்டத்தில் தீர்மானிக்கப்பட்டது. சுனாமி முன்னெச்சரிக்கை அறிவிப்பு மற்றும் சுனாமியால் ஏற்படும் சேதம் குறித்து முன்கூட்டிய தகவல் அளிப்பது போன்ற கருவிகளில் தரம் உயர்த்தவும் முடிவு செய்யப்பட்டிருக்கிறது.

பேரிடர் சம்பவத்துக்கு பிறகு, வீடுகள் கட்டுதல், சாலைகள் அமைத்தல் போன்ற உள்கட்டமைப்பு வசதிகளை மீண்டும் ஏற்படுத்துவதற்காக வங்கிகள் நிதியுதவி வழங்கவும் அறிவுறுத்தப்பட்டுள்ளது. அதற்கான வழிகாட்டுதல் சுற்றறிக்கையை அனைத்து வங்கிகளுக்கும் ரிசர்வ் வங்கி அனுப்ப இருக்கிறது. பள்ளிக் கூடங்களின் பாதுகாப்பு மற்றும் பூகம்பத்தை தாங்கும் கட்டிடங்களை கட்டுதல் போன்றவை குறித்தும் கூட்டத்தில் ஆய்வு செய்யப்பட்டது.

தினதந்தி